އައު ސީޒަންގެ އިނގިރޭސި ޕްރިމިއަރ ލީގުގައި ޗެލްސީ އިން ކުޅުނު ދެ ވަނަ މެޗުގައި ވެސްޓް ހޭމް ޔުނައިޓެޑު އަތުން ބޮޑު މޮޅެއް ހޯދައިފި އެވެ.

ވެސްޓް ހޭމްގެ އަމިއްލަ ދަނޑުގައި ހުކުރު ދުވަހުގެ ރޭ ދަންވަރު ކުޅުނު މެޗު ޗެލްސީ އިން ކާމިޔާބު ކުރީ 5-1 އިންނެވެ. މެޗުގައި ވެސްޓް ހޭމް އިން ލަނޑު ޖަހައި ކުރި ހޯދާފައި ވަނިކޮށް، ޗެލްސީ އިން ވަނީ ފަހަތުން އަރައި ފަސް ލަނޑު ޖަހައިގެން މެޗުން މޮޅުވެފަ އެވެ.

މެޗު ފަށައިގެން ހަ ވަނަ މިނެޓުގައި ވެސްޓް ހޭމް އިން ވަނީ ލަނޑު ޖަހައި ލީޑު ނަގައިފަ އެވެ. މަލިކް ޑިއޯފް ތަނަވަސްކޮށްދިން ފުރުސަތެއްގައި ވެސްޓް ހޭމް އަށް ލީޑު ނަގައިދިނީ ލޫކަސް ޕަކޭޓާ އެވެ. ނަމަވެސް ވެސްޓް ހޭމް އަށް ލީޑު ގައި އޮވެވުނީ ނުވަ މިނެޓު އެވެ.

މެޗުގެ 15 ވަނަ މިނެޓުގައި ޗެލްސީ އިން ވަނީ ލަނޑު ޖަަހައި ލީޑު ނަގައިފަ އެވެ. މާކް ކުކުރޭލާ ތަނަވަަސްކޮށްދިން ފުރުސަތެއްގައި ޗެލްސީ އަށް ނަތީޖާ ހަމަހަމަ ކޮށްދިނީ ޔާއޯ ޕެޑްރޯ އެވެ. އޭގެ ފަހުން 23 ވަނަ މިނެޓުގައި ޕެޑްރޯ ނެޓޯ ވަނީ ޗެލްސީގެ ދެ ވަނަ ލަނޑު ޖަހައި އެ ޓީމަށް ލީޑު ހޯދައިދީފަ އެވެ.

މެޗުގެ ފުރަތަމަ ހާފު ނިމުމުގެ ކުރިން ޗެލްސީ އިން ވަނީ ތިން ވަނަ ލަނޑެއް ޖަހައި އިތުރަށް ލީޑު ފުޅާ ކޮށްފަ އެވެ. އެގޮތުން މެޗުގެ 34 ވަނަ މިނެޓުގައި ޗެލްސީ އަށް އެ ލަނޑު ޖަހައިދިނީ އާޖެންޓީނާގެ އެންޒޯ ފެނާންޑޭޒް އެވެ. އެއީ އެސްޓެވާއޯ ވިލިއަން ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގައި ޗެލްސީ އިން އެ ޓީމުގެ އަނެއް ދެ ލަނޑު ވެސް ޖެހީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން ނުވަ ވަނަ މިނެޓުގައި ޗެލްސީގެ ހަތަރު ވަނަ ލަނޑު ޖެހީ މޮއިސަސް ކަސޭޑޯ އެވެ. އޭގެ ހަތަރު މިނެޓު ފަހުން ޓްރެވާ ޗަލޯބާ ވަނީ ޗެލްސީގެ ފަސް ވަނަ ލަނޑު ޖަހައިފަ އެވެ.

ލީގުގައި ޗެލްސީ އިން ކުޅުނު ފުރަތަމަ މެޗުގައި އެ ޓީމު ވަނީ ކްރިސްޓަލް ޕެލަސް އަތުން އެއްވަރުވެފަ އެވެ. ލީގުގައި ޗެލްސީގެ ތިން ވަނަ މެޗުގައި އަމިއްލަ ދަނޑުގައި ފުލަމްއާ ދެކޮޅަށް ނިކުންނާނީ އޮގަސްޓު 30 ވަނަ ދުވަހު އެވެ.