ބިޒްނަސް ފޯރަމްތައް ބާއްވާން އެތައް މިލިއަން ރުފިޔާ އެއް ޚަރަދު ކޮށްފި، އައި އިންވެސްޓްމަންޓެއް ނޭނގޭ!
30 އޯގަސްޓު 2025 | ހޮނިހިރު 16:35ސަރުކާރުން ރާއްޖެ އިން ބޭރުގައި ބޭއްވި 8 ބިޒްނަސް ފޯރަމަށް 5.5 މިލިއަން ރުފިޔާއާ ގާތްކުރާ އަދަދެއް ހޭދަކޮށްފި. މި ފޯރަމްތަކަކީ އިންވެސްޓަރުންނަށް ރާއްޖޭގެ ވިޔަފާރީގެ ފުރުސަތުތައް ހާމަކޮށްދިނުމަށް ބޭއްވޭ ބައްދަލުވުންތަކެއް ކަމަށް މިނިސްޓްރީން ބުނޭ.
ސިންގަޕޫރުގައި ބޭއްވި ބިޒްނަސް ފޯރަމް
ސަރުކާރުން އިންތިޒާމު ކޮށްގެން ރާއްޖެ އިން ބޭރުގައި ބޭއްވި ބިޒްނަސް ފޯރަމްތަކަށް އެތައް މިލިއަން ރުފިޔާ ޚަރަދު ވި ކަމަށް އިކޮނޮމިކް މިނިސްޓްރީން ބުނެފިއެވެ.
މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް ގައި މިހާތަނަށް ސަރުކާރުގެ ފަރާތުން ބޭއްވި ބިޒްނަސް ފޯރަމް ތަކަށް ޚަރަދުވެފައި ވަނީ ކިހާ ވަރެއްތޯ ރާއްޖެޓީވީން ކުރި ސުވާލަކަށް ދިން ޖަވާބުގައި ބުނެފައިވަނީ، ރާއްޖެއިން ބޭރުގައި މިހާތަނަށް ބޭއްވި 8 އިންވެސްޓްމަންޓް ފޯރަމްގެ އިންތިޒާމްތަކަށް 5،497،946 ރ. ދިވެހި ސަރުކާރުން ޚަރަދު ކުރެވިފައިވާ ކަމަށް މިނިސްޓްރީގެ ރެކޯޑް ތަކުން އެނގޭ ކަމަށެވެ.
މިފަދަ ބިޒްނަސް ފޯރަމް ތަކުން ރާއްޖެ އަށް ކިހާ އިންވެސްޓްމަންޓް ތަކެއް އަތުވެއްޖެތޯ ސުވާލު ކުރުމުން މިނިސްޓްރީ ސީދާ ޖަވާބެއް ދިނުމުގެ ބަދަލުގައި ބުނީ، ސަރުކާރުން އިންތިޒާމު ކޮށްގެން ބާއްވާ މިފަދަ ފޯރަމް ތަކަކީ އިންވެސްޓްމަންޓްތަކަށް ރާއްޖޭގައި ހުރި ފުރުސަތު މައުލޫމާތު ހިއްސާ ކުރުމަށާއި އިންވެސްޓަރުންނާއި ސަރުކާރުގެ ކަމާ ގުޅޭ ފަރާތްތަކާއި މައުލޫމާތު ބަދަލު ކުރަން ފުރުސަތު ފޯރުކޮށް ދިނުމަށް ބާއްވާ ފޯރަމްތަކެއް ކަމުގައެވެ.
މި ސަރުކާރުން ބޭއްވި ބިޒްނަސް ފޯރަމްތަކަކީ ރައީސުލް ޖުމްހޫރިއްޔާ ފެންވަރުގައި ބޭއްވި ފޯރަމްތަކެއްކަން ފާހަގަ ކުރެވެއެވެ.
މަސްދަރު: އިކޮނޮމިކް މިނިސްޓްރީ
