ޓްރާންޝިޕްމަންޓަށް ހާއްސަ ކުންފުންޏެއް އުފައްދަނީ
100 އިންސައްތަ ދިވެހި ކުންފުންޏެއް، މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯންގެ ނަމުގައި އުފެއްދުމަށް ސަރުކާރުން ވަނީ ނިންމާފައި
އެމްއެސްއެސްގެ ފުރަތަމަ ބޯޓު ރާއްޖޭގެ ވިޔަފާރި މައި ބަނދަރު އެމްޕީއެލްއައް ކައިރިކުރުން --- ފޮޓޯ: ޔޫސުފް ސޮފްވާން
މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީޒޯންގެ ނަމުގައި ކުންފުންޏެއް އުފެއްދުމަށް ސަރުކާރުން ނިންމައިފިއެވެ.
މާގިނަ ތަފްސީލުތަކެއް ހާމަނުކުރައްވާ އިކޮނަމިކް މިނިސްޓަރު މުހައްމަދު ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖޭގެ އިޤްތިޞާދީ ރައްކާތެރިކަން ކަށަވަރުކުރުމާއި، ވެލިއުއެޑްކުރުމާއި، ޓްރާންޝިޕްމަންޓް/ރިއެކްސްޕޯޓް ވިޔަފާރިއަށް ޙާއްސަކޮށް 100 އިންސައްތަ ދިވެހި ކުންފުންޏެއް، މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯންގެ ނަމުގައި އުފެއްދެވުމަށް ރައީސް ޑރ. މުހައްމަދު މުއިއްޒު ނިންމަވާފައިވާ ކަމަށެވެ.
ނަމަވެސް މި ކުންފުންޏާ ބެހޭ އިތުރު ތަފްސީލެއް ސަރުކާރުން ހާމައެއް ނުކުރެއެވެ.
މި ކުންފުނިން ކުރާނެ މަސައްކަތުގެ ތެރޭގައި ޓްރާންޝިޕްމަންޓާއި، ބަންކަރިންގެ ހިދުމަތް ދިނުމަށް ސަރުކާރުން ނިންމާފައިވާ ސަރަހައްދުތައް މެނޭޖްކޮށް ބެލެހެއްޓުން ހިމެނެއެވެ. ލ. އަތޮޅުގައި އޮތް ހިމާޔަތްކޮށްފައިވާ ރަށެއް ކަމަށްވާ ގާދޫގައި ބަންކަރިންގެ ޚިދުމަތާއެކު ޓްރާންޝިޕްމެންޓު ބަނދަރެއް ތަރައްގީކުރުމުގެ މަސައްކަތް ފެށުމަކީ ހަފްތާ 14 ގައި ހިމެނޭ ވައުދެކެވެ. މިއާއެކު އިހަވަންދިއްޕޮޅުގެ ޓްރާންސްޝިޕްމަންޓް ބަނދަރާއި، ގްރޭޓާ މާލެ އޭރިއާގައި ޓްރާންސްޝިޕްމަންޓް ބަނދަރު ތަރައްގީކޮށް އެކަންކަންވެސް ބަލަހައްޓާނީ މި ކުންފުނިންނެވެ.
މީގެއިތުރުން އެސްއީޒެޑް ގާނޫނުގެ ދަށުން ކަނޑައެޅޭ މުހިއްމު ސަރަހައްދުތަކެއްގައި ސްޕެޝަލް އިކޮނޮމިކް ޒޯންތަކެއް ގާއިމްކޮށް، އިންވެސްޓްމެންޓުތަކަށް ފުރުސަތު ހުޅުވާލުމަށް ސަރުކާރުން ނިންމާފައިވެއެވެ.
