މިއަހަރު ނިމުމުގެ ކުރިން ރާއްޖޭގެ ހުރިހާ ރަށެއްގައި ފެނާއި ނަރުދަމާގެ މަސައްކަތް ފެށިގެންދާނެ – ރައީސް
10 މާރިޗު 2021 | ބުދަ 12:18ރާއްޖޭގެ ހުރިހާ ރަށެއްގެ ފެނާއި ނަރުދަމާގެ މަސައްކަތްތައް ހުރީ ޓެންޓަރިންގ މަރުހަލާގައި
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ނޫސްވެރިންގެ ބައްދަލުވުމުގައި ވާހަކަދައްކަވަމުން ދަނިކޮށް
މިއަހަރު ނިމުމުގެ ކުރިން ރާއްޖޭގެ ހުރިހާ ރަށެއްގައި ފެނާއި ނަރުދަމާގެ މަސައްކަތް ފެށިގެންދާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހް ވިދާޅުވެއްޖެއެވެ.
ބުދަ ދުވަހު ނޫސްވެރިންނާ ބައްދަލުކުރައްވާ ބޭއްވެވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް ޞާލިޙް ވިދާޅުވީ ރާއްޖޭގެ ހުރިހާ ރަށެއްގެ ފެނާއި ނަރުދަމާގެ މަސައްކަތްތައް ހުރީ ޓެންޓަރިންގ މަރުހަލާގައި ކަމަށާއި މިއަހަރު ނިމުމުގެ ކުރިން ހުރިހާ ރަށެއްގެ ފެނާއި ނަރުދަމާގެ އަމަލީ މަސައްކަތް ފެށިގެންދާނެ ކަމަށެވެ.
ރައީސް ޞާލިޙް ވިދާޅުވީ ފެނާއި ނަރުދަމާއަކީ ރައްޔިތުންނަށް ނުހަނު ބޭނުންވެފައިވާކަމެއް ކަމަށާއި، ސަރުކާރުން ރައްޔިތުންގެ ބޭނުންތައް ފުއްދައިދޭނެ ކަމަށެވެ.
ރައީސް ޞާލިޙް މިހެން ވިދާޅުވިއިރު ނިމިދިޔަ ފެބްރުއަރީ މަހުވެސް ވަނީ 15 ރަށެއްގެ ފެނާއި ނަރުދަމާގެ ހިދުމަތް ގާއިމުކުރުމުގެ އެގްރީމަންޓްތަކުގައި ސޮއި ކޮށްފައެވެ.
މި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް އިތުރަށް ވިދާޅުވީ ރާއްޖޭގެ 5 ސަރަހައްދެއްގައި ގާއިމްކުރަމުންދާ ޓަރޝަރީ ހޮސްޕިޓަލުތަކުގެ މަސައްކަތްތައް އިތުރަށް ފުޅާކުރެވިފައިވާ ކަމަށެވެ. އަދި މި ސަރުކާރުގެ އެންމެ ބޮޑު ޕްރޮޖެކްޓްކަމަށްވާ ތައުލީމާގުޅޭ މަޝްރޫއުތައް ފުޅާ ކުރެވިފައިވާކަމަށާއި މިހާތަނަށް ހިލޭ ޑިގްރީގެ ދަށުން 10،000 ދަރިވަރުން ތައުލީމު ހާސިލް ކުރަމުން އަންނަ ކަމަށެވެ.
