އިޓަލީގެ އިންޓަރ މިލާން އަށް ކުޅެމުން އަންނަ ސްވިޒަލެންޑުގެ ގޯލު ކީޕަރު ޔަން ސޮމާ ދޫކޮށް ނުލާނެ ކަމަށް، އިންޓަރ މިލާންގެ ސްޕޯޓިން ޑިރެކްޓަރު ޕިއެރޯ އައުސިލިއޯ ބުނެފި އެވެ.

ޖަރުމަނުގެ ބަޔާން މިއުނިކް ދޫކޮށްލުމަށް ފަހު، އުމުރުން 36 އަހަރުގެ ސޮމާ އިންޓަރ މިލާާން އަށް ބަދަލުވީ 2023 ވަނަ އަހަރު އެވެ. އެ ކުލަބާ އެކު އޭނާ ސޮއި ކުރީ ތިން އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ.

ސޮމާގެ އެއްބަސްވުމުގައި ބާކީ އެއް އަހަރު އޮތް އިރު، އޭނާ ހޯދުމުގެ ޝައުޤުވެރިކަން ބައެއް ކުލަބުތަކުން ގެން ގުޅޭ ކަމަށް ވަނީ ރިޕޯޓު ކޮށްފަ އެވެ. އެގޮތުން ގަލަޓަސަރާއި އިން ސޮމާ ހޯދުމުގެ ޝައުޤުވެރިކަން ފާޅުކޮށް، އިންޓަރ އަށް ހުށަހެޅުމެއް ފޮނުވި ކަމަށް ރިޕޯޓު ކޮށްފައިވެ އެވެ.

އެކަމާ ގުޅޭ ގޮތުން ވާހަކަ ދައްކަމުން އިންޓަރގެ ސްޕޯޓިން ޑިރެކްޓަރު އައުސިލިއޯ ބުނީ، ގަލަޓަސަރާއި އަށް ބަދަލުވުމާ ގާތަށް ސޮމާ ދިޔަ ކަމަށް ބުނާ ވާހަކަ އަކީ ދޮގެއް ކަމަށާއި، އެފަދަ އެއްވެސް ކަމަެއް ހިނގާފައި ނެތް ކަމަށެވެ. ސޮމާ އަކީ އިންޓަރގެ ގޯލު ކީޕަރު ކަމަށާއި، އޭނާގެ އުންމީދަކީ ސޮމާ އެ ކުލަބުގައި މަޑު ކުރުން ކަމަށް ވެސް އައުސިލިއޯ ވަނީ ބުނެފަ އެވެ.

އިޓަލީގެ ބައެއް މީޑިއާ ތަކުގައި ބުނެފައިވާ ގޮތުން، އަންނަ އަހަރަށް ސޮމާގެ އެއްބަސްވުން ހަަމަވާން އޮތް ނަމަވެސް، އިންޓަރ މިލާން އިން އަންނަނީ އޭނާގެ އެއްބަސްވުން އައު ކުރުމުގެ މަޝްވަރާތަކެއް ކުރަމުންނެވެ. ނަމަވެސް، މިހާތަނަށް އެކަމުގައި ވަކި ނިންމުމެއް ނިންމާފައި ނުވާ ކަމަށް ބުނެފައިވެ އެވެ.

ސޮމާ ވަނީ އިންޓަރ މިލާންގައި މިހާތަނަށް ހޭދަ ކުރި ދެ ސީޒަންގެ ތެރޭގައި، 96 މެޗުގައި އެ ޓީމުގެ ގޯލު ބަލަހައްޓައިފަ އެވެ. އަދި އެ ކުލަބާ އެކު އޭނާ ވަނީ އިޓާލިއަން ލީގުގެ އިތުރުން، އިޓާލިއަން ސުޕަ ކަޕް ވެސް ކާމިޔާބު ކޮށްފަ އެވެ. މީގެ އިތުރުން، އިންޓަރ މިލާން އާއެކު މިދިޔަ ސީޒަންގެ ޔުއެފާ ޗެމްޕިއަންސް ލީގުގެ ފައިނަލްގައި ކުޅުނު ނަަމަވެސް، ފައިނަލްގައި ވަނީ ޕެރިސް ސެއިންޓް ޖާމަން (ޕީއެސްޖީ) އަތުން ބަލިވެފަ އެވެ.