ވަޒީފާ އާއި ބެހޭ ޤާނޫނާ ޚިލާފަށް ސަރުކާރުން އަމަލުކުރާ މައްސަލައަށް ބަހުސްކުރަން ފާސްވެއްޖެ
6 ފެބުރުއަރީ 2024 | އަންގާރަ 05:03"ފޮރިން ލޭބަރ ސްޓެޓިސްޓިކްސް އެންޑް އެކްސްޕެޓް ސިސްޓަމް ރިޕޯޓް 2023" އިކޮނޮމިކް މިނިސްޓްރީގެ ވެބްސައިޓުން ވަނީ ޑިލީޓްކޮށްފައި
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ވަޒީފާ އާއި ބެހޭ ޤާނޫނާ ޚިލާފަށް ސަރުކާރުން އަމަލުކުރާ މައްސަލަ އަށް ބަހުސްކުރުމަށް ފާސްވެއްޖެއެވެ.
މި މައްސަލަ ހުށަހެޅުއްވީ ތުޅާދޫ ދާއިރާގެ މެންބަރު ހިސާން ހުސައިނެވެ.
މި މައްސަލަ ބަލައިގަނެ ބަހުސްކުރަން ފާސްވީ ރައްޔިތުންގެ މަޖިލީހުގެ 23 މެންބަރުންގެ ވޯޓާއި އެކުގައެވެ. މި މައްސަލަ އަށް ބަހުސްކުރަން ނުފެންނަކަމަށް 6 މެންބަރުން ވޯޓުދެއްވިއެވެ. މި މައްސަލަ އަށް ބަހުސްކުރަން ފާސްކުރަން ބޭނުންވަނީ 15 މެންބަރުންގެ ވޯޓުކަމަށް ވުމާއެކު މި މައްސަލަ އަށް ބަހުސްކުރަން ވަނީ ފާސްވެފައެވެ.
ހިސާން ހުށަހެޅުއްވި މި މައްސަލައިގައި ބުނެފައި ވަނީ ވަޒީފާ އާއި ބެހޭ ޤާނޫނުގެ ދަށުން ރާއްޖެ އަށް ބިދޭސިން ވަޒީފާ އަދާކުރުމަށް ކޯޓާ ދޫކުރުމާއި، ބިދޭސީންނަށް ވަޒީފާ އަދާކުރަން ހުއްދަ ދިނުމާއި، ވަޒީފާ އަދާކުރާ މުއްދަތަށް ދިވެހިރާއްޖޭގައި ހުރުމުގެ ހުއްދަ ދިނުމަކީ އެ ޤާނޫނުގައި ބަޔާންކުރާ ގޮތެއްގެ މަތިން ކަމާއި ގުޅޭ މިނިސްޓްރީއަކަށް ލިބިގެންވާ ބާރެއް ކަމަށެވެ.
އެހެންކަމަށް ވާއިރު ބިދޭސީން ގެނައުމަށް ހުއްދަ ދިނުމާއި، އެކަމާއި ގުޅޭ ކަންކަމަކީ މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީގެ މެންޑޭޓުގައި ހިމަނާފައިވާ ކަމެއްކަމަށް ވީ ނަމަވެސް، ވަޒީފާ އާއި ބެހޭ ޤާނޫނު ތަންފީޒުކުރަން ހަދަން ޖެހޭ ޤަވާއިދުތައް ހެދުން ހަޔަރ އެޑިއުކޭޝަން މިނިސްޓްރީ އާއި ހަވާލުކޮށްފައިވާ ކަމަށް މި މައްސަލައިގައިވެއެވެ.
