އޮރިޔާންކާޑު ބޭނުންކޮށްގެން ފްރާންސްގެ މިޑްފީލްޑަރު މެތިއު ވަލްބުއޭނާއަށް ބިރުދައްކަން މަސައްކަތްކުރި ކަމަށް ކަރިމް ބެންޒެމާގެ މައްޗަށް ކޮށްފައިވާ ތުހުމަތުގެ މައްސަލައިގެ އަޑުއެހުންތައް އޮކްޓޯބަރު މަހަށް ތާވަލުކޮށްފިއެވެ.

ބެންޒެމާ އާއި އަންހެނަކު ގުޅިގެން ވަލްބުއޭނާގެ ވީޑިއޯއެއް ބޭނުންކޮށްގެން އޭނާއަށް ބިރުދައްކައި، ލާރި ހޯދަން މަސައްކަތްކޮށްފައިވަނީ 2015 ވަނަ އަހަރު ފްރާންސުން އަރްމީނިއާއާ ދެކޮޅަށް ކުޅުނު މެޗެއްގެ ކުރިންނެެވެ. މި މައްސަލައިގައި 2015 ވަނަ އަހަރު ބެންޒެމާ ހައްޔަރުކުރި ނަމަވެސް، ރަސްމީ ހައިސިއްޔަތަކުން މައްސަލަ ބަލާފައެއް ނުވެއެވެ. އެކަމަކު އެ ފަހަރު މި މައްސަލައިގައި ފްރާންސްގެ ޤައުމީ ފުޓްބޯޅަ ޓީމުން ބެންޒެމާ ބޭރުކުރިއެވެ.

މިހާ ހިސާބަށް އައިރު މި މައްސަލަ ބަލާފައި ނުވި ނަމަވެސް، ފަސް އަހަރު ފަހުން ބެންޒެމާގެ މައްސަލައިގެ އަޑުއެހުންތައް ފަށާނެ ކަމަށް މިދިޔަ ޖެނުއަރީ މަހު ފްރާންސްގެ ޕްރޮސެކިއުޓަރުން ވަނީ ބުނެފައެވެ. އެއާއެކު މިހާރު މި މައްސަލައިގެ އަޑުއެހުންތައް ވަނީ އޮކްޓޯބަރު މަހުގެ 20 ވަނަ ދުވަހުން 22 ވަނަ ދުވަހަށް ތާވަލުކޮށްފައެވެ. ބެންޒެމާގެ އިތުރުން ހަތަރު މީހަކަށް މި މައްސަލައިގެ ތުހުމަތުކުރެވޭއިރު، މި މައްސަލަ ސާބިތުވެއްޖެނަމަ، ބެންޒެމާއަށް ފަސް އަހަރުގެ ޖަލު ޙުކުމެއް އައުން ގާތް ކަމަށް ރިޕޯޓުތައް ބުނެއެވެ.

ބެންޒެމާގެ މައްސަލައިގެ އަޑުއެހުންތައް އޮކްޓޯބަރު މަހަށް ތާވަލުކުރިއިރު، ފްރާންސްގެ ޕްރޮސެކިއުޓަރުން ތުހުމަތުކުރާ ގޮތުން ބެންޒެމާ ވަނީ ވަލްބުއޭނާގެ ވީޑިއޯއެއް ބޭނުންކޮށްގެން ބެލްކްމެއިލް ކުރާ މީހާ ލައްވައި ވަލްބުއޭނާއަށް ގުޅައި، ބިރު ދެއްކުމުގެ އިތުރުން، އެކަން ރޭވުމުގައި އިސްކޮށް ހަރަކާތްތެރިވެފައެވެ.

އެކަމަކު އުމުރުން 33 އަހަރުގެ ބެންޒެމާ މީގެ ކުރިން އޭނާގެ ރަސްމީ އިންސްޓަގްރާމް އެކައުންޓުގައި ކުރި ޕޯސްޓެއްގައި ބުނެފައިވަނީ މި މައްސަލަ ބަލަން ފެށުމަކީ މިއީ އަނެއްކާވެސް މިކަމުގައި ކުރިއަށްދާނެ އިތުރު ޑްރާމާއެއް ކަމަށެވެ. އަދި ބެންޒެމާގެ ވަކީލު ސިލްވައިން ކޯމިއޭ ވަނީ މި މައްސަލައިގައި ބެންޒެމާ ލަދުގަންނަން ޖެހޭ އެއްވެސް ކަމެއް ނެތް ކަމަށާއި، ބެންޒެމާ މަސައްކަތް ކުރަމުންދިޔައީ އޭނާއާ އެއް ޓީމަކަށް ކުޅެމުން އަންނަ ކުޅުންތެރިއަކު މި ބިރުވެރި ކަމުން ސަލާމަތްކުރުމަށް ކަމުގައި ވިދާޅުވެފައެވެ. އެކަމަކު ވެލްބުއޭނާ އާއި އޭނާގެ ވަކީލު މަސައްކަތް ކުރަމުންދަނީ އެ ހުރިހާ ކަމެއް އެނގިހުރެ، ބެންޒެމާގެ އަބުރު ކަތިލުމަށް ކަމަށްވެސް ސިލްވައިން ވަނީ ވިދާޅުވެފައެވެ.

މިކަންތައްތައް ހިނގާދިޔައިރު ބެންޒެމާ އާއި ވަލްބުއޭނާއަކީ ބްރެޒިލުގައި 2014 ވަނަ އަހަރު ކުރިއަށްދިޔަ ފީފާ ވޯލްޑް ކަޕުގައި ކުޅުނު ފްރާންސް ޓީމުގެ ދެ ކުޅުންތެރިންނެވެ. އެކަމަކު މި މައްސަލަ ފެންމަތިވުމަށްފަހު 2015 ވަނަ އަހަރުގެ ފަހުން މި ކުޅުންތެރިންނަށް ފްރާންސް ސްކޮޑުން ފުރުސަތު ދީފައެއް ނުވެއެވެ. އެއާއެކު ބެންޒެމާ މިހާތަނަށް ފްރާންސް ޓީމަށް 81 މެޗު ކުޅެދީފައިވާއިރު، ވަލްބުއޭނާ ވަނީ 52 މެޗު ކުޅެދީފައެވެ.