ގަމުގައި ހިނގި ނުރައްކާތެރި އެކްސިޑެންޓްގައި އަނިޔާވި އަންހެން މީހާއަށް ފަރުވާ ދެމުންދަނިކޮށް ނިޔާވެއްޖެ

ލ.ގަމުގައި ހިނގި ނުރައްކާތެރި އެކްސިޑެންޓްގައި އަނިޔާވި އަންހެން މީހާއަށް ފަރުވާ ދެމުންދަނިކޮށް ނިޔާވެއްޖެއެވެ.

މިއެކްސިޑެންޓްގައި ނިޔާވީ ގަމު، ވެލަބުލިއާގެ އުމުރުން 55 އަހަރުގެ ފާތިމަތު މަނިކެއެވެ.

މިނުރައްކާތެރި އެކްސިޑެންޓް ހިނގާފައިވަނީ މިމަހުގެ 14 ވަނަ ދުވަހުއެވެ. އެއަންހެން މީހާ ނިޔާވީ ލިބުނު އަނިޔާތަކަށް އޭޑީކޭ ހޮސްޕިޓަލުގެ އައިސީޔޫގައި ފަރުވާ ދެމުންދަނިކޮށް ބުރާސްފަތި ދުވަހުގެ ރޭގެ ދަންވަރުގެ ވަގުތުގައެވެ.

މައުލޫމާތު ލިބިފައިވާ ގޮތުގައި މި އެކްސިޑެންޓް ހިނގީ އެ އަންހެން މީހާ، އޭނާގެ ފިރިމީހާއާ އެކު ސައިކަލުގައި ދަނިކޮށް އެހެން ސައިކަލެއްގައި ޖެހިގެން ކަމަށެވެ. އެކްސިޑެންޓު ވި އަނެއް ސައިކަލުގައި އިން އަންހެން މީހާއަށް ފަރުވާ ދިނުމަށްފަހު މިހާރު ވަނީ ދޫކޮށްލާފައެވެ.

މިހާރަކަށް އައިސް ނުރައްކާތެރި އެކްސިޑެންޓް ހިނގުން ދަނީ އާއްމުވަމުންނެވެ. އެގޮތުން ބުރާސްފަތި ދުވަހުގެ އައްޑޫ ސިޓީ ލިންކް ރޯޑުގައި ހިނގި ނުރައްކާތެރި އެކްސިޑެންޓެއްގައި އަންހެނަކު ނިޔާވެފައިވެއެވެ. އަދި ފެބްރުއަރީ މަހުގެ 27 ވަނަ ދުވަހު ފުވައްމުލަކުސިޓީގައި ހިނގި ނުރައްކާތެރި ކާރު އެކްސިޑެންޓެއްގައި ދެޒުވާނަކު ވެސް ވަނީ ނިޔާވެފައެވެ.