މީޑިއާ ކޮންޓްރޯލް ކުރާ ގާނޫނު ރައީސް މުއިއްޒު ވިދާޅުވެފައެއް ނެތް: ނިޝާން
ރައީސް މުއިއްޒަކީ ނޫސްވެރިންނަށް ފިއްލަވައިގެން އުޅުއްވާ ބޭފުޅަކަށްވުމުން ގާނޫނު ކިޔާފަވާ ނޫސްވެރިޔަކާ ދިމާނުވުމުކީ އެކަށީގެންވާ ކަމެއް
މަޝްހޫރު ގާނޫނީ ވަކީލް މުހައްމަދު ނިޝާން އިބްރާހިމް ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަނީ
ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މީޑިއާ ކޮންޓްރޯލްކުރާ ގާނޫނާ ގުޅޭގޮތުން ދައްކަވާފައިވާ ވާހަކަފުޅުތަކުން، ރައީސް މުއިއްޒު އެގާނޫނު ވިދާޅުވެފައި ނެތްކަމާއި އަދި އެ ގާނޫނުގައި ހިމެނޭ މާއްދާތަކާ ބެހޭގޮތުން ރައީސަށް އެނގިވަޑައިނުގަންނަވާކަމަށް މަޝްހޫރު ގާނޫނީ ވަކީލު މުހައްމަދު ނިޝާން އިބްރާހިމް ވިދާޅުވެއްޖެއެވެ.
މިހާރު ރައީސް މުއިއްޒު އަތޮޅުތެރޭގެ ބައެއް ރަށްރަށަށް ކުރައްވަމުންގެންދާ ދަތުރުފުޅުގެ ތެރެއިން އެކި ރަށްރަށަށް ގޮސް، މިނިވަން މީޑިއާ ނެތިކޮށް ރައްޔިތުންގެ ހިޔާލުފާޅުކުރުމުގެ މިނިވަންކަން ހަނިވާ ގޮތަށް އޮތް ގާނޫނު ދިފާއު ކުރައްވަމުންދެއެވެ.
ރައީސް މުއިއްޒު ވިދާޅުވެފައިވަނީ އެ ގާނޫނު އެއްކޮޅުން އަނެއްކޮޅަށް ކިޔާލުމުން، އެއްވެސް ހައްގެއް އުނިވެގެންދާތަނެއް ފެނިވަޑައިނުގަންނަވާ ކަމަށެވެ. އަދި އިންޓަނެޓްގެ ޒަރީއާއިން މައުލޫމާތު ބޭނުންކުރުމަށް ހުރަސްއެޅޭ އެއްވެސް މާއްދާއެއް ނެތް އެގާނޫނުގައި ނެތް ކަމަށްވެސް ވިދާޅުވިއެވެ. އަދި މި ގާނޫނު ކިޔާފައިވާ އެއްވެސް ނޫސްވެރިއަކާ ދިމާވެފައި ނުވާކަމަށްވެސް ރައީސް މުއިއްޒު ވިދާޅުވެފައިވެއެވެ.
އަޅުގަނޑަކަށް އަދި ދިމަލެއް ނުވޭ އިހަށްދުވަހު މި ތަސްދީގުކުރެވިގެންދިޔަ ގާނޫނު ކީ އެއްވެސް ނޫސްވެރިޔަކާ. އަދި ދިމަލެއް ނުވޭ. ހަމަ އަނެކަކު ބުނި ވާހަކައެއް ގަބޫލުކޮށްލައިގެން މި ދަނީ ކުރިއަށްރައީސް މުއިއްޒު
ނިޝާން ވިދާޅުވި ގޮތުގައި، ރައީސް މުއިއްޒަކީ ނޫސްވެރިންނަށް ފިއްލަވައިގެން އުޅުއްވާ ބޭފުޅަކަށްވުމުން ގާނޫނު ކިޔާފަވާ ނޫސްވެރިޔަކާ ދިމާނުވުމުކީ އެކަށީގެންވާ ކަމެކެވެ. އެގޮތުން ރައީސް އޮފީސް ކުރިމަތީގައި ހުރި ނޫސްވެރިންގެ ފެންޑާ އަށް ނޫސްވެރިން ދާތީވެ އެތަންވެސް ރޫޅާލާފައިވާކަމަށާއި، އެހެންވީމާ ގާނޫނު ކިޔާފައިވާ ނޫސްވެރިންނާ ދިމާވާނީ ކިހިނެއްތޯ ވިދާޅުވެ ނިޝާން ސުވާލު އުފެއްދެވިއެވެ.
