ސުއޭޒް ކެނަލްގައި ތާށިވި އާގުބޯޓު އެއްކޮށް ފުންކޮށްފިއެވެ.

ތައިވާނުގައި މަރުކަޒުވެފައިވާ ކުންފުންޏަކުން ދުއްވާ 1،300 ފޫޓުގެ އާގުބޯޓެއްކަމަށްވާ "އެވަރ ގްރީން" ސުއޭޒު ކެނަލްގައި ހުރަސްވެ ތާށިވުމުން އެ ސަރަޙައްދު ބަންދުވެ އެ މަގުން ދަތުރުކުރަން ހަމަޖެހިފައިވާ ތެޔޮ އުފުލާ ބޯޓުފަހަރާއި މުދާ އުފުލާ ބޯޓުފަހަރު ވަނީ އެ މަގުން ހުރަސްނުކުރެވި ދެ ފަރާތުގައި ތާށިވެފައެވެ. އެގޮތުން ސުއޭޒު ކެނެލަށް ނުވަދެވި ނުވަތަ ސުވޭޒު ކެނަލުގެ އެކި ސަރަޙައްދުތަކުގައި ތާށިވެފައި 300 އަށްވުރެ ގިނަ އުޅަނދު އެބައޮތެވެ. ބޯޓު އަނބުރާލުމަށް ގާތްގަނޑަކަށް 50 ފޫޓުގެ ފުންމިނަށް ބިންގަނޑު ކޮންނަން ޖެހެއެވެ. ބޯޓުގެ ދިރުނބާ ކޮޅުން މިހާތަނަށް 20،000 ޓަނުގެ ވެލިވަނީ ކޮނެފައެވެ. ސުއޭޒް ކެނަލް އޮތޯރިޓީން ބުނީ ބޯޓު އަނބުރާލުމަށް ކޮށްފައިވާ މަސައްކަތުން ބޯޓުގެ ހުންގާނާއި ކޮޅުފަސްކޮޅު ކޮންމެވެސް ވަރަކަށް ގުޑުވާލެވިފައިވާކަމަށް މީގެ ދެ ދުވަސްކުރި ޚަބަރުތައް ވަނީ ފެތުރިފައެވެ. އެކަން ހާޞިލްކޮށްފައިވަނީ ބޯޓުގެ ދެ ފަރާތުގައި އޮންނަ ސަރަޙައްދު ކޮނެ ޓަގުބޯޓު ބޭނުންކޮށްގެން ބޯޓު ދަމައިގެންނެވެ. އަދި ކޮންމެވެސް ވަރަކަށް ބޯޓު ފުންކުރެވިފައިވާކަމަށާއި، ކޮންމެ ވަގުތެއްގައި ވެސް ބޯޓު އެނބުރިދާނެކަމަށް އެ ވުޒާރާއިން އޭރު ވަނީ ބުނެފައެެވެ.

މި މަސައްކަތުގެ އެންމެ ފަހުގެ މަޢުލޫމާތު ހާމަކޮށް އާންމުކުރި ވީޑިއޯއެއްގައި ވަނީ ސުއޭޒް ކެނަލްގައި ތާށިވި އާގުބޯޓު އެއްކޮށް ފުންކުރެވި ފެންމައްޗަށް ގެނެސްފައިވާކަން ހާމަކޮށްފައެވެ. ސުއޭޒް ކެނަލްގެ ކުރީގެ ވެރިޔާ އަދި މިޞްރުގެ ޕްރެސިޑެންޝަލް ސީޕޯޓް އެޑްވައިޒަރ މޮހެބް މަމިޝް ވަނީ ހުއްޓުމެއްނެތި އެއް ހަފުތާގެ މަސައްކަތުން ސުއޭޒް ކެނަލްގައި ތާށިވި އާގުބޯޓު އެއްކޮށް ފުންކޮށްފައިވާކަން ހާމަކޮށްފައެވެ. އަދި ކުރިއަށްއޮތް 6 ގަޑިއިރުގެ ތެރޭގައި މި ކެނަލް ހުޅުވާލައި އޮޕަރޭޝަން ފެށޭނެކަމަށް ވިދާޅުވިއެވެ. އެހެންނަމަވެސް، ސުއޭޒް ކެނަލް އޮތޯރިޓީން މިހާތަނަށް އައިރު ތާށިވި އާގުބޯޓު އެއްކޮށް ފުންކޮށް، ކެނަލްގެ ކަންކަން ކުރިއަށްދާނެގޮތާ މެދު ވަކި އެއްޗެއް ހާމަކޮށްފައެއް ނުވެއެވެ.

ސުއޭޒް ކެނަލްގައި ބޯޓު ހުރަސްވުމަށް މެދުވެރިވީ މޫސުން ގޯސްވި ވަގުތެއްގައި ފަޅުވެރިން ފަރުވާކުޑަކުރުމުންކަމަށާއި ބޯޓަށް އެއްވެސް މައްސަލައެއް ދިމާވެގެން ނޫންކަމަށް އިބްތިދާޢީ ތަހުޤީޤުތަކުން ދައްކައެވެ. އެ ބޯޓުގައި ތިބީ އިންޑިޔާއަށް ނިޞްބަތްވާ 25 ފަޅުވެރިންނެވެ. މިސްރުގެ ސުއޭޒް ކެނަލްގައި ތާށިވެފައިވާ އާގު ބޯޓު 'އެވަރ ގްރީން' ފުންކުރުމަށް ގިނަ ދުވަސްތަކެއް ނަގާނެ ކަމަށް ބެލެވިފައިވާތީ މިދަނޑިވަޅުގައި ދުނިޔޭގެ ބާޒާރުގައި ތަކެތީގެ އަގު ބޮޑުވާނެ ކަމަށް ރިޕޯޓްތައް ދަނީ ބުނަމުންނެވެ. ރިޕޯޓްތައް ބުނާ ގޮތުން ސުއޭޒް ކެނަލްގައި ތާށިވެފައިވާ އާގުބޯޓުގެ ސަބަބުން ކަނޑުމަގުން ކުރާ ދުނިޔޭގެ ވިޔަފާރިއަށް ހުރަސްތަކެއް ވަނީ ކުރިމަތިވެފައެވެ. ކަނޑުމަގުން ދުނިޔޭގައި ކުރާ ވިޔަފާރީގެ 20 އިންސައްތަ ބޯޓުތައް ސުއޭޒް ކެނަލުން ދަތުރުކުރަން ޖެހެއެވެ. މީގެ ތެރޭގައި މުދާ އުފުލާ ކޮންޓެއިނަރުތަކާއި، ތެޔޮ އުފުލާ ކޮންޓެއިނަރުތައް ހިމެނެއެވެ.

ސުއޭޒް ކެނަލަކީ ދުނިޔޭގެ ހުޅަނގު ބިތާއި އިރުމަތީ ބިތް ގުޅުވައިދޭ މައި މަގެވެ. މި ކެނަލުން ގަޑިއިރެއްގެ ތެރޭ 400 މިލިއަން ޑޮލަރުގެ ކާގޯ ދަތުރުކޮށް ހަދައެވެ.