ބްރޯޑްކޮމްގެ ހުސްވެެފައިވާ މަގާމަށް މުހައްމަދު ފަޒީން ހޮވުމަށް މަޖިލީހުން ފާސް ކޮށްފި
މުހައްމަދު ފަޒީން ހޮވުމަށް ފެންނަކަމަށް ނިންމާފައިވަނީ އެކަމަށްޓަކައި ނެގުނު ވޯޓުގައި ބައިވެރިވި 55 މެންބަރުންގެ އިއްތިފާގުން
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް އަދި މުހައްމަދު ފަޒީން
މޯލްޑިވްސް ބްރޯޑްކާސްޓިންގ ކޮމިޝަން (ބްރޯޑްކޮމް)ގެ ހުސްވެެފައިވާ މަގާމަށް މުހައްމަދު ފަޒީން ހޮވުމަށް މަޖިލީހުން ފާސް ކޮށްފިއެވެ.
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި މުހައްމަދު ފަޒީން ހޮވުމަށް ފެންނަކަމަށް ނިންމާފައިވަނީ އެކަމަށްޓަކައި ނެގުނު ވޯޓުގައި ބައިވެރިވި 55 މެންބަރުންގެ އިއްތިފާގުންނެވެ.
ބްރޯޑްކޮމްއަށް އައްޔަނުކުރުމަށް މަޖިލީހުން ފާސްކުރި މުހައްމަދު ފަޒީނަކީ ރާއްޖެޓީވީގައި ސީނިއަރ ޖަރނަލިސްޓެއްގެ ގޮތުގައި މަސައްކަތްކުރަމުން އަންނަ ފަރާތެކެވެ. ނޫސްވެރިކަމުގެ ދާއިރާއިން ގިނަ ތަޖުރިބާތަކެއް ހުރި ފަޒީން ބޮޑަށް ޚާއްސަވެފައިވަނީ ސިޔާސީ ދާއިރާއަށެވެ. ވަކިން ޚާއްސަކޮށް މަޖިލިސްއާއި ކޯޓުގެ ޚަބަރުތައް ކަވަރުކުރުމުގައި ފަޒީނަކީ ފުންނާބު އުސް ނޫސްވެރިއެކެވެ.
ބްރޯޑްކޮމްގެ ހުސްވެެފައިވާ މަގާމަށް މެމްބަރަކު ޢައްޔަނުކުރުމަށް ހުޅުވާލި ފުރުޞަތުގައި އެކަމަށް ކުރިމަތިލީ 11 ބޭފުޅެއްގެ ނަން ދިރާސާ ކުރުމަށް ފަހު މިނިވަން މުއައްސަސާތަކުގެ ކޮމިޓީން ބ. ތުޅާދޫ ހޭޒްލީން، މުހައްމަދު ފަޒީން އަދި ޏ. ފުވައްމުލަކު މާދަނޑު، އާސާން، ޝިފްޒާ މުސްތަފާއަށް ރުހުން ދިނުމަށް ފެންނަކަމަށް ނިންމާފައިވާއިރު މި މައްސަލަ ދިރާސާކޮށް ނިންމިގޮތުގެ ރިޕޯޓުގައި މިނިވަން މުއައްސަސާތަކުގެ ކޮމިޓީން ބުނީ ރައީސުލްޖުމްހޫރިއްޔާ ނަން ފޮނުވާފައިވާ ފަރާތްތަކާ ކޮމިޓީން އިންޓަރވިއު ކުރެއްވުމަށްފަހު، ރައްޔިތުންގެ މަޖިލީހުގެ ގަވާއިދުގެ 201 ވަނަ މާއްދާގެ(ށ) ގައިވާ ގޮތުގެމަތިން ރައްޔިތުންގެ މަޖިލީހުގެ ތަޅުމަށް ފޮނުވާނެ ނަމެއް ކަނޑައެޅުމަށްޓަކައި ކޮންމެ ނަމަކަށް ވަކިވަކިން ވޯޓަށް އަހާފައިވާނެ ކަމަށެވެ.
އެގޮތުން މި ދެ ނަން ފާސްކޮށްފައިވަނީ ކޮމިޓީގެ ބައްދަލުވުމަށް ހާޒިރުވެވަޑައިގެން ވޯޓު ދިން މެންބަރުންގެ 2/3 (ތިންބައިކުޅަ ދެބައި) އަޣުލަބިއްޔަތުން ކަމަށް އެ ރިޕޯޓުގައިވެއެވެ.
ބްރޯޑްކޮމްއަށް މެމްބަރަކު މި ޢައްޔަންކުރީ މިދިޔަ އަހަރުގެ އޮކްޓޫބަރު މަހުގެ 28 ވަނަ ދުވަހު ކޮމިޝަންގެ މެންބަރުކަމުން ޒީނާ ޒާހިރު އިސްތިޢުފާ ދެއްވުމާ ގުޅިގެންނެވެ. ބްރޯޑްކޮމްގައި ހަތް މެމްބަރުން ތިބެންޖެހެއެވެ. އެގޮތުން މި ވަގުތު ކޮމިޝަންގައި ތިއްބެވީ ކޮމިޝަންގެ ރައީސް މަރިޔަމް ވަހީދާ، ނައިބު ރައީސް އަހުމަދު ގައިސް، ކޮމިޝަނަރ އަމްޖަދު ވަހީދު، ކޮމިޝަނަރ އަލީ ޔޫސުފް، ކޮމިޝަނަރ އާމިނަތު އަމީނާ އަދި ކޮމިޝަނަރ އާމިނަތު ސަރާހަތު އިއްޒަތެވެ.
