ހުޅުމާލެ ފޭސް 2 ނިކަގަސްމަގުގައި ދެ ސައިކަލު ޖެހިގެން ހިނގި އެކްސިޑެންޓުގައި ކ. ދިއްފުށި، ލައިޓްގާޑެން، އިސްމާއިލް ރަޔާން ބިން ނާޒިމް ނިޔާވެއްޖެ
ފޭސް 2 ގައި އެކްސިޑެންޓުވި 2 ސައިކަލުގެ ތެރެއިން 1 ސައިކަލު، މި ހާދިސާގައި ޒުވާނަކު ވަނީ ނިޔާވެފައި
ހުޅުމާލެ ފޭސް 2 ގައި ހޯމަ ދުވަހުގެ ރޭ ހިނގި ނުރައްކާތެރި އެކްސިޑެންޓެއްގައި 19 އަހަރުގެ ޒުވާނަކު ނިޔާވެއްޖެއެވެ.
މި އެކްސިޑެންޓްގައި ނިޔާވެފައިވަނީ ކ. ދިއްފުށި، ލައިޓްގާޑެން، އިސްމާއިލް ރަޔާން ބިން ނާޒިމް އެވެ. މި ހާދިސާއަކީ ދެ ސައިކަލު ޖެހިގެން ހިނގި އެކްސިޑެންޓެއްކަން ފުލުހުން ހާމަކޮށްފައި ވެއެވެ.
ފުލުހުން މީޑިއާތަކާ ހިއްސާކުރި މައުލޫމާތުގައި ބުނެފައިވަނީ، މި އެކްސިޑެންޓު ހިނގީ ހުޅުމާލެ ފޭސް 2 ނިކަގަސްމަގުގައި ކަމަށެވެ. ދެ ސައިކަލު ޖެހިގެން ހިނގި މި ހާދިސާގައި ޖުމްލަ ތިން މީހަކަށް އަނިޔާވެފައިވާ ކަމަށް ފުލުހުން ބުނެފައި ވެއެވެ.
އެކްސިޑެންޓުގައި އަނިޔާވި މީހުން ފަރުވާއަށް ހޮސްޕިޓަލަށް ގެންދިޔަ ކަމަށާއި، އެ ތަނުން އެކަކަށް ފަރުވާދެމުން އަންނަނިކޮށް ނިޔާވެފައިވާ ކަމަށް ހޮސްޕިޓަލާ ހަވާލާދީ ފުލުހުން ހާމަކުރިއެވެ.
މި އެކްސިޑެންޓާ ގުޅިގެން މީސް މީޑިއާގައި ދައުރުވަމުން އަންނަ ފޮޓޯތަކުން ފެންނަ ގޮތުން، އެކްސިޑެންޓުގައި ދެ ސައިކަލަށް ވެސް ބޮޑެތި ގެއްލުންތަކެއް ލިބިފައިވެއެވެ.
މި ހާދިސާއާ ގުޅިގެން ފުލުހުން ތަހުގީގު ކުރަމުން އަންނަ ކަމަށާއި، އިތުރު ތަފްސީލު ހާމަކުރައްވާނެ ކަމަށް ފުލުހުން ބުނެފައިވެއެވެ.
