ރެއާލް ދެވަނައަށް، އެތުލެޓިކޯ އެއްވަރު

ސްޕެނިޝް ލީގުގައި ހޮނިހިރު ދުވަހުގެރޭ ފަހަތުން އަރައި އެލްޗޭ ބަލިކޮށް ތާވަލުގެ ދެވަނައަށް އެންމެ ފަހުގެ ޗެމްޕިއަން ރެއާލް މެޑްރިޑް ޖެހިލިއިރު، އެއްވަނައިގައި އޮތް އެތުލެޓިކޯ މެޑްރިޑާއި ގެޓާފޭ ބައްދަލުކުރި އެއްވަރުވެއްޖެއެވެ.

އަމިއްލަ ދަނޑުގައި ކުޅުނު މެޗުން ރެއާލް މޮޅުވީ އެލްޗޭ އަތުން ފަހަތުން އަރައި 2-1 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ލަނޑެއް ފެނިފައި ނުވާއިރު، ދެވަނަ ހާފުގައި އެންމެ ފުރަތަމަ ލަނޑު ޖަހާ ލީޑު ނެގީ އެލްޗޭއިންނެވެ. އެގޮތުން މެޗުގެ 61 ވަނަ މިނެޓުގައި އެލްޗޭއަށް ލީޑު ނަގައިދިނީ ޑެނީ ކާލްވޯއެވެ. އެކަމަކު މެޗުގެ 73 ވަނަ މިނެޓުގައި ކަރިމް ބެންޒެމާ ވަނީ ރެއާލަށް ނަތީޖާ އެއްވަރުކޮށްދީފައެވެ. އަދި މި މެޗުން ރެއާލް މޮޅުވީ އިތުރު ވަގުތުގައި ބެންޒެމާ ޖަހައިދިން ލަނޑުންނެވެ.

މި މެޗުން ރެއާލް މޮޅުވިއިރު، ރަށުން ބޭރުގައި ކުޅުނު މެޗުން އެތުލެޓިކޯ އެއްވަރުވީ ގެޓާފޭއާ ވާދަކޮށް، ދެ ޓީމުން ކުރެ ޓީމަކަށް ލަނޑެއް ނުޖެހިއެވެ. އެހެންކަމުން ތާވަލުގެ އެއްވަނައިގައި އެތުލެޓިކޯގެ ލީޑު ކުޑަވުމުގެ ފުރުސަތު ވަނީ ބޮޑުވެފައެވެ. ތާވަލުގެ އެއްވަނައިގައި މި ވަގުތު އެތުލެޓިކޯ އޮތީ ކުޅުނު 27 މެޗުން ލިބުނު 63 ޕޮއިންޓާއެކުއެވެ.

ދެވަނައިގައި އޮތް ރެއާލަށް 27 މެޗުން 57 ޕޮއިންޓް ލިބިފައިވާއިރު، ތިންވަނައިގައި ބާސެލޯނާ އޮތީ 26 މެޗުން 56 ޕޮއިންޓާއެކުއެވެ. އެކަމަކު ހޯމަ ދުވަހުގެރޭ ހުއެސްކާ އަތުން ބާސާ މޮޅުވެއްޖެނަަމަ، އެ ޓީމަށް އަލުން ދެވަނައަށް އެރޭނެ އެވެ. އަދި އެތުލެޓިކޯގެ ލީޑު ހަތަރު ޕޮއިންޓަށް ކުޑަވާނެއެވެ.