މަޝްހޫރު މީސް މީޑިއާ ކުންފުނި ފޭސްބުކުން އެ ކުންފުނީގެ ތިން އެޕްލިކޭޝަން ކަމުގައިވާ އިންސްޓަގްރާމް، ވަޓްސްއެޕް އަދި މެސެންޖަރ އެއްކޮށްލަން ނިންމައިފިއެވެ.
މުސްތަގުބަލުގައި ވެސް މި ތިން ހިދުމަތުގެ އެޕްތައް ވަކިން ހުއްޓެއްކަމަކު، މި ހުރިހާ އެޕްތަކެއް މަސައްކަތް ކުރާނީ އެއް އޮނިގަނޑެއްގެ ދަށުންނެވެ. މާނައަކީ މި ތިން އެޕްލިކޭޝަންގެ ހިދުމަތް ހޯދަން ބޭނުންވާ ފަރާތްތަކުން ދެން އެ ހިދުމަތްތަށް ލިބޭނީ އެއް ޔޫސަރ ޕްރޮފައިލްއެއްގެ ދަށުންނެވެ.
މި އެޕްލިކޭޝަންތަކަށް އެންޑް-ޓު-އެންޑް އެންކްރިޕްޝަން ތައާރަފް ކުރުމަށް މަސައްކަތް ކުރަމުންދާ ކަމަށް ފޭސްބުކްއިން ވަނީ ހާމަކޮށްފައެވެ. އެންޑް-ޓު-އެންޑް އެންކްރިޕްޝަން މެދުވެރިކޮށް ކުރާ މުއާމަލާތަކީ، ފޮނުވާ ފަރާތާއި ލިބޭ ފަރާތް ފިޔަވައި އެހެން ފަރާތްތަކަށް ސިއްރުކުރެވިފައިވާ މުއާމަލާތްތަކެވެ.
މާހިރުން ބުނަނީ މިކަމުގެ ސަބަބުން ފޭސްބުކް ބޭނުންކުރާ ފަރާތްތަކުގެ މައުލޫމާތު އެއްކުރަން އެ ކުންފުންޏަށް އިތުރު ފަސޭހަތަކެއް ލިބުމާއި އެކު، އެ ފަރާތްތަކަށް އަމާޒުކޮށްގެން ދެއްކޭ އިޝްތިހާރުތައް ކަނޑައެޅުމަށް އެ ކުންފުންޏަށް އިތުރު ބާރުތަކެއް ލިބިގެންދާނެ ކަމަށެވެ.
ފޭސްބުކުން އެންމެ ފަހުން އާންމުކޮށްފައިވާ އާމްދަނީގެ ރިޕޯޓުގައިވާ ގޮތުން، ކޮންމެ ދުވަހަކު ދުވާލަކު އެއް ފަހަރު ނަމަވެސް ފޭސްބުކްގެ އެޕްލިކޭޝަންތައް ދެ ބިލިއަން މީހުން ދުނިޔޭގެ އެކިކަންކޮޅުތަކުގައި ބޭނުންކުރެއެވެ.
