ދެވަނަ ޑޯޒަށް ފަހު ބަލީގައި ބޮޑުވަރެއް ނުވާނެ - ޑރ. ފައިސަލް
29 މާރިޗު 2021 | ހޯމަ 01:56ވެކްސިންގެ ފައިދާ ފެންނާނީ ދެވަނަ ޑޯޒަށް ފަހުގައި
ޑރ. ފައިސަލް
ކޮވިޑް-19ގެ ދެވަނަ ޑޯޒަށްފަހު ބަލީގައި ބޮޑުވަރުވެގެން ނުދާނެ ކަމަށް ޑރ. އަޙްމަދު ފައިސަލް ވިދާޅުވެއްޖެއެވެ.
އެޗްއީއޯސީގެ ޕްރެސް ކޮންފަރެންސްގައި ވާހަކަ ދައްކަވަމުން، މޯލްޑިވްސް ޓެކްނިކަލް އެޑްވައިޒަރީ ގްރޫޕް އޮން އިމުނައިޒޭޝަންގެ ޗެއާ ޕާރސަން ޑރ. އަހްމަދު ފައިސަލް ވިދާޅުވީ، ވެކްސިންގެ ފައިދާ ފެންނާނީ ދެވަނަ ޑޯޒަށް ފަހުގައި ކަމަށާއި، އެއަށްފަހު މި ބަލީގައި ބޮޑުވަރު ނުވާނެ ކަމަށެވެ. ފައިސަލް ވިދާޅުވީ އޭގެ ފަހުން މިއީ އާދައިގެ ރޯގާ އަކަށްވާނެ ކަމަށެވެ. އަދި ބަލި ޖެހޭ މީހުންނާއި ބަލީގައި އެނދުމަތިކުރާ މީހުން މަދުވެގެންދާނެ ކަމަށެވެ.
ފައިސަލް ވިދާޅުވީ، މިހާރު ރާއްޖޭގައި ސިނޮފާރމް ވެކްސިން ޖަހާ އުމުރުފުރާގެ އިތުރުން އެހެން އުމުރުފުރާތަކަށް މި ވެކްސިން ޖެހުމަށް ވަރަށް އަވަހަށް ހުއްދަ ލިބިގެންދާނެ ކަމަށް އުންމީދު ކުރާ ކަމަށެވެ. އެހެން ބައެއް ގައުމުތަކުގައި 60 އަހަރުން މަތީގެ މީހުންނަށާއި، 3 އަހަރުން މަތީގެން ކުދިންނަށް މި ވެކްސިން ޖަހާފައިވާ ކަމަށެވެ. މި ޑޭޓާތައް މިހާރު ޑަބްލިއު.އެޗް.އޯ އަށް ހުށަހަޅާފައިވާކަަމަށާއި، އެހެން އުމުރުފުރާތަކަށް ސިނޮފާރމް ވެކްސިން އާއްމުކޮށް ދިނުމުގެ ހުއްދަ ވަރަށް އަވަހަށް ލިބިގެންދާނެ ކަމަށެވެ.
ފައިސަލް ވިދާޅުވީ، ކޮންމެ ވެކްސިނަކަށް ވެސް ހުއްދަ ދެނީ ބަލަންޖެހޭ މިންގަނޑުތަކަށް ބެލުމަށްފަހުގައި ކަމަށެވެ. އެހެން ކަމުން އާއްމު ސިއްޙަތު ރައްކާތެރި ކުރުމަށްޓައި ސަމާލުކަން ދޭންވީ ވެކްސިންޖެހުމަށް ކަމަށެވެ.
މިއަދު ވެކްސިން ޖަހާފައިވާ މީހުންގެ ތަފާސް ހިސާބުތަކަށް ބަލާއިރު، 2045 މީހުން ވެކްސިން ޖަހާފައިވެއެވެ. އެއީ މާލެ ސަރަޙަދުން 776 މީހުންނާއި އަތޮޅުތެރެއިން 1269 މީހުންނެވެ.
މިހާތަނަށް ވެކްސިން ޖަހާފައިވަނީ 232،175 މިހުންނަށެވެ. އެއީ، މާލެ ސަރަޙައްދުން 129،069 މީހުންނާއި، އަތޮޅުތެރެއިން 103،106 މީހުންނެވެ.
