އުރީދޫ އާ ވިލާކޮލެޖު ގުޅިގެން ތަމްރީނު ފުރުސަތުތަކެއް އިއުލާންކޮށްފި
މި ޕާޓްނަރޝިޕްގެ މަޤްސަދަކީ ޑިޖިޓަލް ދުނިޔެއެއްގައި އަންނަން އޮތް ޖީލު ބާރުވެރިކުރުވުމަށްޓަކައި ތަމްރީނާއި އިންޓަރންޝިޕްގެ ފުރުޞަތުތައް ފޯރުކޮށްދިނުން ކަމުގައި އުރީދޫއިން ބުނެއެވެ.
އުރީދޫ އާއި ވިލާ ކޮލެޖުގެ ބައެއް އިސް ބޭފުޅުން
ތަމްރީނާއި އިންޓާންޝިޕްގެ ފުރުސަތުތައް ފަހިކޮށްދިނުމުގެ މަޤްސަދުގައި އުރީދޫ މޯލްޑިވްސް އިން ވިލާ ކޮލެޖާ އެކު ސްޓްރެޓެޖިކް ޕާޓްނާޝިޕެއް އިއުލާނުކޮށްފިއެވެ.
އަންގާރަ ދުވަހު އުރީދޫ އިން ނެރުނު ނޫސްބަޔާނެއްގައި ބުނެފައިވަނީ، މި ޕާޓްނަރޝިޕްގެ މަޤްސަދަކީ ޑިޖިޓަލް ދުނިޔެއެއްގައި އަންނަން އޮތް ޖީލު ބާރުވެރިކުރުވުމަށްޓަކައި ތަމްރީނާއި އިންޓަރންޝިޕްގެ ފުރުޞަތުތައް ފޯރުކޮށްދިނުން ކަމުގައެވެ.
އުރީދޫ އިން ބުނެފައިވަނީ މި ޕާޓްނަރޝިޕްގެ ދަށުން، ވިލާ ކޮލެޖުގެ ދަރިވަރުންނާއި އެ ކޮލެޖުން ތަޢުލީމު ހާސިލުކޮށްފައިވާ ދަރިވަރުންނާއި މި ދާއިރާގެ ތަޖުރިބާކާރުންނާ ގުޅުން ބަދަހިކޮށް ތަޖުރިބާ ހޯދުމަށް އައު މަގުތަކެއް ހުޅުވިގެންދާނެ ކަމަށެވެ. މިކަމުގެ ސަބަބުން އަވަސް ދުވެއްޔެއްގައި ކުރިއަރަމުންދާ މުވާޞަލާތާއި ޓެކްނޮލޮޖީގެ ދާއިރާއިން ކުރިއަށް ދިއުމަށް މަގުފަހިވެގެން ދާނެކަމަށްވެސް އުރީދޫ އިން ބުނެއެވެ.
އުރީދޫގެ އަމާޒަކީ މި ދާއިރާއިން ކުރިއެރުމަށް ބޭނުންވާ އަމަލީ ހުނަރާއި އިންޑަސްޓްރީގެ ވިސްނުމަށް ދަރިވަރުންނަށް އަހުލުވެރިކުރުވުމެވެ.
އުރީދޫގެ އެޗްއާރު ޑިރެކްޓަރު ފަޒްނާ މަންޞޫރު ވިދާޅުވި ގޮތުގައި މި ޕާޓްނާޝިޕްގެ ސަބަބުން ޢަމަލީ ތަޖުރިބާއާއި، މި ދާއިރާގެ މަޢުލޫމާތާއި، އަދި މެންޓަރޝިޕް ފޯރުކޮށްދިނުމުގެ ތެރެއިން ޑިޖިޓަލް ދާއިރާގައި ކުރިމަގުގެ ލީޑަރުން ތަރައްޤީކުރުމަށް އެހީތެރިވުމަކީ އެ ކުންފުނީގެ މަޤްޞަދު ކަމުގައެވެ.
މުވާޞަލާތީ ދާއިރާއަކީ އެންމެ އަވަހަށް ބަދަލުވަމުންދާ ދާއިރާތަކުގެ ތެރެއިން އެއް ދާއިރާކަން ފާހަގަކުރައްވަމުން، އޫރީދޫއިން ބުނެފައިވަނީ މި ދާއިރާއަށް އަންނަ ބަދަލުތަކުގެ މައިގަނޑު ސަބަބުތަކަކީ ޓެކްނޮލޮޖީއަށް އަންނަ އަވަސް ކުރިއެރުންތަކާއި، ޑިޖިޓަލް އިންފްރާސްޓްރަކްޗަރ އަދި އީޖާދީ ގުޅުން ޤާއިމުކުރުމުގެ ޙައްލުތަކަށް އިތުރުވަމުންދާ ޑިމާންޑު ކަމުގައެވެ.
އުރީދޫއަށް ޓެލެކޮމިއުނިކޭޝަން ކެޓަގަރީން އެމްޕްލޯޔާ އޮފް ދަ އިޔާގެ ބްރޯންޒް ސްޓީވީ އެވޯޑް މި އަހަރު ވަނީ ލިބިފަ އެވެ.
މި އެވޯޑަކީ މުވައްޒަފުންގެ ކުރިއެރުމަށާއި ދުޅަހެޔޮކަމާއި ހުނަރުވެރިކަން ކުރިއެރުވުމަށް އުރީދޫއިން ކުރަމުންދާ މަސައްކަތް ފާހަގަކޮށްދޭ އެވޯޑެކެވެ.
