ރައީސް މުއިއްޒު ބައިވެރި ވެވަޑައިގެންނެވި ޖަލްސާ، ކިނބިދޫ ކައުންސިލްގެ ރައީސް ބޮއިކޮޓްކޮށްފި
މިއަދު 10 ޖަހާ އެހާކަންހާއިރު އަޅުގަނޑަށް ގުޅާފައި ކެންސަލް ކުރީ. ކުރިން އޮތީ ޖަލްސާގައި ވާހަކަ ދައްކާ ގޮތަށް
ރައީސުލްޖުމްހޫރިއްޔާ، ކޮޅުމަޑުލު ކިނބިދޫ ކައުންސިލާއި، އ.ތ.މ ކޮމިޓީ އަދި ރަށުގެ ބައެއް މުއައްސަސާތަކުގެ އިސްވެރިންނާ ބައްދަލުކުރެއްވުން 25-09-2025
ރައީސް މުއިއްޒު ބައިވެރި ވެވަޑައިގެންނެވި ޖަލްސާ، ކިނބިދޫ ކައުންސިލްގެ ރައީސް ބޮއިކޮޓްކޮށްފި
ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަތޮޅުތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ތ. ކިނބިދޫ އަށް ކުރެއްވި ދަތުރުފުޅުގައި، ކިނބިދޫ ކައުންސިލްގެ ރައީސް އަލީ ހުސެއިން އަށް، ޖަލްސާގައި ވާހަކަ ދެއްކުމުގެ ފުރުސަތު ނުދިނުމުން ޖަލްސާ ބޮއިކޮޓްކޮށްފި އެވެ.
ރާއްޖެއެމްވީ އާއި ވާހަކަދައްކަވަމުން އަލީ ހުސެއިން ވިދާޅުވީ ތ. ކިނބިދޫއަށް ރައީސް މުއިއްޒު ވަޑައިގަންނަވަން ހަމަޖެހިފައި އޮތީ ހެނދުނު 10 ޖަހާ އެހާކަންހާއިރު ކަމަށާއި، ހަމަ އެހާކަންހާއިރު ރައީސް އޮފީހުން، ރައީސް މުއިއްޒު ކިނބިދޫ ރައްޔިތުންނާއި ބައްދަލުކުރެއްވުމަށް ހަމަޖެހިފައިވާ ޖަލްސާގެ އެޖެންޑާ އިސްލާހް ކުރުމަށްފަހު ފޮނުވި ކަމަށެއެވެ. އަދި އެޖެންޑާ އިސްލާޙްކޮށްފައި ފޮނުވި އިރު، މީގެ ހަފްތާއެއްހާ ދުވަސް ކުރިން، ޖަލްސާގައި ވާހަކަ ދެއްކުމަށް އެޖެންޑާ ކުރެވި، އެކަމަށް ތައްޔާރަށް ހުންނެވި ކަމަށްވެސް އަލީ ހުސެއިން ވިދާޅުވި އެވެ. ނަމަވެސް ފަހު ވަގުތު މިގޮތަށް އެޖެންޑާއަށް ބަދަލު ގެނެސް ކައުންސިލްގެ ރައީސްގެ ހައިސިއްޔަތުން ރައީސް މުއިއްޒު ބައިވެރިވެވަޑައިގަންނަވާ ޖަލްސާއެއްގައި ވާހަކަ ދެއްކުމުގެ ފުރުޞަތު ނުދިނުމުން އެޖަލްސާ ބޮއިކޮޓް ކުރީ ކަމަށް ވިދާޅުވި އެވެ.
ޖަލްސާގައި ވާހަކަ ދެއްކުމުގެ ފުރުޞަތު ނުދިނީ ކީއްވެގެންތޯ ރައީސް އޮފީހުން ގުޅުއްވި ފަރާތާއި ސުވާލު ކުރުމުންވެސް އެކަމަށްވެސް ޖަވާބު ނުދެއްވި ކަމަށް އަލީ ހުސެއިން ވިދާޅުވި އެވެ.
"މިއަދުގެ ޖަލްސާގައި އަޅުގަނޑު ބައިވެރި ނުވީ މާކުރިން އެޖެންޑާކޮށް، ވާހަކަދެއްކުމުގެ ފުރުޞަތު ދޭނެ ކަމަށް ވިދާޅުވެ، އެކަމަށް އަޅުގަނޑު ރެޑީވެފައިވަނިކޮށް، މިއަދު 10 ޖަހާ އެހާކަންހާއިރު އަޅުގަނޑަށް ގުޅާފައި ކެންސަލް ކޮށްލުމުން، ރައްޔިތުންގެ ފަރާތުން ހުރި ކަންކަން ހިއްސާކޮށް ރައްޔިތުންގެ ފަރާތުން ބަހެއް ބުނަން ނުދޭކަން އެންގުމުން، އެބައްދަލުވުމުގެ މަންޒަރު ރީތި ކުރަން އިންނަ މީހެއްގެ ހައިސިއްޔަތުން ބައިވެރިވާން ބޭނުން ނުވީ"ކިނބިދޫ ކައުންސިލްގެ ރައީސް އަލީ ހުސެއިން
އަލީ ހުސެއިން އިތުރަށް ވިދާޅުވީ ހިޔާލު ތަފާތު ވިޔަސް ރާއްޖޭގެ ރައީސުލްޖުމްހޫރިއްޔާއަށް ދޭން ޖެހޭ އިޚްތިރާމް ދޭނެ ކަމަށާއި އެމަނިކުފާނު ކިނބިދޫއަށް ވަޑައިގަތުމުން މަރުހަބާ ދެންނެވުމަށްވެސް ވަޑައިގެންނެވި ކަމަށެވެ. ރައީސުލްޖުމްހޫރިއްޔާ، ތ. ކިނބިދޫ ރަށު ކައުންސިލް އަދި އ.ތ.މ. ކޮމިޓީއާ ބައްދަލުކުރެއްވި އިރު އެބައްދަލުވުމުގައިވެސް ބައިވެރި ކަމަށް ކިނބިދޫ ކައުންސިލްގެ ރައީސް ވިދާޅުވި އެވެ.
އަދި އެރަށުގައި އެމަނިކުފާނު ބައިވެރި ވެވަޑައިގެންނެވި ހުރިހާ އިވެންޓްތަކުގައި ކައުންސިލް ރައީސްގެ ހައިސިއްޔަތުން ބައިވެރިވެފައިވާނެ ކަމަށާއި ނަމަވެސް ރައްޔިތުންނާއި ބައްދަލުކޮށް ރައީސް ބައިވެރި ވެވަޑައިގަންނަވާ ޖަލްސާގައި ރައްޔިތުންގެ ފަރާތުން ވާހަކަ ދައްކަން ފުރުޞަތު ނުދިނުމުން ޖަލްސާ ބޮއިކޮޓް ކުރީ ކަމަށެއެވެ.
