އިންޓައަށް އެއްވަނައިގައި އަލުން ހަ ޕޮއިންޓުގެ ލީޑެއް

އިޓާލިއަން ލީގުގައި ހޯމަ ދުވަހުގެރޭ އެޓަލަންޓާ ބަލިކޮށް ތާވަލުގެ އެއްވަނައިގައި އިންޓަ މިލާނުން ހަ ޕޮއިންޓުގެ ލީޑެއް އަލުން ނަގައިފިއެވެ.

އަމިއްލަ ދަނޑުގައި ކުޅުނު މެޗުން އިންޓަ މޮޅުވީ 1-0 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ލަނޑެއް ފެނިފައި ނުވާއިރު، މެޗުގައި އިންޓައިން ޖެހި ހަމައެކަނި ލަނޑު ދެވަނަ ހާފު ފަށައިގެން ނުވަވަނަ މިނެޓުގައި ކާމިޔާބުކޮށްދިނީ މިލާން ސްކްރިނިއޭއެވެ. މިއީ މި ސީޒަނުގައި އޭނާ ކާމިޔާބުކުރި ތިންވަނަ ލަނޑެވެ. އޭގެ ފަހުން މި މެޗުގަައި ލީޑު ފުޅާކުރަން އިންޓަގެ ލަޓާރޯ މާޓީނޭޒް އާއި ރޮމެލޫ ލުކާކޫއަށް ވަނީ ރަނގަޅު ފުރުސަތުތަކެއް ލިބި ބޭކާރުވެފައެވެ.

މި މޮޅާއެކު ތާވަލުގެ އެއްވަނައިގައި އަލުން ހަ ޕޮއިންޓުގެ ލީޑެއް އިންޓައިން ނެގިއިރު، އެ ޓީމަށް ވަނީ ކުޅުނު 26 މެޗުން 62 ޕޮއިންޓް ލިބިފައެވެ. ދެވަނައިގައި އޮތް އޭސީ މިލާނަށް 26 މެޗުން 56 ޕޮއިންޓް ލިބިފައިވާއިރު، އެންމެ ފަހުގެ ޗެމްޕިއަން ޔުވެންޓަސް އޮތީ ތިންވަނައިގައި 25 މެޗުން 52 ޕޮއިންޓާއެކުއެވެ. އަދި އިންޓަ އަތުން ބަލިވި އެޓަލާންޓާ އޮތީ ތާވަލުގެ ފަސްވަނައިގައި 26 މެޗުން 49 ޕޮއިންޓާއެކުއެވެ.