އުރީދޫ މޯލްޑިވްސްގެ ޑޭޓާ ސެންޓަރ ހުޅުވައިފި، މިއީ ރާއްޖޭގައި ހުޅުވި ފުރަތަމަ 'ޓިއާ-3' ޑޭޓާ ސެންޓަރ

އުރީދޫ މޯލްޑިވްސްްގެ ޑޭޓާ ސެންޓަރ ހުޅުވައިފިއެވެ. މިއީ ރާއްޖޭގައި ގާއިމްކުރި ފުރަތަމަ 'ޓީއާ-3' ޑޭޓާ ސެންޓަރެވެ. ޑޭޓާ ސެންޓަރ ހުޅުވުމަށް ބޭއްވި ރަސްމިއްޔާތުގައި އުރީދޫގެ ސީއީއޯ ނަޖީބް ޚާން ވިދާޅުވީ، މިއީ ރާއްޖެ ޑިޖިޓަލައިޒް ވަމުން އަންނައިރު ރާއްޖެއަށް ލިބުނު ބޮޑު ކުރިއެރުމެއް ކަަމަށެވެ. އަވައްޓެރި ގައުމުތަކުން އެމީހުންގެ ވިފާރިތައް ރާއްޖޭގައި ހޮސްޓް ކުރެވޭނެކަމަށާއި، އުރީދޫއިން ފޯރުކޮށްދޭ ޚިދުމަތް މެދުނުކެނޑޭނެ ކަމުގެ ޔަގީންކަން ސީއީއޯ ދެއްވިއެވެ.

ގޫގްލް ފޭސްބުކްފަދަ ދުނިޔޭގެ ފެންވަރުގައި ގުނާލެވޭ ޑޭޓާ ސެންޓަރުތަކާ އެއް ފެންވަރުގެ ފެސިލިޓީތަކާއެކު ހުޅުވި ތަނެއް ކަން ފާހަގަކުރަމުން ޗީފް ކޮމާރޝަލް އޮފިސަރ ހުސެއިން ނިޔާޒް ވިދާޅުވީ، ގުދުރަތީ ކާރިސާއެއް ދިމާވިޔަސް އެކަންތަކަށް ކޭޓަރ ކުރެވޭނެ ގާބިލުކަން އެ ސެންޓަރުގައި ހުންނާނެ ކަމަށެވެ. ނިޔާޒް ވިދާޅުވީ، ބެކަޕް ސިސްޓަމުން މެދު ނުކެނޑި 14 ދުވަހު ސެންޓަރު ރަންކުރެވޭނެ ކަމަށެވެ. މިހާރު ރާއްޖޭގައިވެސް ވެބްސައިޓިތަކާއި އެޕްލިކޭޝަންތައް ހޮސްޓު ކުރެވޭނެ ކަމަށާއި، މިއީ ރާއްޖޭގެ ފަތުރުވެރިކަމުގެ ދާއިރާއަށާއި، ރާއްޖޭގެ ވިޔަފާރިތަކަށާއި، އައިޓީ ދާއިރާއަށް ލިބުނު ބޮޑު ކުރިއެރުމެއްގެ ގޮތުގައި ނިޔާޒް ފާހަގަ ކުރެއްވިއެވެ.

Advertisement

އަދި މިހާރު ރާއްޖެއިން ބޭރުގައި ހޮސްޓް ކުރަމުން އަންނަ ފަރާތްތަކަށްވެސް ހޮސްޓިންގ ބަދަލުކުރުމުގެ ފުރުސަތު އޮންނާނެއެވެ. އެކަމަށް ބޭނުންވާ ހުރިހާ ޓެކްނިކަލް ސަޕޯޓެއްވެސް އުރީދޫއިން ދޭނެއެވެ. އެއިރުން ޚަރަދުގެ ގޮތުން މާ ބޮޑުތަން ކުުޑަވާނެކަމަށް ނިޔާޒް ވިދާޅުވިއެވެ. މި ފުރުސަތުތަކަށް އެދެން ބޭނުންވާ ފަރާތްތަކަށް އެފުރުސަތު ވަރަށް އަވަހަށް ހުޅުވާލުމަށް އުރީދޫއިން އަންނަނީ ތައްޔާރުވަމުންނެވެ. އުރީދޫއިން އަންނަނީ ރާއްޖެއަށް އެއްމެފަހުގެ ޓެކްނޮލޮޖީތައް ތައާރަފްކުރަމުންނެވެ. ފަތުރުވެރިކަމުގެ ދާއިރާގައި ބޭނުންކުރާނެ އާލަތްތަކާއި މަސްވެރިން ކަނޑު އުޅަނދުފަހަރުގައި ބޭނުންކުރާނެ އެންމެ ފަހުގެ އާލާތްތައް އުރީދޫއިން އަންނަނީ ތައާރަފްކުރަމުންނެވެ.