ޓެކްސީ ޑްރައިވަރު ގާސިމްގެ މަރުގެ މައްސަލަ: އަދުހަމްގެ ބަންދު ދަމަހައްޓައިފި
އަދުހަމްގެ ބަލި ހާލަތާ ގުޅޭ ގޮތުން ސާފުކުރަންޖެހޭ ކަންތައްތައް ސާފުކުރުމަށް ދައުލަތަށް 10 ދުވަހުގެ މުހުލަތެއް ގާޒީ ދެއްވި
އަދުޙަމް މުހައްމަދު
ޓެކްސީ ޑްރައިވަރު، 59 އަހަރުގެ ގާސިމް ހަސަން މަރާލި މައްސަލާގައި، ގަސްދުގައި މީހަކު މެރުމުގެ ކުށުގެ ދައުވާ އުފުލާފައިވާ، ޅ. ހިންނަވަރު، ބޮޑުހިޔާގެ، އަދުހަމް މުހައްމަދުގެ ބަންދު ދެމެހެއްޓުމަށް ކްރިމިނަލް ކޯޓުން ނިންމައިފިއެވެ.
މި މައްސަލައިގައި އަންގާރަ ދުވަހު ކްރިމިނަލް ކޯޓުން ބާއްވާފައިވަނީ، އަދުހަމުގެ ބަންދު މުރާޖަޢާ ކުރުމަށް ބޭއްވި އަޑުއެހުމެކެވެ.
ކްރިމިނަލް ކޯޓުން އޮންލައިންކޮށް ބޭއްވި އަޑުއެހުމުގައި، އަދުހަމް ބުނެފައި ވަނީ، ފާހާނާ ތެރެއަށް ވެއްޓި އަތަށް އަނިޔާވެފައި ވާކަމަށާއި، އޭގެ ސަބަބުން ފާހާނާކޮށް ނިންމުމަށްފަހު ތާހިރުވުމަށް ވެސް ދަތިވާކަމަށެވެ.
މާފުށީ ޖަލުގައި ހުރެގެން ޝަރީއަތުގެ އަޑުއެހުމުގައި، އަދުހަމް ބައިވެރިވިއިރު، އޭނާގެ އަތުގައި ހުރީ ޕްލާސްރެއް ވެސް އަޅާފައެވެ.
އަތަށް ލިބިފައިވާ އަނިޔާގެ ސަބަބުން، އަދުހަމުގެ ބަންދަށް ލުއިދިނުމަށް، އޭނާގެ ފަރާތުން ދިފާއީ ވަކީލު އައިމިނަތު ރުކްޝާނާ ވެސް ޝަރީއަތުގައި އެދިލެއްވިއެވެ. ޝަރީއަތަށް އަދުހަމް އެއްބާރުލުން ދެމުންގެންދާކަން ފާހަގަކުރައްވަމުން ދިފާއީ ވަކީލު ވަނީ، ޝަރުތުތަކެއް ކުރުމަށްފަހުގައި ނަމަވެސް ބަންދަށް ލުއިތަކެއް ހަމަޖައްސަވައި ދެއްވުމަށް ޝަރީއަތުގައި އެދިލައްވާފައެވެ.
ދައުލަތުން މި މައްސަލައިގައި ބުނެފައިވަނީ، އަދުހަމު ބަންދުގައި ބެހެއްޓުމަށް ނިންމި ގާނޫނީ އަސާސް ދެމި އޮތް ކަމަށާއި، ބަދަލު ގެންނަން ޖެހޭ ހާލަތެއް އޮތްކަމަށް ނުފެންނަ ކަމަށެވެ. އަދުހަމުގެ އަތަށް ލިބިފައިވާ އަނިޔާއާ ގުޅޭގޮތުން ދައުލަތުން ބުނީ، ލިބިފައިވާ އަނިޔާ އެއީ ސީރިއަސް ކަމެއްކަމަށް ގަބޫލުކުރާ ކަމަށާއި، އޭގެ ސަބަބުން އަދުހަމަށް ބޭނުންވާ އެހީތެރިކަން ފޯރުކޮށްދިނުމަށް ކަރެކްޝަންގައި އަންގާރަ ދުވަހު އެދޭނެ ކަމަށެވެ.
