މަނަދޫގައި ޓޫރިސްޓް ހޮޓާ ތަރައްގީކުރުމަށް ދެވަނަ ފަހަރަށް ހުޅުވާލައިފި

ނ. މަނަދޫގައި ޓޫރިސްޓް ހޮޓާ ތަރައްގީކުރުމަށް ދެވަނަ ފަހަރަށް ޓޫރިޒަމް މިނިސްޓްރީން ހުޅުވާލައިފިއެވެ.

ޓޫރިޒަމް މިނިސްޓްރީން ނެރެފައިވާ ބަޔާނެއްގައި ބުނެފައި ވަނީ ނ. މަނަދޫގައި ފަތުރުވެރިކަން ތަރައްގީކުރަން ކަނޑައަޅާފައިވާ 132,00 އަކަފޫޓުގެ ބިމުގައި ޓޫރިސްޓް ހޮޓަލެއް ތަރައްގީކޮށް ހިންގާނެ ފަރާތެއް ހޯދުމަށް 3 ފެބުރުވަރީ 2021 ކުރެވުނު އިޢުލާނަށް ހުށަހެޅުނު ބީލަންތަކުގައި ޝަރުތުހަމަވާ ފަރާތެއް ހިމެނިފައި ނުވާތީ ބީލަން އަލުން ހުޅުވާލުމަށް މިމިނިސްޓްރީން ނިންމާފައިވާ ކަމަށެވެ.

އެކަމަށް ޝައުގުވެރިވާ ފަރާތްތަކުން 29 މާރްޗުގެ މެންދުރު 01:00 ގައި މިނިސްޓްރީން ވަރޗުއަލްކޮށް ބާއްވާ މައުލޫމާތު ސާފުކުރުމުގެ ބައްދަލުވުމުގައި ބައިވެރިވެ، އޭޕްރިލް އަށް ވަނަ ދުވަހުގެ ހެނދުނު 10:00 އަށް މި މިނިސްޓްރީއަށް ހާޒިރުވެ ބީލަން ހުށަހެޅުމަށް މިނިިސްޓްރީން ވަނީ އަންގާފައެވެ.

ޓޫރިޒަމް މިނިސްޓްރީން ބުނީ މައުލޫމާތު ސާފުކުރުމުގެ ބައްދަލުވުމުގައި ބައިވެރިވާން ބޭނުންވާ ފަރާތްތަކުން މަރޗް 28ގެ މެންދުރު 2:00ގެ ކުރިން މިނިސްޓްރީގެ އީމެއިލް planning@tourism.gov.mv އަށް މައުލޫމާތު ސާފުކުރުމުގެ ބައްދަލުވުމުގައި ބައިވެރިވުމަށް އެދި ނަމާއި، އީމެއިލް އެޑްރެސް އަދި ގުޅޭނެ ނަންބަރެއް މެއިލް ކުރަންޖެހޭނެ ކަމަށެވެ. އަދި ބީލަން ފޮތް ގަތުމަށް ހުށަހަޅަން ޖެހޭ އެޕްލިކޭޝަން ފޯމް މިނިސްޓްރީގެ ވެބްސައިޓް، www.tourism.gov.mv އިން ލިބެން ހުންނާނެ ކަމަށް މިނިސްޓްރީގެ ބަޔާނުގައިވެއެވެ.

މިނިސްޓްރީން ބުނީ ބީލަން ފޮތް ލިބެން ހުންނާނީ މަރޗް 22 ވަނަ ދުވަހުން ފެށިގެން އޭޕްރިލް ހަ ވަނަ ދުވަހުގެ ނިޔަލަށް ބަންދުނޫން ކޮންމެ ދުވަހެއްގެ ހެނދުނު 09:00ން މެންދުރު 01:00 އާއި ދެމެދު ޓޫރިޒަމް މިނިސްޓްރީގެ ރިސެޕްޝަނުން ކަމަށެވެ. އަދި މިކަމާ ގުޅޭ އިތުރު މައުލޫމާތު ބޭނުންނަމަ އޭޕްރިލް ފަސް ވަނަ ދުވަހުގެ މެންދުރު 01:00 ގެ ކުރިން މިނިސްޓްރީގެ އަށް އީމެއިލް ކުރުމަށް ވަނީ ބުނެފައެވެ.