ކުރިމަގުގައި ޤަތަރާއި އެކު މުހިންމު މަސައްކަތްތަކެއް ކުރެވޭނެ: ފޮރިން މިނިސްޓަރ ޝާހިދު

މުސްތަޤުބަލުގައި ޤަތަރާއި ދިވެހި ރާއްޖެއާއި ދެމެދު މުހިންމު މަސައްކަތްތަކެއް ކުރެވިގެންދާނެ ކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.

ޝާހިދު މިހެން ވިދާޅުވީ ރައީސް އިބްރާހިމް މުޙައްމަދު ޞާލިޙާ އެކު ޤަތަރަށް ކުރެއްވި ފުރަމާނަ ދަތުރުފުޅުގައި، ޤަތަރުގެ މީޑިއާއަކަށް ދެއްވި ޚާއްސަ އިންޓަވިއުއެއްގައެވެ. މި އިންޓަވިއުގައި މިނިސްޓަރ ފާހަގަ ކުރެއްވި ގޮތުގައި، ރައީސް ޞާލިޙު ޤަތަރަށް ކުރެއްވި ދަތުރުފުޅަކީ ޤަތަރާއި ރާއްޖެއާ ދެމެދު އޮތް ގުޅުމުގެ އައު ފެށުމެކެވެ. އަދި މިހާރުވެސް  ޤަތަރާއިއެކު ދަތުރުފަތުރުގެ އިންވެސްޓްމެންޓާގުޅޭ އެއްބަސްވުންތަކާއި، އޫރީދޫގެ އިންވެސްޓްމެންޓުގެ އިތުރުން، ފަތުރުވެރިކަމުގެ ދާއިރާގެ އިންވެސްޓްމެންޓްތައް އެބަހުރިކަމަށް ޝާހިދު ވިދާޅުވިއެވެ.

މީގެ އިތުރުން ގަލްފުގެ ސަރަހައްދަކީ މުހިންމު ސަރަހައްދެއްކަން ފާހަގަ ކުރައްވަމުން، ޝާހިދު ވިދާޅުވީ، ޖިއޮގްރަފީގެ ގޮތުން ގަލްފަކީ މުހިންމު ސަރަހައްދަތަކަށް ވުމުގެ އިތުރުން، މިއީ އިގްތިސާދީ ތަރައްގީގެ މަރުކަޒެއް ކަމަށެވެ. އަދި ގަލްފުގެ ހުރިހާ ގައުމުތަކަކާ އެކު ސަރުކާރުން ގުޅުން ބާއްވަނީ،  ދިވެހިރާއްޖެ އޮތީ އިންޑިއާ ކަނޑުގެ މެދުގައި ކަމަށްވެފައި، އިންޑިއާ ކަނޑުގެ މެދުން ރާއްޖެއަށް ލިބިފައިވާ ދައުރުގެ ފައިދާ އެންމެނަށްވެސް އިޖުތިމާއީ ގޮތުންނާއި އިގްތިސާދީ ގޮތުން ލިބޭނޭހެން ކަމަށް އެމަނިކުފާނު ވިދާޅުވިއެވެ.

އަދި މިހާރުގެ ސަރުކާރަކީ ހުޅުވިފައިވާ ސިޔާސަތެއް ގެންގުޅޭ ސަރުކާރެއް ކަމަށް ފާހަގަ ކުރައްވަމުން ޝާހިދު ވިދާޅުވީ، މި ސަރުކާރު ބޭނުންވަނީ ގަލްފުގެ ގައުމުތަކާއި ވިލާތުގެ އިއްތިހާދާއި އޭޝިއާގެ ގައުމުތަކާއެކު އާއިލާގެ ބައެއްގެ ގޮތުގައި މަސައްކަތް ކުރަން ކަމަށެވެ. އަދި މި ސަރުކާރު ވެރިކަމަށް އައީ، ބައިނަލްއަގްވާމީ ގުޅުންތައް ހަރުދަނާ ކުރާނެ ކަމުގެ ވައުދާއި ޑިމޮކްރަސީ އާއި އިންސާނީ ހައްގުތައް ކުރިއެރުވުމާއި ކޮރަޕްޝަން ނައްތާލައި ހެޔޮ ވެރިކަމެއް ކުރުމުގެ ވައުދާއެކު ކަމަށް ޝާހިދު ވިދާޅުވިއެވެ.

މި ދަތުރުފުޅުގައި ރައީސް ޞާލިޙުގެ ދެކަނބަލުންގެ އިތުރުން ސަރުކާރުގެ އިސް އޮފިޝަލުންގެ މައްޗަށް އެކުލެވޭ ވަފުދެއް މި ދަތުރުގައި ބައިވެރިވެވަޑައިގެންނެވިއެވެ. މިއީ، ކުރީގެ ސަރުކާރުގައި ކަނޑާލާފައިވާ ޤަތަރާއި ރާއްޖޭގެ ސިޔާސީ ގުޅުން އަލުން ގާއިމުކުރުން ފާހަގަކުރެއްވުމާއި ދެ ގައުމުގެ ދެމެދުގައި ޒަމާނުއްސުރެ އޮތް ގުޅުން އިތުރަށް ބަދަހިކުރުމާގުޅޭ ގޮތުން މަޝްވަރާ ކުރުމަށް ކުރެއްވި ދަތުރުފުޅެކެވެ.