ތިން ރަށެއްގެ ނަރުދަމާގެ މަސައްކަތް ކުރަން އެންވަޔަރަމެންޓް މިނިސްޓްރީގެ ފަރާތުން ބަޔަކާ ހަވާލު ކޮށްފިއެވެ.

ނަރުދަމާގެ މަސައްކަތް ކުރިއަށް ގެންދިއުމަށް ހަމަޖެހިފައި ވަނީ އދ. ހަންޔާމީދޫ ، އދ. އޮމަދޫ އަދި ލ. މާވަށުގައެވެ. އެގޮތުން މި މަސައްކަތް ޙަވާލުކޮށްފައިވަނީ މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރްޑީސީ) އާއެވެ.

މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް އެންވަޔަރަންމަންޓް އެންޑް އެނަރޖީ، ޠާރިޤް އިބްރާހީމެވެ. އަދި އެމްއާރްޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ މުހައްމަދު ނިމާލެވެ.

މި ޕްރޮޖެކްޓުގެ ދަށުން މި ތިން ރަށުގެ ނަރުދަމާގެ ނެޓްވޯކާއި ޕަމްޕް ސްޓޭޝަންތަކާއި ، ސީ އައުޓްފޯލް އަދި ނަރުދަމާއާ ގުޅޭ ލޭބަރ މަސައްކަތްތައް ކުރިއަށް ގެންދެވޭނެއެވެ.

މީގެ އިތުރުން ރ. ރަސްމާދޫ، ރ. މާކުރަތު އަދި ފ. ފީއަލީގެ ނަރުދަމާ ނިޒާމުގެ މަސައްކަތް ކުރުމަށް އެމްއޯޔޫ ގައި ވަނީ ސޮއިކޮށްފައެވެ.

މި އެމްއޯޔޫ ގައި ސޮއިކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އާއި މިނސްޓްރީއާ ދެމެދުއެވެ.

 އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ އެންވަޔަރަންމަންޓް މިނިސްޓަރު ޠާރިޤް އިބްރާހީމެވެ. އަދި އެމްޓީސީސީ ފަރާތުން ސޮއިކުރެއްވީ އެ ކުންފުނީގެ ޑެޕިއުޓީ މެނޭޖިންގ ޑިރެކްޓަރ އަހުމަދު ކުރިކް ރިޒާއެވެ. މި ޕްރޮޖެކްޓުގެ ދަށުން މި ތިން ރަށުގެ ނަރުދަމާގެ ނެޓްވޯކާއި ޕަމްޕް ސްޓޭޝަންތަކާއި ، ސީ އައުޓްފޯލް އަދި ނަރުދަމާއާއި ގުޅޭ ލޭބަރ މަސައްކަތްތައް ކުރިއަށް ގެންދެވޭނެއެވެ.