ޓެންޒޭނިއާގެ 6 ވަނަ ރައީސަކަށް އަންހެން ކަނބަލެއް

ޓެންޒޭނިއާގެ 6 ވަނަ ރައީސް ކަމުގެ ހުވާ އަންހެން ބޭކަނބަލަކު ކުރައްވައިފިއެވެ.

ޓެންޒޭނިއާގެ ރައީސް ޖޯން މަގުފުލީ އަވަހާރަވުމާ ގުޅިގެން ހުކުރު ދުވަހު އެ މަޤާމުގެ ހުވާ ކުރައްވާފައިވަނީ އެ ގައުމުގެ ނާއިބު ރައީސާ ސަމީއާ ސުލޫހް ޙަސަންއެވެ. އޭނާ މަޝްހޫރުވެފައި އޮންނަނީ "މަމާ ސަމީއާ" ގެ ނަމުންނެވެ. ސަމީއާއަކީ 2015 ވަނަ އަހަރު މަގުފުލީގެ ރަނިންގ މޭޓެވެ. އަދި މަގުފުލީގެ ދައުރުގެ ބާކީ އޮތް މުއްދަތު ފުރިހަމަ ކުރައްވާނީ ސަމީއާކަމަށް ރިޕޯޓުތައް ބުނެއެވެ.

މަގުފުލީ އަވަހާރަވެއްޖެކަން ބުދަދުވަހު އިއުލާނު ކުރެއްވީ ވެސް ސާމިއާ ސުލުހޫ ހަސަންއެވެ. އެގައުމުގެ ރަސްމީ ޓީވީ މެދުވެރިކޮށް މިކަން އިއުލާން ކުރައްވަމުން، އޭނާ ވިދާޅުވީ، އުމުރުފުޅުން 61 އަހަރުގައި މަގުފުލީ އަވަހާރަވެފައިވަނީ ހިތްޕުޅުގެ އާލާސްކަންފުޅެއްގައި ކަމަށެވެ. މިކަމަށް މަގުފުލީ ފަރުވާ ހޯއްދަވަމުން ގެންދަވާތާ ދިހަ އަހަރު ވެއްޖެއެވެ. މިހަފުތާގެ އާދީއްތަ ދުވަހުން ފެށިގެން ދާރުއްސަލާމްގައި ހުންނަ ހޮސްޕިޓަލެއްގައި އޭނާ ވަނީ އެޑްމިޓް ވެސް ކުރެވިފައެވެ.

ރައީސް އަވަހާރަވުމާ ގުޅިގެން އޭރު ސަމީއާ ވަނީ، ގައުމީ ހިތާމައިގެ 14 ދުވަސް އިއުލާނު ކުރައްވާފައެވެ. ސަމީއާ ވެގެންގޮސްފައި މިވަނީ ޓެންޒޭނިއާގެ ފުރަތަމަ އަންހެން ރައީސާ އަށެވެ. އަދި އޭނާއަކީ އެފްރިކާގެ އިރުމަތީ ބިތުގެ ގައުމެއްގައި ރައީސްކަން ކުރައްވާ ފުރަތަމަ އަންހެން ލީޑަރު ވެސް މެއެވެ.

މަގުފުލީ އަވަހާރަވެފައި މިވަނީ، ފެބްރުއަރީ މަހުގެ 27 ވަނަ ދުވަހުން ފެށިގެން މަގުފުލީ ފެނިފައި ނުވާތީ، އޭނާ އާލާސްކަންފުޅާއި އުޅުއްވާކަމަށާއި، ގައުމުން ބޭރުގައި ފަރުވާ ހޯއްދަވަމުން ގެންދަވާކަމުގެ ޚަބަރުތަކުގެ އަޑުގަދަވެފައި ވަނިކޮށެވެ.