މަޑުއްވަރީ ރޭޕް ކޭސް ކުށްވެރިކޮށް، ޝާމިލުވާ މީހުންނަށް ހަރުކަށި އަދަބު ދިނުމަށް ކައުސިލުން ގޮވާލައިފި
25 މާރިޗު 2021 | ބުރާސްފަތި 05:00މި މައްސަލަ މިހާރު ފުލުހުންނާއި ޖެންޑަރ މިނިސްޓްރީން އަންނަނީ ބަލަމުން
މަޑުއްވަރި
ރ. މަޑުއްވަރީގައި ސްކޫލް ކުއްޖަކު ރޭޕް ކުރި މައްސަލަ އެރަށު ކައުސިލުން ކުށްވެރިކޮށްފިއެވެ.
ކައުސިލުން ބުނީ، މި މައްސަލަ މިހާރު ފުލުހުންނާއި ޖެންޑަރ މިނިސްޓްރީން ބަލަމުން އަންނަ ކަމަށެވެ.
ކައުންސިލުން ބުނީ މި މައްސަލަ ވީއެންމެ އަވަހަކަށް ތަހުގީގުކޮށް، މައްސަލައާ ގުޅުންހުރި މައުލޫމަތު ރައްޔިތުނަށް ފޯރުކޮށްދިނުމަށާއި، މި ހަޑިމުޑުދާރު ފިނޑި އަމަލު ހިންގި ފަރާތްތަކާއި މިކަމުގައި ޝާމިލުވާ އެންމެންނަށް ޤާނޫނުގައި ބަޔަންކުރާ އެންމެ ހަރުކަށި އަދަބު ދިނުމަށް ކަމާބެހޭ ފަރާތްތަކަށް ގޮވާލާކަމަށެވެ.
މި މައްސަލައާ ގުޅިގެން ބުދަ ދުވަހުގެރޭ އާންމު ރައްޔިތުން މަޑުއްވަރީ ޕޮލިސް ސްޓޭޝަން ކައިރިއަށް އެއްވެ ނުރުހުން ފާޅުކޮށްފައިވެއެވެ.
"ރާއްޖެ އެމްވީ" އަށް އެނގިފައިވާގޮތުގައި އެކަމުގައި ފުލުހެއް ވެސް ބައިވެރިވި ކަމަށް ކުއްޖާ ބުންޏެވެ. އޭނާ ގެންދިޔައީ ސްކޫލް ޕްރޮޖެކްޓެއްގެ ނުނިމި އޮތް ބައި ފުރިހަމަކުރުމަށް ކަމަށް ބުނެ ގެއަކަށް ކަމަށާއި، އެތަނަށް ވަންއިރު ޓީޗަރުގެ އިތުރުން ދެ ފިރިހެނުން ތިބި ކަމަށް އެނގިފައިވެއެވެ. އޭގެ ތެރެއިން އެކަކަކީ ފުލުހެއް ކަމަށް ވެސް ވެއެވެ. އެމީހާ ހުރީ ވެސް ފުލުހުންގެ ޔުނީފޯމުގައި ކަމަށާއި، އެއީ ފުލުހުންގެ ވަރަށް ބޮޑު މީހެއް ކަމަށް ބުނެ ކުއްޖާއަށް ބިރުދެއްކި ކަމަށް ވެސް ކުއްޖާއާ ހަވާލާދީ މައުލޫމާތު ލިބިފައިވެއެވެ.
އެތަނަށް ވައްދާފައި، އެއިން އެއްވެސް ވާހަކައެއް ނުބުނުމަށާއި، ބުނެފި ނަމަ އާއިލާގެ އެންމެން މަރާލާނެ ކަމަށް ބުނެ ބިރު ދެއްކި ކަމަށް ކުއްޖާ ބުނެފައިވާ ކަން ވެސް އެނގިފައިވެއެވެ. އަދި އެހެން ބުނެ ބިރު ދައްކާ ޖޫސްތައްޓެއް ދިނީ ކަމަށާއި އޭގެ ފަހުން އޭނާ މަޑުމަޑުން ހޭނެތެމުން ދިޔަ އިރު ހަތަރެސްފައި ބަންނަމުން ދިޔަކަން އެ ކުއްޖާއަށް އެނގޭ ކަމަށް ވެސް އެކުއްޖާގެ ބަޔާނާ ހަވާލާދީ "ރާއްޖެއެމްވީ" އަށް މައުލޫމާތު ލިބިފައިވެއެވެ.
އެކަން ހިނގާފައި ވަނީ މީގެ ދެ ހަފްތާ ވަރު ކުރިން ކަމަށާއި، އޭގެ ފަހުން ކުއްޖާ އަށް ވަރަށް ބޮޑަށް ނަފްސާނީ ގޮތުން އަސަރުކޮށްފައިވާ ކަމަށް ވެސް މައުލޫމާތު ލިބިފައިވެއެވެ. އެގޮތުން ދެ ފިރިހެނަކު އެއްތަނަކުން ފެނުނަސް ބިރުން ހަޅޭއް ލަވާ ކަމަށާއި، އަބަދު އެއްތަނަކަށް ބަލަހައްޓައިގެން މީހުންނާ ވާހަކަ ނުދައްކާ އިނދެ ރޮއެ ހަޅޭއް ލަވާ ހަދާ ކަމަށް ވެސް ވެއެވެ. އެކަންކަމުގައި އެ ކުއްޖާއަށް ރަށު ހޮސްޕިޓަލުގައި ބާއްވައިގެން ފަރުވާދެމުން ދިޔައިރު ވެސް އެއްވެސް މީހަކު ކުއްޖާއާ ގާތްވިޔަ ނުދޭ ކަމަށް ވެސް މައުލޫމާތު ލިބިފައިވެއެވެ.
މި މައްސަލައިގައި ފުލުހުން ބުނީ ނ، ރ، ބ، އަދި ޅ ހިމެނޭ ސަރަހައްދުގެ ރަށެއްގައި 18 އަހަރު ނުފުރޭ އަންހެން ކުއްޖަކަށް ޖިންސީ ގޯނާކުރި ކަމަށް ތުހުމަތުކުރެވޭ މައްސަލައެއް ތަހުގީގުކުރަމުންދާކަމަށެވެ. މި މަހުގެ 3 ވަނަ ދުވަހު ހިނގާފައިވާ އެ ހާދިސާ ރިޕޯޓްކުރީ މި މަހު 11 ގައި ކަމަށް ވެސް ފުލުހުން ބުނެފައިވެއެވެ.
