ރެއާލުގައި ރާމޯސް މަޑުކުރާނެކަން ޔަގީނެއް ނޫން: ޒިދާން

ރެއާލް މެޑްރިޑުގައި އެ ޓީމުގެ ކެޕްޓަން ސާޖިއޯ ރާމޯސް މަޑުކުރާނެކަމުގެ ޔަގީންކަމެއް ނެތް ކަމަށް ރެއާލުގެ ކޯޗު ޒިނެދިން ޒިދާން ބުނެފިއެވެ.

އުމުރުން 34 އަހަރުގެ ރާމޯސް ރެއާލާއެކު ހަދާފައިވާ އެއްބަސްވުން މި އަހަރުގެ ޖޫން މަހުގެ ނިޔަލަށް ހަމަވާނެ އެވެ. މިހާތަނަށް ރާމޯސްގެ އެއްބަސްވުން އާކުރަން ރެއާލުން ކުރި މަސައްކަތް ކާމިޔާބުވެފައިނުވާއިރު، ރާމޯސް ހޯދުމަށް ފްރާންސްގެ ޗެމްޕިއަން ޕީއެސްޖީ އާއި އިންގްލެންޑުގެ މެންޗެސްޓާ ޔުނައިޓެޑުން އަންނަނީ މަސައްކަތްކުރަމުންނެވެ.

މީގެ ކުރިންވެސް ރާމޯސް އަންނަ ސީޒަނުގައިވެސް ރެއާލުން ފެންނާނެތޯ ނޫސްވެރިން ތަކުރާރުކޮށް ސުވާލުކުރާތީ އެކަމާ ޒިދާން ހިތްހަމަނުޖެހުން ފާޅުކޮށްފައިވާއިރު، ދާދި ފަހުން އޮތް ނޫސްވެރިންގެ ބައްދަލުވުމެއްގައި ޒިދާން ވަނީ އަންނަ ސީޒަނުގައި ރާމޯސް މަޑުކުރާނެކަމުގެ ޔަގީންކަމެއް ނެތް ކަމަށް ބުނެފައެވެ. ޒިދާން ބުނީ ރާމޯސްގެ އެއްބަސްވުމުގެ ކަންކަން ހިނގަމުންދާ ގޮތް އޭނާއަށް ނޭނގޭ ކަމަށެވެ. އެކަމަކު ރާމޯސްއަކީ ރެއާލަށް މުހިންމު ކުޅުންތެރިއެއް ކަމަށާއި، އުންމީދަކީ އެއްބަސްވުން އާކުރުމަށްފަހު، އަންނަ ސީޒަނުގައިވެސް ރާމޯސް ރެއާލުގައި މަޑުކުރުން ކަމަށްވެސް ޒިދާން ވަނީ ބުނެފައެވެ.

މި ސީޒަނަށްފަހު ރެއާލް ދޫކޮށްލަން ރާމޯސް މަސައްކަތްކުރަމުން އަންނަ ކަމަށް ރިޕޯޓުތައް ބުނާއިރު، ރާމޯސްއަކީ ރެއާލަށް މިހާތަނަށް ހަތަރުވަނައަށް އެންމެ ގިނަ މެޗު ކުޅެދީފައިވާ ކުޅުންތެރިޔާއެވެ. ސެވިއްޔާ ދޫކޮށް 2005 ވަނަ އަހަރު ރެއާލާ ގުޅުނު ފަހުން އޭނާ ވަނީ ރެއާލަށް ކުޅުނު 668 މެޗުގައި 100 ލަނޑު ކާމިޔާބުކޮށްފައެވެ. އަދި އޭނާ ވަނީ ރެއާލާއެކު ސްޕެނިޝް ލީގު ފަސް ފަހަރު އަދި ޔުއެފާ ޗެމްޕިއަންސް ލީގު ހަތަރު ފަހަރު ކާމިޔާބުކޮށްފައެވެ.