ވަޒީފާ އާއި ބެހޭ ޤާނޫނުގައި އެހެން ގޮތަކަށް ބަޔާންކޮށްފައިނުވާ ނަމަ އެ ޤާނޫނު ހިންގުމަށް ހަނދަން ޖެހޭ ޤަވާއިދުތައް ހަދާނީ މިނިސްޓަރު ކަމަށާއި، "މިނިސްޓަރު" ރައްދުވަނީ ޤާނޫނުގެ ދަށުން ވަޒީފާ އާއި ބެހޭ ކަންކަން ބެލެހެއްޓުން ހަވާލުވެފައިވާ ވުޒާރާ ބަލަހައްޓާ ވަޒީރަކަށް ކަމަށް ވެސް އެ މައްސަލައިގައިވެއެވެ. އެހެންކަމުން ވަޒީފާ އާއި ބެހޭ ކަންކަން ރެގިއުލޭޓުކުރުމުގެ މަސައްކަތްކުރާ ވުޒާރާ އަށް ދީފައިވާ ބާރެއްގެ ބައެއް އެހެން މިނިސްޓްރީއަކަށް ނުވަތަ މިނިސްޓަރަކަށް ރައީސަށް ހަވާލު ނުކުރެއްވޭނެ ކަމަށް މި މައްސަލައިގައި ބުނެފައިވެއެވެ. މި މައްސަލައިގައި އިތުރަށް ބުނެފައި ވަނީ އެ ޤާނޫނުގެ ދަށުން ހަދާ ޤަވާއިދުތައް ތަންފީޒުކުރުމުގެ ބާރު ލިބިގެންވާ ހަޔަރ އެޑިއުކޭޝަން ނޫން މިނިސްޓްރީއަކަށް އެ ޤާނޫނުގެ ދަށުން ނިންމުމެއް ނުނިންމޭނެ ކަމަށެވެ. އަދި ހޯމް މިނިސްޓްރީ އަށް އެ ޤާނޫނުގެ ދަށުން ބާރު ލިބިގެން ނިންމާ ނިންމުމެއް ނުވަތަ ހަދަން ޖެހޭ ޤަވާއިދެއް ނުހެދޭނެކަަމަށެވެ.
ވަޒީފާ އާއި ބެހޭ ޤާނޫނުގައި ބުނަނީ އެއް ޤައުމަކުން އެންމެ ގިނައިން ރާއްޖެ އަށް ގެނެވޭނީ އެއް ލައްކަ މީހުން ކަަމަށެވެ. "ފޮރިން ލޭބަރ ސްޓެޓިސްޓިކްސް އެންޑް އެކްސްޕެޓް ސިސްޓަމް ރިޕޯޓް 2023" އިން އެއްލައްކަ ތިރީސް ނުވަހާސް ދުއިސައްތަ ވިހި (139220) ބަންގްލަދޭޝް އެކްޓިވް ވަރކް ޕަރމިޓް ހޯލްޑަރސް ތިބި ކަމަށް އެބައޮތެވެ. ނަމަވެސް މި ސަރުކާރުން ވަނީ ބަންގްލަދޭޝް މީހުން އަންސްކިލްޑް ލޭބަރ އަށް ގެންނަން ނިންމާފައެވެ. ސަރުކާރުން އެގޮތަށް އަމަލު ކުރީ ޤާނޫނާ ޚިލާފަށް ކަމަށް ތުހުމަތުކުރަމުން ދަނިކޮށް، "ފޮރިން ލޭބަރ ސްޓެޓިސްޓިކްސް އެންޑް އެކްސްޕެޓް ސިސްޓަމް ރިޕޯޓް 2023" އިކޮނޮމިކް މިނިސްޓްރީގެ ވެބްސައިޓާ ޓްވިޓަރ އިން ފޮހެލާފައިވާތީ އެއީ އިކޮނޮމިކް މިނިސްޓްރީން ގާނޫނާއި ޚިލާފަށް ކޮށްފައިވާ ކަމެއް ކަަަމަށް ވެސް މަޖިލީހަށް ހުށަހަޅާފައިވާ މި މައްސަލައިގައި ވަނީ ބުނެފައެވެ.
ވަޒީރުންގެ މަޖިލީހުގެ ކޮންމެ މެންބަރަކު ޤާނޫނު އަސާސީ އަށް ތަބާވާން ޖެހޭ ކަމަށާއި، އެއާއި ޚިލާފަށް މިނިސްޓަރު އަމަލުކޮށްފައިވާ މައްސަލަ މަޖިލީހަށް ހުށަހަޅާ ކަމަށް މެންބަރު ހިސާން ހުށަހެޅުއްވި މި މައްސަލައިގައި ބުނެފައިވެއެވެ.
