ރ.މަޑުއްވަރީގައި ހިންގި ހަމަނުޖެހުމުގައި 10 މީހަކު ހައްޔަރުކޮށްފިއެވެ.

ފުލުހުން ބުނީ މި 10 މީހުންނަކީ ވެސް ދިވެހި ފިރިހެނުން ކަމަށެވެ. މަޑުއްވަރީގައި ގްރޫޕަކުން ރޭޕްކުރި ކަމަށްބުނާ ކުޑަކުއްޖާގެ މައްސަލައިގައި ޝާމިލުވާ މީހުން ހައްޔަރުކުރުމަށް ގޮވާލައި، މާޗް 24 ވަނަ ދުވަހުގެރޭ އެރަށު ޕޮލިސްޓޭޝަން ކައިރިއަށް ގިނަ އަދަދެއްގެ އާންމުން އެއްވެ އަޑުއުފުލާފައިވެއެވެ. ފުލުހުން ބުނީ އާއްމު ރައްޔިތުން ޕޮލިސް ސްޓޭޝަން ކައިރިއަށް އެއްވެ ހިންގި ހަމަނުޖެހުމުގައި ދައުލަތުގެ މުދަލަށް ގެއްލުންދީ، ފުލުހުންނަށް ވެސް ހަމަލާ ދީފައިވާ މައްސަލަ ފުލުހުން ބަލަމުން އަންނަނަ ކަމަށެވެ.

މަޑުއްވަރީ ސްކޫލްގައި ކިޔަވަމުން އަންނަ ދަރިވަރަކު ގްރޫޕަކުން ރޭޕްކުރި މައްސަލާގައި ރަށް ހަލަބޮލިވެފައިވާއިރު، މިކަމުގައި ފުލުހަކާއި، ޓީޗަރެއް ވެސް ހިމެނޭ ކަމަށް އެ ކުއްޖާއާ ހަވާލާދީ މައުލޫމާތު ލިބެއެވެ. ސްކޫލް ޕްރޮޖެކްޓެއް ނިންމުމަށް ކަމަށްބުނެ ގެއަކަށް ގެންގޮސް އެ ކުއްޖާއަށް ބިރުދެއްކި ކަމަށާއި، ޖޫސްތައްޓެއް ބޯން ދީ، ހޭނެތެމުން ދިޔަ އިރު ހަތަރެސްފައި ބަންނަމުން ދިޔަކަން އެ ކުއްޖާއަށް އެނގޭ ކަމަަށް ރާއްޖެއެމްވީއަށް މައުލޫމާތު ލިބިފައިވެއެވެ.

ކުއްޖާއަށް ނަފްސާނީ ގޮތުން ދިމާވެފައިވާ ކަންކަމަށް އެރަށު ސިއްޙީ މަރުކަޒުން ވަނީ ފަރުވާ ހޯދާފައެވެ. ބަޔަކު އެކުއްޖާ ރޭޕްކުރި މައްސަލަ ފުލުހުންނާއި ޖެންޑަރ މިނިސްޓްރީން އަންނަނީ ބަލަމުންނެވެ. މާރިޗު 3 ވަނަ ދުވަހު ހިނގާފައިވާ މިހާދިސާ ފުލުހުންނަށް ރިޕޯޓުކޮށްފައިވަނީ 11 ވަނަ ދުވަހުއެވެ.