އަޑުއެހުމުގައި ދެފަރާތުން ދެކެވުނު ވާހަކަތަކަށް ރިއާޔަތްކުރައްވާ ގާޒީ ވަނީ، އަދުހަމުގެ ބަލި ހާލަތާ ގުޅޭ ގޮތުން ސާފުކުރަންޖެހޭ ކަންތައްތައް ސާފުކުރުމަށް ދައުލަތަށް 10 ދުވަހުގެ މުހުލަތެއް ދެއްވާފައެވެ. ދެން އިތުރު އަޑުއެހުމެއް ބާއްވާނީ، ދައުލަތުން ސާފުކުރަންޖެހޭ ކަންތައްތައް ސާފުކޮށް ނިމުމުން ކަމަށް ގާޒީ ވިދާޅުވިއެވެ.
މި މައްސަލައިގައި ދައުވާ ރައްދުވާ އަދުހަމް ވަނީ، ތަހުގީގު މަރުހަލާގައި ދައުވާއަށް އިއުތިރާފުވެފައެވެ. އަދި އިބްތިދާއީ އަޑުއެހުމުގައި ވެސް ދައުވާއަށް އިއުތިރާފުވެ، އެއީ އޭނާ ގާސިމް މަރާލުމުގެ ގަސްތުގައި ދިން ހަމަލާއެއް ނޫންކަމަށް ބުނެފައިވެއެވެ. އެކަމަކު، ކުށަށް އިއުތިރާފުވުމުން ބޭއްވި އަވަސް ނިޔާގެ ޝަރީއަތުގެ އަޑުއެހުމުގައި، އޭނާ ފަހުން ވަނީ ދައުވާއަށް އިންކާރުކޮށްފައެވެ.
އެހެން ނަމަވެސް، އޭގެ ފަހުން ބޭއްވި އަޑުއެހުމުގައި، އަދުހަމްގެ ފަރާތުން ވަކާލާތު ކުރެއްވި ގާނޫނީ ވަކީލު ވިދާޅުވީ، އަދުހަމް ބޭނުންވަނީ، ޕީޖީއާއެކު ވެފައިވާ އިއުތިރާފުގެ އެއްބަސްވުމާއެކު، އަދަބު ލުއިވާނެ ގޮތަކަށް ކުރިއަށް ދިއުމަށް ކަމަށެވެ. އަދި އިއުތިރާފަށް އިންކާރުކުރި ޝަރީއަތުގައި، އޭނާ ދެއްކި ވާހަކަތަކާ ގުޅިގެން، އަޑުއެހުމުގައި ވާހަކަދައްކަން ބޭނުން ވާކަމަށެވެ.
އެހެންނަމަވެސް ދައުވާއަށް އަދުހަމް އިއުތިރާފުވުމަށްފަހު، ފަހުން ދައުވާއަށް އިންކާރުކޮށްފައިވާތީ، އެކަމާ ގުޅިގެން އިތުރަށް ވާހަކަ ދެއްކުމުގެ ފުރުސަތު، ގާޒީ ދެއްވާފައެއް ނުވެއެވެ. އަދި ދައުލަތުން ވެސް އެކަމާ ގުޅިގެން ބުނެފައިވަނީ، ދައުލަތުން ބޭނުންވަނީ، އަދުހަމާއެކު ކުރިންވެފައިވާ އިއުތިރާފުގެ އެއްބަސްވުން ބާތިލުކޮށް، ޝަރީޢަތުން ގޮތެއް ނިންމުމަށް ކަމަށެވެ.
ގާސިމް މަރާލާފައި އޮއްވާ ފެނިގެން ފުލުހުންނަށް ހުށަހަޅާފައިވަނީ 2019 ވަނައަހަރު ޑިސެންބަރު މަހުގެ ހަތަރު ވަނަ ދުވަހުގެ ރޭ 21:07 ހާއިރުއެވެ.
މި މައްސަލަ ތަހުގީގު ކުރުމަށްފަހު ފުލުހުން ބުނެފައިވަނީ، އަދުހަމަކީ މަސްތުވާތަކެތީގެ މައްސަލަތަކާއި ވައްކަމާއި، ފޭރުމާއި، މާރާމާރީގެ އިތުރުން ތަފާތު އެކިއެކި މައްސަލަތަކުގެ ރެކޯޑު އޮތް މީހެއް ކަމަށެވެ. އެގޮތުން ގާސިމް މަރާލި ދުވަހު ވެސް، އޭނާ މަސްތުވުމަށާއި ޒަރޫރީ އެކިއެކި ބޭނުންތަކަށް ފައިސާ ހޯދުމުގެ ގޮތުން ފޭރުމަށް މަސައްކަތްކުރިކަމަށް ފުލުހުން މައުލޫމާތުދީފައިވެއެވެ.
