ތިނަދޫ ސިޓީގައި މަގު ހުރަސްކުރި ހަ އަހަރުގެ ކުއްޖެއް ގައިގައި ސައިކަލުން ޖެހި ފަރުވާ ދެނީ
ސައިކަލު ދުއްވި 21 އަހަރުގެ ފިރިހެނަކު ފުލުހުންގެ ބެލުމުގެ ދަށަށް ވަނީ ގެނެސްފައި
ތިނަދޫ ސިޓީގައި ހިނގި ނުރައްކާތެރި އެކްސިޑެންޓު ފެންނަ ވީޑިއޯގެ ސްކްރީން ޝޮޓެއް
ތިނަދޫ ސިޓީގައި މަގު ހުރަސްކުރި ހަ އަހަރުގެ ކުއްޖެއް ގައިގައި ސައިކަލުން ޖެހި ފަރުވާ ދޭން ފަށައިފިއެވެ.
ފުލުހުން ބުނީ، ތިނަދޫ ސިޓީ އާބާދީ ހިނގުމުން ހުޅަނގުން އިރަށް ބާރު ސްޕީޑުގައި ދުއްވާފައި ދިޔަ ސައިކަލެއް ކޮންޓްރޯލް ނުވެ ގޮސް ދުވެފައި މަގު ހުރަސްކުރި ކުޑަކުއްޖެއްގެ ގައިގައި ޖެހި އެކްސިޑެންޓްވެފައިވާ މައްސަލަ ހޮނިހިރު ދުވަހު އިރުއޮއްސި 18:16 ހާއިރު ރިޕޯޓްކޮށްފައިވާ ކަމަށެވެ.
މި އެކްސިޑެންޓުގައި އެކްސިޑެންޓްގައި މަގު ހުރަސްކުރި އުމުރުން ހަ އަހަރުގެ ފިރިހެން ކުއްޖާއަށް އަނިޔާވެގެން ޑރ. އަބްދުއްސަމަދު މެމޯރިއަލް ހޮސްޕިޓަލްގައި ފަރުވާ ދެމުންދާ ކަމަށް ފުލުހުން ބުނެއެވެ.
މީގެ އިތުރުން ފުލުހުން ބުނީ، މި އެކްސިޑެންޓުގައި ހިމެނޭ ސައިކަލު ދުއްވާފައިވަނީ އީ ކެޓަގަރީގައި އެއްގަމު އުޅަނދު ދުއްވުމުގެ ލައިސެންސް ނެތް މީހެއް ކަމަށާއި، އެކްސިޑެންޓުވުމުން އެމީހާ މަޑު ނުކޮށް ގޮސްފައިވާ ކަމަށެވެ.
މި އެކްސިޑެންޓާ ގުޅިގެން ސައިކަލު ދުއްވި 21 އަހަރުގެ ފިރިހެނަކު ފުލުހުންގެ ބެލުމުގެ ދަށަށް ގެސްފައިވާ ކަމަށް ފުލުހުން ބުނެއެވެ.
ފުލުހުން ބުނީ، އެ ސައިކަލު ޓޯ ކޮށް މައްސަލަ، ތަހުގީގު ކުރަމުންދާ ކަމަށެވެ.
މިއެކްސިޑެންޓުގެ ވީޑީއޯ ސޯޝަލް މީޑިއާގައި ދަނީ ދައުރުވަމުންނެވެ. އެ ވީޑިއޯއިން ފެންނަ ގޮތުގައި އެކުއްޖާ ހުންނަނީ މަގުގެ އެއް އަރިމަތީގައި އަންހެނުންތަކެއްގެ ކައިރީގައެވެ. ހުރެފައި ކުއްލިއަކަށް މަގު ހުރަސް ކުރުމަށް ދުއްވާ ގަނެއެވެ. އެއާއެކު، ބާރު ސްޕީޑްގައި އަންނަ ސައިކަލަށް ކޮންޓްރޯލް ނުވެ ކުއްޖާގެ ގައިގައި ޖެހޭތަން ފެނެއެވެ. ސައިކަލާއެކު އެކުއްޖާ ވަރަށް ދުރަށް ބުރާގެން ދާއިރު، ސައިކަލު ދުއްވަން އިން މީހާ ވެސް މަގުގެ އެއްފަރާތަކަށް ވިއްސާގެން ދާ މަންޒަރު ފެނެއެވެ. ބެލޭވޭ ގޮތުގައި އެވަގުތު އެކުއްޖާގެ މަންމަ ކުއްޖާ ނަގައިގެން ދުއްވާ ގަންނަ މަންޒަރު ވެސް ފެނެއެވެ.
މިފަހަކަށް އައިސް، މާލެސިޓީގެ އިތުރުން އަތޮޅުތެރޭގެ ރަށްތަކުގައި ދަނީ ނުރައްކާތެރި އެކްސިޑެންޓްތައް ހިނގަމުންނެވެ. އެކްސިޑެންޓުތައް ހިނގުން އާއްމުވަމުންދާއިރު، ބައެއް އެކްސިޑެންޓުތަކުގައި މީހުންގެ ފުރާނަ ގެއްލިފައިވެއެވެ.
