ފުޅާވަމުން އަންނަ ރަށު ފަތުރުވެރިކަމަށް އެކަށޭނަ އިންޖީނުގެއެއް ރަސްދޫގައި ޤާއިމުކުރަނީ
20 މާރިޗު 2021 | ހޮނިހިރު 00:12މިވަގުތު ރަސްދޫގައި ހުރީ 754 ކިލޯވޮޓްގެ އިންޖީނުގެއެއް
އއ. ރަސްދޫ އައު އިންޖީނުގޭގެ ބިންގާ އެޅުން
އއ. ރަސްދޫގައި ފުޅާވަމުން އަންނަ ރަށު ފަތުރުވެރިކަމަށް އެކަށޭނަ އިންޖީނުގެއެއް ޤާއިމުކުރުމަށް ބިންގާއަޅައިފިއެވެ.
ރަސްދޫގައި އަޅާ އިންޖީނުގެއަކީ 5 މެގަވޮޓް ކެޕޭސިޓީއެއް ގާއިމް ކުރެވޭގޮތަށް އަޅާ ރާއްޖޭގެ އެންމެ ފެންވަރު ރަނގަޅު އިންޖީނުގެތަކުގެ ތެރޭގައި ހިމެނިގެންދާނެ ޒަމާނީ އިންޖީނުގެ އެއްކަމަށް އެރަށުގައި ކަރަންޓުގެ ޚިދުމަތްދޭ ސްޓެލްކޯއިން ބުނެއެވެ. އއ. ރަސްދޫއަކީ ދިވެހި ރާއްޖޭގެ ލޯކަލް ޓުއަރިޒަމްގެ މަޝްހޫރު ނަމެއްކަމުގައިވާއިރު، އެކި ފަންތިއާއި ގިންތީގެ ގެސްޓްހައުސްތައް ހިންގަމުން ގެންދާ ރަސްދޫއަށް އަންނަމުންދާ ތަރައްގީއާއި އެއްވަރަށް އައި ރަސްދޫގެ މަތިވަމުންދާ ލޯޑަށް ކޭޓާ ކުރުމަށްޓަކައި ސްޓެލްކޯއިން އަބަދުވެސް އަންނަނީ ގިނަ މަސައްކަތްތަކެއް ކުރަމުންކަމަށް އެކުންފުނިން ބުނެއެވެ. އެގޮތުން މިވަގުތު ރަސްދޫގައި 754 ކިލޯވޮޓްގެ އިންޖީނުގެއެއް ހިންގަމުން އަންނަ އިރު، އެ އިންޖީނުގެއަކީ ކުރިޔަށް އޮތްތަނުގައި ރަސްދޫއަށް ބޭނުންވާ ކަރަންޓު ފޯރުކޮށްދެވޭ ވަރަށްވުރެ ޖާގައިގެ ގޮތުން ކުޑަ ތަނެއްކަމަށް ސްޓެލްކޯއިން ފާހަގަކުރިއެވެ.
މުސްތަގުބަލުގައި ރަށަށް އަންނާނެ ކުރިއެރުމާއި، ތަރައްގީއަށް އަދި ދުރު މުސްތަގުބަލަށް ވިސްނާ، 5 މެގަވޮޓްގެ އާއިންޖީނުގެއެއް އެޅުމުގެ މަސައްކަތްފެށީ މި ސަބަބައްޓަކައިކަމަށް ސްޓެލްކޯއިން ވަނީ ބުނެފައެވެ. މި އިންޖީނުގެ އިމާރާތް ކުރެވޭނީ ހިދުމަތައް ބުރޫ ނާރާގޮތަށް މިހާރުގެ އިންޖީނުގެ ހުރިތަނުގައިއެވެ. ރަސްދޫގައި އަލަށް އިމާރާތް ކުރާ އިންޖީނުގެ އަކީ ޒަމާނުއްސުރެ އިންޖީނުގެތަކާއި މެދު ދެކެމުން އައި ގޮތް ބަދަލުކޮއްލާ، ރަށުގެ ރީތި ނަލަ ލޭންޑް މާކަކަށް ވެގެންދާނެކަމަށް ސްޓެލްކޯއިން ބުނެއެވެ. އަދި ވެންޓިލޭޝަން ރަނގަޅު، އުސްކޮށް އިމާރާތް ކުރެވޭ ޒަމާނީ ފެންވަރުގެ ތަނަކަށްވެގެންދާނެކަމަށްވެސް ސްޓެލްކޯއިން ބުނެއެވެ. މީގެ އިތުރުން މި އައު އިންޖީނުގެ ވެގެންދާނީ، އަޑު މަޑު، ތިމާވެއްޓާއި ރައްޓެހި ތަނަކަށެވެ. އިންޖީނުގެއަށް ބޭނުންވާ ކަރަންޓު އުފައްދައިދޭނީ އިންޖީނުގޭގައި ހަރުކުރާ ސޯލާ ޕެނަލްތަކުންނެވެ. މީގެ އިތުރުން އޮންލައިން މޮނިޓަރިންގ އާއި، ޓެކްނިކަލް ސަޕޯޓްގެ އިތުރުން، އައު އިންޖީނުގެ ވެގެންދާނީ މުވައްޒަފުންނަށް ރައްކާތެރި މަސައްކަތުގެ މާހައުލަކަށް ހަދާނެކަމަށް ސްޓެލްކޯއިމް ވަނީ ބުނެފައެވެ.
