މަތީ ތައުލީމާއި ތަމްރީނު ހޯދުމަށް އެދިފައިވާ ދަރިވަރުންގެ އެޕްލިކޭޝަންތައް ވަޒަންކުރާނީ އެއްވެސް ސިޔާސީ ނުފޫޒެއް ނެތި - މިނިސްޓަރ
މިއީ މި ސަރުކާރުން މަތީ ތައުލީމުގެ ލޯނަށް އެންމެ ގިނަ ފުރުސަތު ހުޅުވާލި ފަހަރު
މިނިސްޓަރ އޮފް ހަޔަރ އެޑިއުކޭޝަން ޑރ. އިބްރާހިމް ހަސަން
މަތީ ތައުލީމާއި ތަމްރީނު ހޯދުމަށް އެދި ލޯނުގެ ފުރުސަތަށް ކުރިމަތިލި 1176 ދަރިވަރުންގެ އެޕްލިކޭޝަންތައް ހަޔަރ އެޑިޔުކޭޝަން މިނިސްޓްރީގެ މުވައްޒަފުން ވަޒަންކުރާނީ ތެދުވެރިކަމާއި އިހުލާސްތެރިކަމާއި އެކު ގެޒެޓްކުރެވިފައިވާ އުސޫލާއި އެއްގޮތްވާގޮތުގެ މަތިން އެއްވެސް ސިޔާސީ ނުފޫޒެއް ނެތި ކަމަށް މިނިސްޓަރ އޮފް ހަޔަރ އެޑިއުކޭޝަން ޑރ. އިބްރާހިމް ހަސަން ވިދާޅުވެއްޖެއެވެ.
ރާއްޖެއާއި ރާއްޖެއިން ބޭރުން މަތީ ތައުލީމް ހާސިލްކުރުމަށް ސަރުކާރުން ދޭ ލޯނަށް ހުށަހެޅުމުގެ ފުރުސަތު ހުޅުވާލާފައި ވަނީ ފެބްރުއަރީ މަހުގެ 11 ވަނަ ދުވަހުއެވެ. 770 ކުދިންނަށް ލޯނު ދޫކުރުމަށް ހަމަޖައްސާފައިވާއިރު ހަޔަރ އެޑިއުކޭޝަން މިނިސްޓަރ ޑރ. އިބްރާހިމް ހަސަން ވިދާޅުވީ މިއީ މި ސަރުކާރުން މަތީ ތައުލީމުގެ ލޯނަށް އެންމެ ގިނަ ފުރުސަތު ހުޅުވާލި ފަހަރު ކަމަށެވެ. މިނިސްޓަރ ވިދާޅުވީ ތައުލީމީ ޒުވާން ޖީލެއް ބިނާކުރަން މި ސަރުކާރުން ގިނަ މަސައްކަތްތަކެއް ކުރަމުން އަންނަ އިރު އެންމެ ދެކިވަޑައިގަންނަވަން ބޭނުންފުޅުވަނީ މަތީ ތައުލީމު ހާސިލްކޮށްގެން ދިވެހި ދަރިން ރާއްޖެއަށް ޚިދުމަތްކޮށްދޭ މަންޒަރު ކަމަށެވެ.
ލޯނަށް ހުޅުވާލި 770 ޖާގައިގެ ތެރެއިން 299 ޖާގަ އަކީ އަލަށް ކިޔަވަން ފަށާ ކުދިންނަށް ހާއްސަކޮށްފައިވާ ފުރުސަތުތަކެއް ކަމަށެވެ. އަދި ބާކީ 471 ފުރުސަތަކީ މިހާރު ވެސް ތައުލީމް ހާސިލްކުރަމުން އަންނަ ދަރިވަރުންނަށް ރިޒާވްކޮށްފައިވާ ޖާގަތަކެއް ކަމަށް މިނިސްޓަރ ވިދާޅުވިއެވެ. މި ފުރުސަތު މާޗު މަހުގެ 4 ވަނަ ދުވަހަށް ހަމަވެފައިވާއިރު މި ލޯނުގެ ފުރުސަތުގައި ނުކުޅެދުންތެރިކަން ހުންނަ ދަރިވަރުންނާއި ޚާއްސަ އެހީއަށް ބޭނުންވާ ދަރިވަރުންނަށް ޚާއްސަ ކެޓެގަރީއެއް ވަނީ ހިމަނާފައެވެ.
ސްޓޫޑެންޓް ލޯން އެންމެ ފަހުން ދޫކޮށްފައިވަނީ މިދިޔަ އަހަރުގެ ޖޫން މަހުގެ ތެރޭގައެވެ. އެފަހަރު އެކި ދާއިރާތަކުން ކިޔެވުމަށްޓަކައި ޖުމްލަ 514 ދަރިވަރަކަށް ލޯން ދޫކޮށްފައިވާއިރު އެއީ 151 މިލިޔަން ރުފިޔާއެވެ.
