އައްޑޫސިޓީ ފޭދޫގެ ފެންހިންދާ ނިޒާމް ޤާއިމުކުރުމުގެ މަސައްކަތް ނިންމާލައިފި

އައްޑޫސިޓީ ފޭދޫގެ ފެންހިންދާ ނިޒާމް ޤާއިމުކުރުމުގެ މަސައްކަތް ނިންމާލައިފިއެވެ.

މި މަސައްކަތް ނިމުމާ ގުޅިގެން ހުކުރު ދުވަހު ވަނީ ހާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތު ޝަރަފުވެރިކޮށްދެއްވީ މިނިސްޓަރ އޮފް އެންވަޔަރަންމަންޓް ޑރ. ޙުސައިން ރަޝީދު ޙަސަނެވެ.

މި ފެން ހިންދާ ނިޒާމް ޤާއިމުކުރުމުގެ މައިގަނޑު މަޤްސަދަކީ ބޯކޮށް ވާރޭ ވެހުމުގެ ސަބަބުންނާއި އުދަ އެރުމުގެ ސަބަބުން ރަށުގައި ފެންބޮޑުވެ، ރަށުގެ ރައްޔިތުން އުފުލަމުންދިޔަ ތަކުލީފުތަކަށް ހައްލެއް ހޯދައިދީ، އެފަދަ ކާރިސާތަކުން ރަށަށް ލިބޭ ގެއްލުންތައް މަދުކުރުމެވެ.

އައްޑޫ ސިޓީ ފޭދޫގެ ފެން ހިންދާ ނިޒާމުގެ ފީސިބިލިޓީ ސްޓަޑީ އާއި އީއައިއޭ ހެދުމާއި ޑިޒައިން ތައްޔާރުކުރުމުގެ މަސައްކަތް ކުރިއަށް ގެންގޮސްފައިވަނީ ވޯޓަރ ސޮލިއުޝަން ޕވޓ ލޓޑ އާ ހަވާލުކޮށްގެންނެވެ. އަދި މި މަޝްރޫޢުގެ ޢަމަލީ މަސައްކަތް ކުރިއަށް ގެންގޮސްފައިވަނީ ސެނޮކް ޓްރޭޑް ކޮމްބައިން ޕވޓ ލޓޑ އާ ހަވާލުކޮށްގެންނެވެ. މިގޮތުން މި މަޝްރޫޢުގެ އަމަލީ މަސައްކަތް ފަށާފައިވަނީ ޖުލައި 2018 ގައެވެ. އަދި އަމަލީ މަސައްކަތް ނިންމާފައިވަނީ ޑިސެމްބަރ 2020 ގައެވެ. މި މަޝްރޫޢުގެ ޖުމްލަ އަގަކީ 23،280،591.50ރ. (ތޭވީސް މިލިއަން ދުއިސައްތަ އަށްޑިހަ ހާސް ފަސްސަތޭކަ ނުވަދިހަ އެއް ރުފިޔާ ފަންސާސް ލާރި) އެވެ.

ދިވެހި ސަރުކާރުން ކުރިއަށް ގެންދިޔަ އައްޑޫ ސިޓީ ފޭދޫގެ ފެން ހިންދާ ނިޒާމު ޤާއިމުކުރުމުގެ މަޝްރޫޢުގެ ދަށުން އެ ރަށުގައި 10 ޕަންޕް ސްޓޭޝަން އާއި އައުޓްފޯލެއް ވަނީ ޤާއިމުކޮށްފައެވެ.