ސިޓީ ކައުންސިލްގެ ހިންގުން ވަރުގަދަކުރެވޭނީ އެކަން އެމްޑީޕީއާ ހަވާލުކޮށްގެން: ރައީސް ނަޝީދު
އެމްޑީޕީއާ ދެކޮޅަށް ވާދަކުރައްވާ ޓީމަކީ ލާމަރުކަޒީ ނިޒާމާ މުޅިން ދެކޮޅު ބައެއް
މުހައްމަދު ނަޝީދު
މާލެ އަށް ދިމާވެފައިވާ މައްސަލަތައް ހައްލުކުރެވޭނީ މާލެ ސިޓީ ކައުންސިލްގެ ހިންގުން ރަނގަޅުކޮށް އެތަން ހަރުދަނާކޮށްގެން ކަމަށާއި އެކަން ކުރެވޭނީ އެމްޑީޕީއަށް ކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ރަށްވެހިފަތިސް ކެމްޕޭން ހަރަކާތްތަކުގެ ތެރެއިން މާފަންނު މެދު ދާއިރާގެ ކެމްޕޭން ޖަގަހަ ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން ރައީސް ނަޝީދު ވިދާޅުވީ މާލެ އަކީ މުޅި ދުނިޔޭގައިވެސް އެންމެ ގިނަ މީހުން އެއް އަކަމީޓަރުގައި ދިރިއުޅޭ ސަރަހައްދު ކަމަށެވެ. މާލޭގައި ބޯހިޔާވަހިކަމަށް ބޭނުންވެފައި ތިބި 17،000 އާއިލާ އެބަތިބި ކަމަށެވެ. އެ އާއިލާތައް ބެހިފައި ވަނީ ތިން ގިންތިއަށް ކަމަށާއި، އެއީ އިޖްތިމާއީ ގެދޮރުވެރިކަން މެދު އާމްދަނީގެ ގެދޮރުވެރިކަން އަދި އަތްފޯރާފަށުގައި ގެދޮރުވެރިކަން ބޭނުންވާ މީހުން ކަމަށް ވިދާޅުވިއެވެ.
ރައީސް ނަޝީދު ވިދާޅުވީ އިޖްތިމާއި ގެދޮރުވެރިކަން ބޭނުންވާ 3،000 އާއިލާ މާލެ ސަރަހައްދުގައި އެބަދިރިއުޅޭ ކަމަށާއި، އެ އާއިލާތަކުގެ ޖުމްލަ އާމްދަނީން 17،000 ރުފިޔާ ހަމަ ނުވާ ކަމަށެވެ. އެ އާއިލާތަކަށް އިޖްތިމާއީ ގެދޮރުވެރިކަން މަހުން މަހަށް ކުޑަ އަގެއްގައި ދައްކައިގެން ހާލާސްވާ ގޮތަށް ބޭނުންވެފައިވާކަން ރައީސް ނަޝީދު ފާހަގަކުރެއްވިއެވެ.
މީގެ އިތުރަށް ވެސް ހުރި ބައެއް މައްސަލަތައް ފާހަގަކުރައްވައި ރައީސް ނަޝީދު ވިދާޅުވީ ހައުސިން މިނިސްޓްރީ މިހާރު އެމްޑީޕީގެ ވަޒީރެއްގެ ދަށަށް ބަަދަލުކުރެވިފައިވާ ކަމަށާއި، ދެން ބޭނުންވަނީ ސިޓީ ކައުންސިލް ކަމަށެވެ. އެމްޑީޕީއާ ދެކޮޅަށް ވާދަކުރައްވާ ޓީމަކީ ލާމަރުކަޒީ ނިޒާމާ މުޅިން ދެކޮޅު ބައެއްކަން ފާހަގަކުރައްވައި ވިދާޅުވީ އެކަން ވާން އޮތީ ލާމަރުކަޒުކޮށް ސިޓީ ކައުންސިލްގެ ދަރުރު ބޮޑުކޮށްގެން ކަމަށެވެ.
އޭޕްރިލް 10 ވަނަ ދުވަހު އޮތް ލޯކަލް ކައުންސިލް އިންތިހާބަށް އެމްޑީޕީން ތައްޔާރުވަމުން އަންނައިރު އެޕާޓީގެ މައިގަނޑު ކެމްޕޭން ހަރަކާތްތައް ކުރިއަށް ގެންދަނީ އޮންލައިންކޮށެވެ. އެގޮތުން ކޮންމެ ރެއަކުހެން އަތޮޅުތެރޭގެ ކެންޑިޑޭޓުންނާއެކު ރައީސް އިބްރާހިމް މުހައްމަދު ސޯލިހާއި، ރައީސް ނަޝީދު އޮންލައިން ބައްދަލުވުންތައް ބާއްވަމުން އަންނައިރު މާލެ ސަރަހައްދުގައި މިހާތަނަށް ވަނީ ދެ ޖަގަހަ ހުޅުވާފައެވެ. އެގޮތުން ހުޅުމާލެ ދާއިރާއަށް ވާދަކުރައްވާ ކެންޑިޑޭޓް ރިޒްނާ ޒަރީރުގެ ކެމްޕޭން ޖަގަހަވެސް މީގެ ހަފްތާއެއްހާ ދުވަސްކުރިން ހުޅުވާފައިވާއިރު، އަންގާރަ ދުވަހު މި ވަނީ މާފަންނު މެދު ދާއިރާގެ ކެމްޕޭން ޖަގަހަވެސް ހުޅުވާފައެވެ.
އެ ރަސްމިއްޔާތުގައި ރައީސް ނަޝީދުގެ އިތުރަށް މާލެ ސިޓީގެ މޭޔަރުކަމަށް ވާދަކުރައްވާ ކެންޑިޑޭޓް އަނަސް އަބްދުއްސައްތާރުގެ އިތުރަށް މާފަންނު މެދު ދާއިރާގެ ކެންޑިޑޭޓް އަހުމަދު ރިޝްވާންވެސް ވަނީ ބައިވެރިވެވަޑައިގެންފައެވެ.
