ނެގި ރެންޑަމް ސާމްޕަލަކުން މީހަކު ޕޮޒިޓިވްވެ، ރ. އުނގޫފާރު މޮނީޓަރިންގއަށް
19 މާރިޗު 2021 | ހުކުރު 17:33ޕޮޒިޓިވްވެފައިވަނީ އުމުރުން ދުވަސްވީ އަންހެނެއް
ރ. އުނގޫފާރު ރީޖަނަލް ހޮސްޕިޓަލް
ރ. އުނގޫފާރުން ނެގި ރެންޑަމް ސާމްޕަލަކުން މީހަކު ޕޮޒިޓިވްވެ، އެރަށް މޮނީޓަރިންގގެ ހާލަތަށް ގެނެސްފިއެވެ.
ރާއްޖެއެމްވީއަށް މައުލޫމާތު ދެއްވަމުން ރ. އުނގޫފާރު ކައުންސިލްގެ ރައީސް އަބްދުއް ނާސިރު އަލީ ވިދާޅުވީ ނެގި ރެންޑަމް ސާމްޕަލުން ޕޮޒިޓިވްވެފައިވަނީ އުމުރުން ދުވަސްވީ އަންހެނެއް ކަމަށެވެ. އަބްދުއް ނާސިރު އަލީ ވިދާޅުވީ އެ އަންހެން މީހާއަކީ މީގެ އެއް ހަފްތާ ކުރިން މާލެއަށްވެސް ދިޔަ މީހެއްކަމަށާއި އެހެންނަމަވެސް މިހާރު ހުރީ ހޯމް ކަރަންޓީނުގައި ކަމަށެވެ.
ރ. އުނގޫފާރު މޮނީޓަރިންގގެ ހާލަތަށް ގެނެސްފައިވާއިރު މިދިޔަ އަހަރުގެ އޮކްޓޯބަރުމަހުގެ ތެރޭގައިވެސް ނެގި ރެންޑަމް ސާމްޕަލަކުން މީހަކު ޕޮޒިޓިވްވެ އެ ރަށް ވަނީ މޮނީޓަރިންގއަށް ލާފައެވެ.
ރަށެއް މޮނީޓަރިންގގެ ހާލަތަށް ގެނެސްފިނަމަ ރަށުގައި ތިބޭ މީހުން ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ވަކިގޮތެއް އަންގަންދެން ރަށުން ފޭބުމާއި ހުއްދަނެތި އެއްވެސް މީހަކު ރަށަށް އެރުމަކީ މަނާ ކަމެކެވެ.
ރާއްޖޭގެ ރަށްތަކުން ފެންނަ ޕޮޒިޓިވް ކޭސްތަކުގެ އަދަދު އިތުރުވަމުން އަންނައިރު މާލެ ސަރަހައްދުންވެސް ވައިރަސްއަށް ޕޮޒިޓިވްވާ މީހުންގެ އަދަދު އިތުރުކަން ފާހަގަކޮށްލެވެއެވެ. ރާއްޖެއިން މިހާތަނަށް ޖުމްލަ 22،292 މީހުންނަށް ކޮވިޑް ޖެހިފައިވާއިރު މި ވައިރަސް ޖެހިގެން 65 މީހަކު ވަނީ ނިޔާވެފައެވެ.
