"ރިޑަންޑެންސީ" ގެ ގޮތުގައި ވަޒީފާއިން ވަކިކޮށްފައިވާ ފަރާތްތަކުގެ މައުލޫމާތު ހޯދަނީ

"ރިޑަންޑެންސީ" ގެ ގޮތުގައި ވަޒީފާއިން ވަކިކޮށްފައިވާ ފަރާތްތަކުގެ މައުލޫމާތު ހޯދުމުގެ މަސައްކަތް އިކޮނޮމިކް މިނިސްޓްރީން ފަށައިފިއެވެ.

އިކޮނޮމިކް މިނިސްޓްރީން ބުނީ ދިވެހިރާއްޖޭގެ ވަޒީފާގެ ބާޒާރަށް އަންނަމުންދާ ބަދަލުތައް ދެނެގަތުމަށް، މިނިސްޓްރީއިން މަސައްކަތްތަކެއް ކުރަމުންދާ ކަމަށެވެ.

އިކޮނޮމިކް މިނިސްޓްރީން ބުނީ ވަޒީފާއާބެހޭ ގާނޫނަށް ގެނެވުނު 6 ވަނަ އިސްލާހާ ގުޅިގެން، އެ ގާނޫނުގެ 21 ވަނަ މާއްދާގައިވާ ގޮތުގެ މަތިން، ރިޑަންޑެންސީގެ ގޮތުގައި ވަޒީފާއިން ވަކިކުރެވޭ މުވައްޒަފުންގެ މައުލޫމާތު އެއްކޮށް، އެކަމާގުޅޭ ދިރާސާއެއް ކުރުމަށް ތައްޔާރުވަމުންދާ ކަމަށެވެ. އެހެންކަމުން މި ދިރާސާގެ ބޭނުމަށްޓަކައި ވަޒީފާއިން ރިޑަންޑަންޓް ކުރެވިފައިވާ ފަރާތްތަކުގެ މައުލޫމާތު ހޯދުމަށް ބޭނުންވާ ކަމަށް މިނިސްޓްރީން ބުނެއެވެ.

1 ޖެނުއަރީ 2019 ފެށިގެން ވަޒީފާއިން ރިޑަންޑެންޓް ކުރެވިފައިވާ ފަރާތްތަކުން، 24 މާރިޗު 2021 ކުރިން، އެކަން ސިޓީއަކުން ނުވަތަ، މިނިސްޓްރީގެ އީމެއިލް އެޑްރެސް info@trade.gov.mvށް އީމެއިލް ކޮށްދިނުމަށް އިކޮނޮމިކް މިނިސްޓްރީން ވަނީ އެދިފައެވެ.

ރިޑަންޑެންސީގެ ގޮތުގައި ވަޒީފާއިން ވަކިކޮށްފައިވާ ފަރާތްތަކުގެ މައުލޫމާތު ހޯދުމުގެ މަސައްކަތް އިކޮނޮމިކް މިނިސްޓްރީން ފަށައިފައިވާއިރު، ކޮވިޑް-19އާ ގުޅިގެން 2020 ވަނަ އަހަރު ގިނަ ބައެއްގެ ވަޒީފާ ގެއްލިފައިވެއެވެ. ޚާއްސަ ގޮތެއްގައި ފަތުރުވެރިކަމުގެ ސިނާއަތުގައި މަސައްކަތް ކުރާ މީހުންގެ އިތުރުން ޕްރައިޓް ސެކްޓަރގައި މަސައްކަތް ކުރާ މީހުންގެ ވަޒީފާ ގެއްލިފައިވެއެވެ.