ފަނޑިޔާރުންގެ މަޖިލީހުގެ ނިންމުމާއެކު، އަލީ ވަޙީދުގެ ޕާސްޕޯޓު ދޫކޮށްލި މައްސަލަ އަލުން ހައިކޯޓަށް
25 މާރިޗު 2021 | ބުރާސްފަތި 15:57ފަނޑިޔާރުންގެ މަޖިލީހުން ވަނީ އެ މައްސަލަ ބަލައިގަތުމުގެ ހުއްދަ ދިނުމަށް ނިންމާފައި
ކުރީގެ ޓުއަރިޒަމް މިނިސްޓަރ އަލީ ވަޙީދު- މިނިސްޓަރ އަލީ ވަޙީދުގެ ޕާސްޕޯޓު ދޫކޮށްލި މައްސަލަ އިސްތިއުނާފް ކުރީ 14 ފެބްރުއަރީގައި
ކުރީގެ ޓޫރިޒަމް މިނިސްޓަރ ޢަލީ ވަޙީދުގެ ޕާސްޕޯޓް ދޫކުރުމަށް ކްރިމިނަލް ކޯޓުން އަމުރު ނެރުމާއި ގުޅިގެން ޕްރޮސެކިއުޓަރ ޖެނެރަލް (ޕީޖީ) އޮފީހުން ހައިކޯޓުގައި އިސްތިއުނާފު ކުރަން ހުށައެޅި މައްސަލަ ބަލައިގަނެވޭނެކަމަށް ހައިކޯޓުގެ ފަނޑިޔާރުންގެ މަޖިލީހުން ނިންމައިފިއެވެ.
މި މައްސަލަ ޕީޖީ އޮފީހުން ހައިކޯޓުގައި އިސްތިއުނާފް ކުރީ ފެބްރުއަރީ މަހުގެ 14 ވަނަ ދުވަހުއެވެ. ނަމަވެސް އަމުރު ދޫކުރިކަމަށް މައުލޫމާތު ލިބުނު ވަގުތަށްވުރެ 48 ގަޑިއިރު ފަހުން ހުށައަޅާފައިވާތީ ހައިކޯޓުގެ ރަޖިސްޓްރާ އޭރު ވަނީ މި މައްސަލަ ބަލައިނުގަތުމަށް ނިންމަވައި، މައްސަލަ ބޭރުކޮށްލައްވާފައެވެ. އެއާއެކު އޭރު ޕީޖީ އޮފީހުން ވަނީ ރަޖިސްޓްރާގެ ނިންމެވުން ހައިކޯޓުގެ ފަނޑިޔާރުންގެ މަޖިލީހުގައި އިސްތިއުނާފް ކޮށްފައެވެ.
މި މައްސަލަ ބެލުމަށްފަހު ހައިކޯޓުގެ ފަނޑިޔާރުންގެ މަޖިލީހުން ވަނީ އެ މައްސަލަ ބަލައިގަތުމުގެ ހުއްދަ ދިނުމަށް ނިންމާފައެވެ. އަދި ޕީޖީ އޮފީހުން މިހާރު މި މައްސަލަ އަލުން ހައިކޯޓަށް ހުށައަޅާފައިވާކަމަށް ޕީޖީ އޮފީހުގެ އޮފިޝަލަކު ރާއްޖެއެމްވީއަށް މައުލޫމާތު ދެއްވާފައިވެއެވެ. އެކަމާ ގުޅޭގޮތުން ރާއްޖެއެމްވީއަށް މައުލޫމާތު ދެއްވަމުން ޕީޖީ އޮފީހުގެ އޮފިޝަލަކު ވިދާޅުވީ، އަލީ ވަޙީދުގެ ޕާސްޕޯޓު ހިފެހެއްޓުމަށް ނެރުނު އަމުރު ރަނގަޅުކަމަށް ހައިކޯޓުން ނިންމައިފިނަމަ، އަލީ ވަޙީދުގެ ޕާސްޕޯޓް ކެންސަލް ކުރާނެ ކަމަށެވެ.
ކުރީގެ ޓޫރިޒަމް މިނިސްޓަރ ޢަލީ ވަޙީދު ރާއްޖެއިން ބޭރަށް ފުރާވަޑައިގެންފައިވަނީ ޕާސްޕޯޓް ދޫކުރުމަށް ކްރިމިނަލް ކޯޓުން އަމުރު ނެރުމުގެ އެއް ދުވަސް ކުރިންނެވެ. އެގޮތުން 9 ފެބްރުއަރީގެ ރޭގެ 11:30 ހާއިރު އަލީ ވަޙީދު ފުރާފައިވާއިރު، ފުރަތަމަ ވަޑައިގެންނެވީވެސް ތުރުކީގެ ވެރިރަށް އިސްތަންބޫލަށްކަމަށް ރާއްޖެއެމްވީއަށް ވަނީ އެނގިފައެވެ. އެއާއެކު، ކޯޓުން އަމުރު ނެރުމުގެ ކުރިން އަލީ ވަޙީދު ފުރުވާލާފައިވަނީ ކޮން އުސޫލަކުންތޯ ވަނީ ސުވާލު އުފެދިފައެވެ. އަދި އަލީ ވަހީދު ފުރުވާލުމުގެ ފަހަތުގައި އެހެން ކަމެއް އުޅޭތޯވެސް ވަނީ ސުވާލު އުފެދިފައެވެ.