ނިޝާން ފާހަގަކުރެއްވި ގޮތުގައި، ދިވެހިރާއްޖޭގެ 26 މީޑިއާއެއް ވަނީ މި ބިލު ދިރާސާކުރި ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއަށް ހާޒިރުވެ، ބިލުގެ ވަކިވަކި މާއްދާތަކާ ގުޅޭގޮތުން ތަފްސީލީ ކަންބޮޑުވުންތައް ހިއްސާކޮށްފައެވެ. ކޮންމެ މީޑިއާއަކުންވެސް އެ ބޭފުޅުންނަށް ކަނޑައެޅިފައިވާ ވަގުތު ފުރިހަމައަށް ބޭނުންކޮށް، ވަރަށް ތަފްސީލީ ގޮތެއްގައި ކަންބޮޑުވުންތައް ފާޅުކޮށްފައިވަނީ ގާނޫނު އެއްކޮޅުން އަނެއްކޮޅަށް ކިޔާ ރަނގަޅަށް ދިރާސާކޮށްގެން ކަމަށް ނިޝާން ވިދާޅުވިއެވެ.
ދިވެހިރައްޖޭގެ މީޑިއާތަކުގެ ތެރެއިން ބޮޑު އިންސައްތައެއް އެއްވަނީ މި ބިލުގެ ކޮމިޓީ މަރުހަލާގަ، ބިލު ދިރާސާކުރި ރައްޔިތުންގެ މަޖިލީހުގެ މިނިވަން މުވައްސަސާތަކުގެ ކޮމިޓީއަށް ހާޒިރުވެ ބިލުގެ ވަކި ވަކި މާއްދާތަކަށް ހަވާލާދީ ކަންބޮޑުވުންތައް ހިއްސާކުރަށްވާފަ. ރަނގަޅަށް ގާނޫނު ކިޔާފަ އޮތީމަ ނޫންތޯ ކޮންމެ މީޑިއާ އަކުންވެސް އެބޭފުޅުންނަށް ކަނޑައަޅާފައިވާ ވަގުތު އެއްކޮށް ބޭނުންކޮށް އެހާ ތަފްސީލީ ގޮތެއްގައި ކަންބޮޑުވުންތަށް ފާޅުކޮށްފައިވަނީ. އެހެންވީމާ މި ގާނޫނުކިޔާފަވާ ނޫސްވެރިޔަކާ ދިމާނުވެއޭ ވިދާޅުވެ ރައީސް މުއިއްޒު ދައްކަވާފަވާ ވާހަކައާ ދޭތެރޭ ހައިރާންވޭ.ގާނޫނީ ވަކީލު މުހައްމަދު ނިޝާން އިބްރާހިމް
ނިޝާން އަލީ ނިންމާލަމުން ފާހަގަކުރެއްވި ގޮތުގައި، މިއީ ރައީސުލްޖުމްހޫރިއްޔާ އަށް އެނގިވަޑއިގެން މަޖިލީހަށް ހުށަހެޅި ބިލެއްކަމުގައި ވީނަމަވެސް، މި ގާނޫނުގައި ހިމެނޭ ކަންކަމާމެދު ރައީސް މުއިއްޒަށް އެނގިވަޑައިނުގަންނަވާކަން މިހާރު ވަރަށް ފުރިހަމައަށް ސާފުވެއެވެ.
