ޕަވާޑް ހޯދުމަށް ސައުދީގެ ނިއޯމް އިން މަސައްކަތް ކުރަނީ

އިންޓަރ މިލާން އަށް ކުޅެމުން އަންނަ ފްރާންސްގެ ޑިފެންޑަރު ބެންޖަމިން ޕަވާޑް ހޯދުމަށް، ސައުދީ ޕްރޯ ލީގުގެ ނިއޯމް އިން މަސައްކަތް ކުރަމުން އަންނަ ކަމަށް މީޑިއާ ރިޕޯޓުތައް ބުނެފި އެވެ.

ޖަރުމަނުގެ ބަޔާން މިއުނިކް ދޫކޮށްލުމަށް ފަހު، އުމުރުން 29 އަހަރުގެ ކުުޅުންތެރިޔާ އިންޓަރ މިލާން އަށް ބަދަލުވީ 2023 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައިވާ ފަސް އަހަރު ދުވަހުގެ އެއްބަސްވުމުގެ މުއްދަތު ހަމަވާން އޮތީ 2028 ވަނަ އަހަރުގެ ޖޫން މަހުގެ ނިޔަލަށެެވެ.

އިންޓަރ މިލާނާއެކު ޕަވާޑު ސޮއި ކޮށްފައިވާ އެއްބަސްވުމުގައި ބާކީ ތިން އަހަރު އޮތް ނަމަވެސް، އޭނާ ހޯދުމުގެ މަސައްކަތް ނިއޯމް އިން ކުރަމުން އަންނަ ކަމަށް ވަނީ ބުނެފަ އެވެ. އެގޮތުން އެ ކުލަބުން އަންނަނީ އިންޓަރ މިލާން އާއެކު މަޝްވަރާ ކުރުމަށް ތައްޔާރު ވަމުން ކަމަށް ވެސް ބުނެފައިވެ އެވެ.

ޕަވާޑް ހޯދުމަށް ނިއޯމް އިން އިންޓަރ މިލާނާ އެކު މަޝްވަރާ ކުރި ނަމަވެސް، އެ ކުލަބަށް ބަދަލުވުމާ މެދު ގޮތެއް ނިންމާނީ ޕަވާޑް ކަމަށް ރިޕޯޓުތައް ބުނެ އެވެ. އެގޮތުން ސައުދީ ލީގަށް ބަދަލުވުމާ މެދު މިހާތަނަށް ޕަވާޑް ވަކި ގޮތެއް ނިންމާފައި ނުވާއިރު، އޭނާގެ ނިންމުން މުހިންމު ވާނެ ކަމަށް ބުނެފައިވެ އެވެ.

ފްރާންސްގެ މީޑިއާ ތަކުގައި ބުނެފައިވާ ގޮތުން ނިއޯމްގެ އިތުރުން، ބައެއް އެހެން ކުލަބު ތަކުން ވެސް ވަނީ ޕަވާޑް ހޯދުމުގެ ޝައުޤުވެރިކަން ފާޅު ކޮށްފަ އެވެ. އެގޮތުން އޭނާ ކުރިން ކުޅުނު ފްރާންސް ލީލް އާއި، ތުރުކީގެ ގަލަތަސަރާއީ އިން ވެސް ޕަވާޑް ހޯދުމުގެ ޝައުޤުވެރިކަން ގެން ގުޅޭ ކަމަށް ބުނެފައިވެ އެވެ.

ލީލް އިން ސީނިއާ ކެރިއަރު ފެށި ޕަވާޑް ވަނީ ސްޓަޓްގާޓްގެ އިތުރުން ބަޔާން އަށް ވެސް ކުޅެފަ އެވެ. އިންޓަރ މިލާން އަށް ބަދަލުވުމުގެ ކުރިން ޕަވާޑް ވަނީ ބަޔާން އާއެކު ހޭދަ ކުރި ފަސް ސީޒަންގެ ތެރޭގައި އެ ޓީމަށް 163 މެޗު ކުޅެދީ 12 ލަނޑު ޖަހައިފަ އެވެ. އަދި ބަޔާން އާއެކު ޕަވާޑް ވަނީ 11 ތައްޓެއް ވެސް ކާމިޔާބު ކޮށްފަ އެވެ.

ބަޔާން ދޫކޮށްލުމަށް ފަހު އިންޓަރ މިލާން އަށް ބަދަލުވުމަށް ފަހު، މިހާތަނަށް އެ ކުލަބާ އެކު ހޭދަ ކުރި ދެ ސީޒަންގެ ތެރޭގައި ޕަވާޑް ވަނީ އެ ކުލަބަށް ކުޅެދިން 69 މެޗުގައި އެއް ލަނޑު ޖަހައިފަ އެވެ. އަދި އިންޓަރ މިލާނާ އެކު އޭނާ ވަނީ އިޓާލިއަން ލީގުގެ އިތުުރުން އިޓާލިއަން ސުޕަ ކަޕް ވެސް ކާމިޔާބު ކޮށްފަ އެވެ. މިދިޔަ ސީޒަންގެ ޔުއެފާ ޗެމްޕިއަންސް ލީގުގެ ފައިނަލްގައި ވެސް ޕަވާޑް ވަނީ އިންޓަރ މިލާނާ އެކު ކުޅެފަ އެވެ.

ފްރާންސް ޤައުމީ ޓީމުގައި ވެސް ހިމެނޭ ޕަވާޑް ވަނީ ޤައުމީ ޓީމަށް 55 މެޗު ކުޅެދީ ފަސް ލަނޑު ޖަހައިފަ އެވެ. ފްރާންސް އާއެކު އޭނާ ވަނީ 2018 ވަނަ އަހަރުގެ ފީފާ ވޯލްޑް ކަޕް، އަދި 21-2020 ވަނަ އަހަރުގެ ޔުއެފާ ނޭޝަންސް ލީގު ވެސް ކާމިޔާބު ކޮށްފަ އެވެ.