މަހަކަށްވުރެ ގިނަ ދުވަސް ފަހުން އައްޑޫސިޓީ މޮނިޓަރިންގއިން ނަގައިފި

ޕޮޒިޓިވް ކޭސްތަކެއް ފެނި މޮނިޓަރިންގއަށް ލާފައިވާ އައްޑޫސިޓީ އާންމު ޙާލަތަށް ގެނެސްފިއެވެ.

އައްޑޫ ސިޓީ ހިތަދޫން ކޮވިޑް-19ގެ ދެ ކޭހެއް ފެނި މުޅި އައްޑޫ ސިޓީ މޮނިޓަރިންއަށް ލީ މިދިޔަ މަހުގެ 6 ވަނަ ދުވަހުއެވެ. ޕޮޒިޓިވްވީ ބަލީގެ އަލާމާތްތައް ހުރެގެން ފްލޫ ކްލިނިކްއަށް ދެއްކި ދެމީހުންނެވެ. އެ ދެމީހުންނަކީ ވެސް އެއްތަނެއްގައި މަސައްކަތްކުރާ ދެމީހުން ކަމަށާއި މިހާތަނަށް ކޮންޓެކްޓުންގެ ގޮތުގައި ފާހަގަވެފައިވަނީ އެމީހުންނާއެކު ދިރިއުޅޭ އާއިލީ މެމްބަރުންނާއި އޮފީސް މީހުންނެވެ.

އައްޑޫ ސިޓީން ދެ ކްލަސްޓަރއެއް ފެނިފައިވާއިރު އެއީ ޕްރޮޖެކްޓް ސައިޓަކުން ފެނުނު ކްލަސްޓަރއަކާއި، އޭވިއޭޝަން ކްލަސްޓަރއެކެވެ. އައްޑޫސިޓީ މޮނިޓަރިންގ އިން ނަގާފައިވާއިރު ވެކްސިން ޖެހުމުގެ ކަންތައްތައް ވެސް ކުރިއަށް އެބަދެއެވެ. އެގޮތުން ހޮނިހިރު ދުވަހު ވެކްސިންޖަހާފައިވަނީ އެނދުމަތި ކުރެވިފައިވާ ބަލިމީހުންނަށް އެކަންޏެވެ. އެހެން ފަރާތްތަކަށް ވެކްސިން ޖެހުން ވަގުތީ ގޮތުން މިހާރު މެދުކަނޑާލާފައިވާ ކަމަށް އައްޑޫސިޓީގެ އިމަރޖެންސީ އޮޕަރޭޝަން ސެންޓަރުން ވަނީ ބުނެފައެވެ.

އައްޑޫ އިމަރޖެންސީ އޮޕަރޭޝަން ސެންޓަރުން 9 މާރޗްގައި ނެރުނު ތަފާސް ހިސާބުތަކަށް ބަލާއިރު އެ ސިޓީން ޖުމްލަ 10900 މީހަކު ވަނީ ވެކްސިން ޖަހާފައެވެ.

އައްޑޫގައި 6 ފެބްރުއަރީ އިން ފެށިގެން މިހާތަނަށް ޖުމްލަ 4889 ސާމްޕަލް ނަގާފައިވެއެވެ. އައްޑޫސިޓީ އިން ޖުމްލަ 92 މީހަކު ކޮވިޑަށް ޕޮޒިޓިވްވެފައިވާއިރު އެއީ ހިތަދޫ އިން 22 މީހުންނާއި މަރަދޫފޭދޫ އިން 4 މީހުންނާއި ފޭދޫ އިން 17 މީހުންނާއި މީދޫ އިން 14 މީހުންގެ އިތުރުން އެމްޓީސީސީ ސައިޓުން ޕޮޒިޓިވްވި 35 މީހުންނެވެ.

އައްޑޫސިޓީގެ އިމަރޖެންސީ އޮޕަރޭޝަން ސެންޓަރުން ބުނީ ޖުމްލަ 207 ގެ ކަރަންޓީން ކުރެވިފައިވާ ކަަމަށެވެ. އަދި މިހާތަނަށް ބަލިން 86 މީހަކު ވަނީ ފަސޭހަވެފައެވެ.

އައްޑޫ ސިޓީން ކޮވިޑް-19ގެ ކޭސްތައް ފެނުމާ ގުޅިގެން ޚާއްސަ ފިޔަވަޅުތަކެއް ވަނީ އަޅާފައިވެއެވެ.