ޖަރުމަނުން އެސްޓްރަޒެނެކާ ވެކްސިން ޖެހުން ހުއްޓާލައިފި

ކޮވިޑް-19އަށް އެސްޓްރަޒެނެކާއާއި އޮކްސްފޯޑް ޔުނިވާސިޓީގެ ދިރާސާގެ މައްޗަށް އުފައްދާފައިވާ ވެކްސިން ޖެހުން ޖަރުމަނުވިލާތުން ހުއްޓާލައިފިއެވެ.

ޖަރުމަނުން އެސްޓަރަޒެނެކާ ކޮވިޑް ވެކްސިން ޖެހުން ހުއްޓާލާފައިވާކަން ހާމަކޮށްފައި ވަނީ އެގައުމުގެ ހެލްތު މިނިސްޓްރީގެ އޮފިޝަލެކެވެ.

ރޮއިޓަރސްގައި ރިޕޯޓްކޮށްފައިވާ ގޮތުން ޖަރުމަނުން އެސްޓްރަޒެނެކާ ވެކްސިން ޖެހުން ހުއްޓާލާފައި މިވަނީ ވެކްސިން ޖެހުމުން ބައެއް މީހުން މާބޮޑަށް ބަލިވެ ނުރައްކާތެރި ހާލަތަށްދާ ކޭސްތައް ފެންނަން ފެށުމުންނެވެ. އަދި މިހާރު އެކުލަވާލާފައިވާ އުސޫލުގައިވާ ގޮތުން ޖަރުމަނުގެ ވެކްސިން އޮތޯރިޓީގެ ރިކޮމެންޑޭޝަން ހޯދަންޖެހެއެވެ.

އެސްޓްރަޒެނަކާއިން އުފައްދާފައިވާ ކޯވިޑް-19 ވެކްސިންގެ ސަބަބުން ލޭ ގަނޑުވުމުގެ ފުރުސަތު އެބައޮތްކަމުގެ ކަންބޮޑުވުން ގައުމުތަކުން ދަނީ ފާޅުކުރަމުންނެވެ.

އެސްޓްރަޒެނެކާ ބޭނުންކުރުމުގެ ރައްކާތެރިކަމާ ގުޅޭގޮތުން ވާހަކަދައްކަވަމުން ދުނިޔޭގެ ސިއްޙަތު ޖަމްޢިއްޔާ، ޑަބްލިއުއެޗްއޯގެ ސްޕޯކްސްޕަރސަން މާގްރެޑް ހެރިސްވަނީ އެސްޓްރަޒެނެކާގެ ވެކްސިންއަކީ "ބަރާބަރު" ވެކްސިނެއްކަމަށް ސިފަކުރައްވާފައެވެ. އަދި މި ވެކްސިންޖެހުން ހުއްޓާލަންޖެހޭ އެއްވެސް ސަބަބެއް ނެތްކަމަށް ވިދާޅުވެ މި ވެކްސިންޖެހުން ކުރިއަށްގެންދިއުމަށް ވަނީ ލަފާދެއްވާފައެވެ. މިހާތަނަށް އައިއިރު އެސްޓްރަޒެނެކާގެ ވެކްސިން ދުނިޔޭގެ އާބާދީގެ 260 މިލިއަން މީހުންނަށް ޖަހާފައިވާއިރު، މި ވެކްސިންގެ ސަބަބުން އެއްވެސް މީހަކު މަރުވެފައިވާކަން ސާބިތުވެފައިނުވާކަމަށް ޑަބްލިއުއެޗްއޯގެ ސްޕޯކްސްޕަރސަން ވިދާޅުވިއެވެ.

އެސްޓްރަޒެނެކާއާއި އޮކްސްފޯޑް ޔުނިވާސިޓީ ގުޅިގެން ކޮވިޑް-19އަށް އުފައްދާފައިވާ ވެކްސިން އެމަޖެންސީކޮށް ބޭނުކުރުމުގެ ހުއްދަ ދުނިޔޭގެ ސިއްޙަތު ޖަމްއިއްޔާއިން ދީފައިވަނީ މިއަހަރުގެ ކުރީކޮޅުއެވެ. އެސްޓްރަޒެނެކާއާއި އޮކްސްފޯޑްގެ ކޮވިޑް-19 ވެކްސިނަކީ ދުނިޔޭގެ ސިއްޙަތު ޖަމްއިއްޔާއިން އެމެޖެންސީކޮށް ބޭނުންކުރުމުގެ ހުއްދަދިން ދެވަނަ ވެކްސިނެވެ. އެޖަމްއިއްޔާއިން އެންމެ ފުރަތަމަ ހުއްދަ ދީފައިވަނީ ފައިޒަރ އަދި ބައޯއެންޓެކްގެ ކޮވިޑް-19 ވެކްސިނަށެވެ.