އިންޑިއާގެ ރެޑް ފޯޓް ގައި ގޮއްވާލި ކާރުގެ ވެރިމީހާ ހައްޔަރު ކޮށްފި

އިންޑިއާގެ ވެރިރަށް ދިއްލީ ގައި ހޯމަ ދުވަހުގެ ހަވީރު ގޮއްވާލި ކާރުގެ ވެރިމީހާ ހައްޔަރު ކޮށްފި އެވެ.

ދިއްލީގެ އާބާދީ ބޮޑު ސަރަހައްދަކަށް ވުމުގެ އިތުރުން ތާރީހީ ރެޑް ފޯޓް ކައިރީގައި ހިނގި މި ހާދިސާ ގައި މަދުވެގެން 8 މީހުން މަރުވެފައި ކަމަށް ސިޓީ ފުލުހުންގެ ތަރުޖަމާނަކު ވަނީ ހާމަ ކޮށްފަ އެވެ.

މި ހާދިސާ ގައި ގޮއްވާލި ކާރުގެ ވެރިފަރާތް ހައްޔަރުކޮށްފައިވާ ކަމަށް އިންޑިއާ ގެ ބްރޯޑްކާސްޓަރު އެންޑީޓީވީން ވަނީ ރިޕޯޓު ކޮށްފަ އެވެ.

އިންޑިއާ ގައި ލާލް ގިލާ ގެ ނަމުން މަޝްހޫރު ރެޑް ފޯޓަކީ، ފާރިސީ އަދި އިންޑިއާ ގެ ފަރުމާވެރިކަމުގެ ސްޓައިލްތައް ހިމަނައިގެން 17 ވަނަ ގަރުނުގައި މުޣުލް ޒަމާނުގައި ބިނާ ކޮށްފައިވާ މަގްބޫލު ތަނެކެވެ. އެއީ، އަހަރުތެރޭގައި ހުރިހާ ދުވަހެއްގައި ވެސް ގިނަ އަދަދެއްގެ ޓޫރިސްޓުން ޒިޔާރަތް ކުރާ ތަނެކެވެ.

ފުލުހުން ބުނާގޮތުގައި ހާދިސާ ގައި މަރުވި މީހުން ދެނެގަތުމުގެ މަސައްކަތް ކުރަމުންދާ ކަމަށެވެ. އެ ގޮތުން 6 ހަށިގަނޑެއް ދެނެގަނެފައިވާ ކަމަށް އޮފިޝަލަކު ވަނީ ހާމަ ކޮށްފަ އެވެ.

"އަޅުގަނޑުމެންނަށް ހަ ހަށިގަނޑެއް ދެނެގަނެފައިވާ އިރު، ފަސް ހަށިގަނޑެއްގެ ޕޯސްޓްމޯޓަމް ވެސް ވަނީ ފުރިހަމަ ކޮށްފަ،" އޮފިޝަލް ރާޖާ ބަންތިއާ އަންގާރަ ދުވަހު ނޫސްވެރިންނަށް ވިދާޅުވި އެވެ. "ޒަހަމްވި މީހުންނަށް ފަރުވާދެމުން އެބަދެއެވެ"

އިންޑިއާގެ ޑިފެންސް މިނިސްޓަރު ރަޖްނާތު ސިންގް ވިދާޅުވެފައި ވަނީ ހޯމަ ދުވަހު ދިއްލީގައި ހިނގި ހާދިސާ ތަހުގީގު އެންމެ މަތީ ލެވެލް ގައި ކުރިއަށް ގެންދާ ކަމަށެވެ.

ހޯމް މިނިސްޓަރު އަމިތު ޝާހް ވަނީ މަތީ ފެންވަރުގެ ސަލާމަތީ ރިވިއު ބައްދަލުވުމެއް ރިޔާސަތު ބަލަހައްޓަވާފަ އެވެ.

ހާދިސާގެ ޚުލާސާ:

• ހޯމަ ދުވަހުގެ ހަވީރު ދިއްލީގެ ރެޑް ފޯޓް ކައިރީގައި އެތަނުގެ ގަޑިން 18:52 (ޖީއެމްޓީ 13:22) ގައި ކާރެއް ގޮއްވާލުމުގެ ސަބަބުން 8 މީހުން މަރުވި.
• ހާދިސާގައި ގާތްގަނޑަކަށް 20 މީހުން ޒަޚަމްވެ ހޮސްޕިޓަލްތަތަކުގައި ފަރުވާ ދެމުންދޭ.
• ކޮންމެ ދުވަހަކު އެތައް ހާސް ފަތުރުވެރިން ޒިޔާރަތްކުރާ 17 ވަނަ ޤަރުނުގެ މި ތާރީޚީ ސަރަހައްދު މިހާރު ވަނީ 3 ދުވަހަށް ބަންދުކޮށްފައި. ސަރަހައްދުގެ އެއްގަމު ދަތުރުފަތުރު ކުރުމުގައި ވެސް ހަރުކަށި ފިޔަވަޅުތައް ވަނީ އަޅާފައި.
• ދިއްލީގެ ޕޮލިސް ކޮމިޝަނަރު ވިދާޅުވި ގޮތުގައި ގޮއްވާލީ މަޑުން ދުއްވަމުންދިޔަ ކާރެއް ޓްރެފިކް ސިގްނަލެއްގައި މަޑު ކޮށްލި ވަގުތުގައި.
• ދިއްލީ ފުލުހުންގެ އޮފިޝަލް ރާޖާ ބަންތިއާ ނޫސްވެރިންނަށް ވިދާޅުވި ގޮތުގައި ގޮއްވާލުން ހިނގި ސަރަޙައްދުން އަދި ގޮވި އެއްޗެއްގެ ބައިތައް ފެނިފައެއް ނުވޭ.
• ގޮއްވާލުން ހިނގި ސަބަބާމެދު އަދި ރަސްމީ ކޮށް އެއްވެސް އެއްޗެއް ހާމަ ކޮށްފަ އެއް ނުވޭ - ހޯމް މިނިސްޓަރ ޝާހް އަދި އެހެނިހެން އިސްވެރިން ވިދާޅުވެފައި ވަނީ "ހުރިހާ ގޮތްތަކެއް ބަލަމުންގެންދާ" ކަމަށް.
• ދިއްލީ އާއި ދިއްލީ އާއި އިން ވެގެން ހުރި ބައެއް ސަރަހައްދުތަކުގައި ސަލާމަތީ ފިޔަވަޅުތައް ވަރަށް ވަރުގަދަ ކޮށްފައި ވޭ.