އުނގޫފާރު ކުލަސްޓަރ އާއި ގުޅުންހުރި މީހަކު އަލިފުށިން ޕޮޒިޓިވްވެ އަލިފުށި މޮނިޓަރިންގ އަށް

ރ. އުނގޫފާރު ކުލަސްޓަރ އާ ގުޅިގެން ރ އަލިފުށިން ނެގި ސާމްޕަލްތަކުގެ ތެރެއިން ސާމްޕަލެއް ކޮވިޑް-19ށް ޕޮޒިޓިވްވުމާއި ގުޅިގެން އަލިފުށި މޮނިޓަރިންގ އަށް ގެނެސްފިއެވެ.

ރ އަލިފުށި މޮނިޓަރިންގ އަށް ގެނެސްފައިވަނީ ހޮނިހިރު ދުވަހުގެ ރޭ އިރުއޮއްސި 7:14ގައެވެ. އަލިފުށި މޮނިޓަރިންގ އަށް ގެނެސްފައިވަނީ އިތުރަށް ބަލަންޖެހޭ ކަންކަން ބެލުމަށެވެ.

އަލިފުށި ސިއްހީ މަރުކަޒުން ބުނެފައިވަނީ ޕޮޒިޓިވް ކޭސްއެއް ފެނުމާއި ގުޅިގެން މިވަގުތު ކޮންޓެކްޓް ޓްރޭސިންގ ހެދެމުންދާކަމަށެވެ. އަދި ހުރިހާ ރައްޔިތުންވެސް ރައްކާތެރިކަމުގެ ފިޔަވަޅުތަކަށް ސަމާލުވުމަށް ވަނީ އެދިފައެވެ.

މީގެއިތުރުން އަލިފުށީ ސިއްހީ މަރުކަޒުން ބުނެފައިވަނީ ޒަރޫރީ ބޭނުންތަކަށް ފިޔަވާ ގެއިން ބޭރަށް ނުނިކުތުމަށާއި ޒަރޫރީ ބޭނުމަކަށް ނުކުންނަނަމަ މާސްކްއެޅުމަށް އަންގާފައެވެ. އަދި ސްކޫލްތައް ބަންދުވާނެކަމަށާއި ކެފޭ/ރެސްޓޯރަންޓްތައް އެތެރޭގެ ޚިދުމަތް (އިން-ޑައިނިންގް) މެދުކަނޑާލާ ޓޭކް އަވޭ އަދި ޑެލިވަރީ ކުރިއަށް ގެންދިއުމަށް ބާރު އެޅުމަށް ވަނީ އިލްތިމާސްކޮށްފައެވެ.

ޓީމު ކުޅިވަރުތައް ހުއްޓާލުމާއި މަސައްކަތުގެ މާހައުލުގައާއި ފިހާރަތަކުގައި މާސްކް އެޅުމާއެކު 3 ފޫޓުގެ ދުރުމިން ބެހެއްޓުމަށް ވަނީ އިލްތިމާސްކޮށްފައެވެ.

އުނގޫފާރު ކުލަސްޓާރ އާ ގުޅިގެން މިހާތަނަށް ރ. އަތޮޅުގެ ހުޅުދުއްފާރު އަދި މަޑުއްވަރި ވެސް ވަނީ މޮނީޓަރިންއަށް ލާފައެވެ.