ޅ. ހިންނަވަރުން ކޮވިޑް-19ގެ ކޭސްތަކެއް ފެނި އެރަށް މޮނީޓަރިން އަށް ލައިފިއެވެ.
އެޗްޕީއޭއިން ބުނީ ޅ. ހިންނަވަރުން ބަލީގެ އަލާމާތްތައް ފެނިގެން ޓެސްޓު ކުރި މީހަކު ކޮވިޑް-19ށް ޕޮޒިޓިވްވެފައިވާ ކަމަށާއި އެ ކޭސްގެ ކޮންޓެކްޓް ޓްރޭސިންއާއި ދެން ބަލަން ޖެހޭ ކަންކަން ބެލުމަށް އެ ރަށް މޮނިޓަރިން އަށް ލާފައިވާކަމަށެވެ.
ހިންނަވަރުން ކޮވިޑް-19ގެ ކޭސް އެއް ފެނިފައިވާއިރު އެ އަތޮޅުގައި މިހާރު ދަނީ ކޮވިޑް-19ގެ ބޮޑު ކްލަސްޓަރ އެއް ފެތުރެމުންނެވެ. އެގޮތުން އެ ސަރަހައްދުން އެންމެ ގިނަ ބަޔަކު ޕޮޒިޓިވްވެފައި ވަނީ އެ އަތޮޅު މަސް ފެކްޓްރީ ހުންނަ ފެލިވަރުގައެވެ. އެރަށުން 66 މީހަކު މިހާތަނަށް ޕޮޒިޓިވްވެފައިވާއިރު އެޗްޕީއޭއިން ބުނީ ހިންނަވަރުން ފެނިފައިވާ ކޭސްއާ އެ އަތޮޅުން ފެނުނު އެހެން ކޭސްތަކާ އަދި މިހާތަނަށް އެއްވެސް ގުޅުމެއް ދެނެގަނެވިފައި ނުވާ ކަމަށެވެ.
ޅ. އަތޮޅުން އެންމެ ފުރަތަމަ ކޭސް އެއް ފެނުނީ އެ އަތޮޅު ނައިފަރު ސިއްހީ މަރުކަޒުންނެވެ. އެތަނުގެ މުވައްޒަފަކު ޕޮޒިޓިވްވި އިރު އެ މުވައްޒަފަކީ ރ. އުނގޫފާރަށް ގޮސްފައި އައި މުވައްޒަފެކެވެ. އުނގޫފާރުގައި ވެސް ކޭސްތައް ފެތުރި އެ އަތޮޅު މަޑުއްވަރީ ވެސް މޮނިޓަރިންއަށް ލާފައިވާއިރު، ޅ އަތޮޅުން ވެސް ނައިފަރާއި ހިންނަވަރު ވަނީ މޮނިޓަރިން އަށް ލާފައެވެ. ރ. އަތޮޅުން ވެސް އުނގޫފާރާއި މަޑުއްވަރީގެ އިތުރަށް ބައެއް އެހެން ރަށްރަށުން ވެސް ކޭސްތައް ފެނި މޮނިޓަރިން އަށް ލާފައިވާއިރު މި ކްލަސްޓަރގެ ކޭސްއެއް ހދ. ކުޅުދުއްފުށިން ފެނި އެ ރަށް ވެސް އޮތީ މޮނިޓަރިންގެ ހާލަތުގައެވެ.
