ވިސާ ނެތި ލަންކާގައި އުޅުނު ދިވެހިންތަކެއް ހައްޔަރުކޮށްފި
7 މާރިޗު 2021 | އާދީއްތަ 15:10އެމީހުން ހައްޔަރުކުރީ ލަންކާގެ ހަތަރު ސަރަހައްދަކުން
ލަންކާ ފުލުހުން
ވިސާ ނެތި އަވަށްޓެރި ސްރީލަންކާގައި އުޅުނު ދިވެހިންތަކެއް ހައްޔަރުކޮށްފިއެވެ.
އެ ގައުމުގެ ފުލުހުންގެ ތަރުޖަމާނާ ހަވާލާދީ އެގައުމުގެ ނޫސްތަކުން ރިޕޯޓުކޮށްފައިވާ ގޮތުގައި، ހައްޔަރުކޮށްފައި ވަނީ ހަތަރު މީހެކެވެ. އެމީހުން ހައްޔަރު ކުރީ މައުންޓް ލަވީނިއާ ސަރަހައްދަާއި، މޮރަޓުވާ ސަރަހައްދާއި، ޑެހިވާލާ ސަރަހައްދާއި، ސްލޭޑް އައިލެންޑް އެންޑް ގްރޭންޕާސް ޕޮލިސް ސަރަހައްދުން ކަމަށް ވެސް ބުނެފައިވެއެވެ. އަދި އެ އެންމެން ހައްޔަރު ކުރީ ލަންކާގެ ކޮލަންބޯގައި ހިންގި ހާއްސަ އޮޕަރޭޝަނެއްގައި ކަމަށާއި، އެމީހުންނާ އެކު ނައިޖީރިއާގެ ތިން މީހަކާއި އިންޑިއާގެ ދެ މީހަކުވެސް ހައްޔަރުކޮށްފައިވާކަމަށް ބުނެފައިވެއެވެ.
އެކަމާ ގުޅިގެން ފޮރިން މިނިސްޓްރީގެ އޮފިޝަލަކު "ރާއްޖެ އެމްވީ"އަށް ބުނީ އެ ހަތަރު މީހުންނަކީވެސް އެ ގައުމަށް ގޮސް އުޅެނިކޮށް ވިސާގެ މުއްދަތު ހަމަވުމުން ވިސާ އައު ނުކޮށް އުޅޭ ބައެއް ކަމަށެވެ. އަދި އެގޮތަށް އުޅޭތާ ވަރަށް ގިނަ ދުވަސްވެފައިވާ ކަމަށާއި، މިވަގުތު އެމީހުންގެ އިތުރު މައުލޫމާތު ހާމަކުރެވެން ނެތް ކަމަށެވެ.
މިނިސްޓްރީން ބުނީ މިހާރު އެ ހަތަރު މީހުންނަށްވެސް ކޮންސިއުލޭޓް އެހީ ފޯރުކޮށްދެމުން އަންނަ ކަމަށެވެ. އަދި ރާއްޖެއިން ބޭރުގެ ހުރިހާ ގައުމެއްގައި އުޅޭ މީހުންވެސް ގަވާއިދުތަކަށް ހުރުމަތްތެރިކޮށް ހިތާ ވިސާ އައުކޮށްގެން އުޅުމަށް އިލްތިމާސްކުރާ ކަމަށްވެސް ބުނެފައިވެއެވެ.
ސްރީލަންކްގާއި ވިސާއާ ނުލާ އުޅެމުން އައި ބަޔަކު ހައްޔަރުކޮށްފައިވާއިރު މީގެ ކުރިން 2019 ވަނަ އަހަރުވެސް އެ ގައުމުގައި ދިން ޓެރަރިސް ހަމަލާއަށްފަހު އެގައުމުގެ ކަމާބެހޭ އިދާރާތަކުން ބެލި ބެލުމުގައި އެގައުމުގައި ވިސާ ނެތި ދިރިއުޅޭ ދިވެހިން ހައްޔަރުކޮށްފައިވެއެވެ. އޭރު ރާއްޖެ ސަރުކާރާ ގުޅިގެން އެމީހުން ވަނީ ރާއްޖެ ފޮނުވާފައެވެ. އެ ހާދިސާއަށް ފަހު ލަންކާގައި އަންނަނީ ވިސާގެ ކަންކަން ވަރަށް ހަރުކަށިކޮށް ބަލަހައްޓަމުންނެވެ.
