ހަތަރު މަހަށްފަހު އިންޑިއާގައި ކޮވިޑް-19 ކޭސްތައް އިތުރުވާން ފަށައިފިއެވެ.

ރޮއިޓަރސްގައި ރިޕޯޓު ކޮށްފައިވާ ގޮތުން ހޮނިހިރު ދުވަހުވެސް އިންޑިއާއިން 40،000ށް ވުރެ ގިނަ ކޭސް ރިޕޯޓު ކުރެވިފައިވެއެވެ. އޭގެ ތެރެއިންވެސް ގިނަ ކޭސްތައް ރިޕޯޓު ކޮށްފައިވަނީ އެ ޤައުމުގެ އިޤްތިސާދުގެ މައި ހަބްތައް ހިމެނޭ މަހަރާޝްތުރާއިންނެވެ.

މަހަރާޝްތުރާގެ އިތުރުން، ޕަންޖާބާއި، ގުޖްރާތު އަދި މަދިޔަ ޕްރަދޭޝްގައި ވެސް ކޮވިޑު ކޭސްތަކުގެ އަދަދު ވަނީ އިތުރުވެފައެވެ.

އޭގެ އިތުރުން، އިންޑިއާއިން އިތުރު 188 މީހަކު ވައިރަސް ޖެހިގެން މަރުވެފައިވާއިރު، މިހާތަނަށް އެ ޤައުމުން ބަލި ޖެހިގެން މަރުވި މީހުންގެ އަދަދު ވަނީ 159،404ށް އަރާފައެވެ. އިންޑިއާއަކީ އެމެރިކާއާއި ބްރެޒިލްގެ އިތުރުން، ދެން އެންމެ ގިނައިން ކޭސްތައް ރިޕޯޓު ކޮށްފައިވާ ޤައުމެވެ. އިންޑިއާއިން ފެންނަމުންދާ ކޭސްތައް އިތުރުވަމުން ދިއުމާއެކު އެ ޤައުމުގެ ބައެއް ސްޓޭޓުތަކުގައި މިހާރު ދަނީ ހަރުކަށި ފިޔަވަޅުތައްވެސް އަޅަމުންނެވެ. އެގޮތުން ބައެއް ސްޓޭޓުތަކުގައި ލޮކްޑައުން އިއުލާނު ކުރުމަށްވެސް ދަނީ މަޝްވަރާތައް ކުރެވެމުންނެވެ.

އިންޑިއާގެ ޑޮކްޓަރުންނާ ޙަވާލާދީ ރޮއިޓަރސްގައި ރިޕޯޓު ކޮށްފައިވާ ގޮތުން އިންޑިއާގައި ކޮވިޑު އައު ރާޅަކާއި ކުރިމަތިލާން ޖެހިފައިމިވަނީ އެ ޤައުމުގައި އަޅާފައިވާ ފިޔަވަޅުތަކަށް ރައްޔިތުން ފަރުވާ ކުޑަކުރުމުގެ ސަބަބުންނެވެ. އެގޮތުން މާސްކް އެޅުމާއި، ގައިދުރުކަން ދެމެހެއްޓުމަށް އެ ޤައުމުގައި އަޅާފައިވާ ފިޔަވަޅުތަކަށް ގިނަބަޔަކު ބޯލަނބަމުން ނުދާކަމަށް ޑޮކްޓަރުން ފާހަގަ ކުރެއެވެ.

މިދިޔަ އަހަރުގެ ސެޕްޓެމްބަރު މަހުގެ ތެރޭގައި އިންޑިއާގައި ކޮވިޑުގެ ފުރަތަމަ ރާޅު ކުރިމަތިލީއިރު، އޭރު ދުވާލެއްގެ މައްޗަށް ލައްކައިން ކޭސްތައް ރިޕޯޓު ކުރެވެމުން ދިޔައެވެ. ނަމަވެސް އޭގެ ފަހުން މަޑުމަޑުން ކޭސްތަކުގެ އަދަދު ދަށްވަމުންގޮސް، އަނެއްކާވެސް މިވަނީ ކޮވިޑުގެ އައު ރާޅެއް ކުރިމަތިވެފައިވާ ކަމުގެ ބިރު ހީވެފައެވެ.