ފުރަތަމަ ޑިގްރީ ސްކީމުގައި ތައުލީމު ހާސިލުކުރަމުންދާ މެޖޯރިޓީއަކީ އަންހެން ކުދިން ކަމަށާއި އެގޮތުން 6،788ށް އަންހެން ދަރިވަރުން ތައުލީމު ހާސިލު ކުރަމުންދާކަމަށް މިނިސްޓަރ އޮފް ހަޔަރ އެޑިއުކޭޝަން ޑރ. އިބްރާހިމް ހަސަން ވިދާޅުވެއްޖެއެވެ.

މިނިސްޓަރ ވިދާޅުވީ އުއްމީދަކީ ފުރަތަމަ ޑިގްރީ މަރުހަލާގައި އަންހެން ދަރިވަރުންގެ ނިސްބަތް ތައުލީމީ އެހެން ހަރުފަތްތަކުގައިވެސް ފެނިގެން ދިއުންކަމަށާ ވަޒީފާގެ ބާޒާރުގައި އަދި ޑިޒިޝަން މޭކިންގ ޕްރޮސެސްގައި ހާއްސަކޮށް ތައުލީމީ ދާއިރާގެ މަތީ ހަރުފަތްތަކުގައި އަންހެނުންގެ ހިއްސާ އިތުރުވެގެން ދިއުން ކަމަށެވެ.

ފުރަތަމަ ޑިގްރީ ސްކީމުގެ ކާމިޔާބީ ފާހަގަކުރުމަށްޓަކައި ބޭއްވި ރަސްމިއްޔާތެއްގައި ވާހަކަ ދައްކަވަމުން މިނިސްޓަރ ވިދާޅުވީ މި ކާމިޔާބީ ފާހަގަކުރާއިރު ދިވެހި ސަރުކާރުން މިހާތަނަށް 240 މިލިއަނަށް ވުރެ ގިނަ ދިވެހި ރުފިޔާ ދިވެހި ދަރިވަރުންނަށް ހޭދަކޮށްފައި ވާކަމަށެވެ. އަދި ވޭތުވެދިޔަ އެއްވެސް ސަރުކާރަކުން މިފަދަ އެއްވެސް ސްކީމަކަށް، މީހުން ބިނާ ކުރުމަށްޓަކައި މިހާ ބޮޑު އަދަދެއް ހޭދަކޮށްފައި ނުވާ ކަމަށެވެ.

އެގޮތުން މިހާރުވެސް މި ސްކީމުގެ އެހީގައި 7،100ށް ވުރެ ގިނަ ދަރިވަރުން މަތީތައުލީމު ހާސިލް ކުރަމުންދާއިރު މި ސްކީމް ކާމިޔާބު ސްކީމަކަށް ވެގެން ދަނީ ވަރަށް މުހިންމު ސަބަބު ތަކެއް ހުރެގެންކަމަށް ވިދާޅުވެ މިނިސްޓަރ ވިދާޅުވީ އޭގެ އެންމެ މުހިއްމު އެއް ސަބަބަކީ މިނިސްޓްރީ އޮފް ހަޔަރ އެޑިއުކޭޝަނާއި އެހެން ފަރާތްތަކާއި ގުޅިގެން އެއް އަމާޒަކަށް އެއް މަގްސަދެއްގައި ކުރެވިފައިވާ މަސައްކަތުގެ ނަތީޖާކަމަށެވެ.

ވަކިން ހާއްސަކޮށް މިނިސްޓްރީއާއި ރައީސުލްޖުމްހޫރިއްޔާގެ ޕޮލިސީ ސެކްޝަނާއިއެކު ކުރެވިފައިވާ ގާތް، ބޮޑެތި މަސައްކަތްތައް ފާހަގަ ކުރައްވާ މިނިސްޓަރ ވިދާޅުވީ ދިވެހިރާއްޖޭގެ ގައުމީ ޔުނިވަރސިޓީއާއި، ދިވެހިރާއްޖޭގެ އިސްލާމިކް ޔުނިވަރސިޓީ އަދި ރާއްޖޭގެ ހުރިހާ ޕްރައިވެޓް ކޮލެޖްތަކުގެ ހުރިހާ ވެރިން މި މަސައްކަތަށް ދެއްވި، އަދި މިހާރުވެސް ދެއްވަމުން ގެންދާ އެއްބާރުލުން އިޚްލާސްތެރިކަމާއިއެކު ފާހަގަކޮށް ޝުކުރުދަންނަވާ ކަމަށެވެ.

އިތުރަށް ވާހަކަ ދައްކަވަމުން މިނިސްޓަރ ވިދާޅުވީ ތައުލީމަށް ލޯބިކުރާ އެތައް ބައެއް މިއަދު މިގައުމުގައި އެބަތިބިކަމަށާއި މިއީ މި ސްކީމް ކާމިޔާބުވި އަނެއް ސަބަބު ކަމަށެވެ.

އަދި ވޭތުވެދިޔަ ދެއަހަރުގެ ތެރޭގައި މި ސްކީމަށް ބޮޑެތި ބަދަލުތަކެއް ގެނެސްފައި ވާކަމަށްވެސް ހަޔަރ އެޑިއުކޭޝަން މިނިސްޓަރ ޑރ. އިބްރާހިމް ހަސަން ވިދާޅުވިއެވެ.

މިނިސްޓަރ ވިދާޅުވީ މިއަދުގެ ދުނިޔޭގައި އެހެން ގައުމުތަކުގެ މީހުންނާއި ފައިހަމަ ކުރެވޭނީ ތައުލީމު އުނގެނި މަސައްކަތާއި ހުނަރު ދަސްކޮށްގެން ކަމަށެވެ. އަދި ދިމާވާ ބޮޑެތި ކާރިސާ ތަކުން އަރައިގަނެވޭނީވެސް އެކަންކަމާ ކުރިމަތިލާން އެނގޭ، އަދި އެ ކަންކަމާއި ކުރިމަތިލާން ކެރޭ، ބަޔަކު ތިބެގެން ކަމަށާއި އެއީ މިފަދަ ސްކީމުތަކުގެ ބޭނުން ކަމަށެވެ.

މީގެ އިތުރުން ގިނަ ދަރިވަރުން ތައުލީމު ހާސިލް ކުރަމުން ގެންދަނީ ރާއްޖެއަށް ބޭނުންވެފައިވާ ދާއިރާތަކުން ކަމަށް ވިދާޅުވިއެވެ. އަދި މިސަރުކާރުގެ ފުރަަތަމަ 100 ދުވަހުގެ ތެރޭގައި މުޅި ރާއްޖޭގައި ޓްރެއިނިންގ ނީޑްސް އެނާލިސިސްއެއް ހެދުނުކަމަށާއި ދާދިފަހުން އޭގެ ދެވަނަ ސްޓޭޖެއްގެ ގޮތުގައި ސަރުކާރުގެ ހުރިހާ ވުޒާރާއަކުން ކުރިއަށް އޮތް ތިން އަހަރަށް މީހުން ބިނާކުރަން ބޭނުންވާ ދާއިރާތަކާއި އެދާއިރާތަކުން މީހުން ބިނާ ކުރަން ބޭނުންވާ އަދަދު މިހާރު ހޯދާފައިވާ ކަމަށެވެ. އަދި ވަރަށް އަވަހަށް އެ ތަފާސްހިސާބު ޝާއިއު ކުރެވިގެން ދާނެކަން މިނިސްޓަރ ހާމަކުރެެއްވިއެވެ.

އަދި މިހާރު މަސައްކަތް ކުރަމުން ދަނީ ސަރުކާރުގެ އެކިއެކި ކުންފުނިތަކުން ހިންގާ ބޮޑެތި މަޝްރޫއުތަކަށާއި އެ ކުންފުނިތަކުގެ ތަސައްވަރު ހާސިލްކުރުމަށްޓަކައި ބޭނުންވާ ހިއުމަން ރިސޯސް ކެޕިޓަލްގެ މައުލޫމާތު އެއްކުރުމަށްކަމަށް ވިދާޅުވެ މިނިސްޓަރ ވިދާޅުވީ ކުރިމަގުގައި ސަރުކާރުން މީހުން ބިނާ ކުރުމަށް ކުރާ ހުރިހާ މަސައްކަތެއްގެ ފޯކަސްއަކަށް ވެގެންދާނީ މި ދިރާސާތަކުގެ ނަތީޖާއަށް ކަމަށެވެ.