ވީއައިއޭގައި ވެކްސިނޭޝަން ޕްރޮގްރާމް ފަށައިފި
އެއަރޕޯޓް ފާސް އޮންނަ ކޮންމެ ފަރާތަކަށް ވެސް ވެކްސިންޖެހޭނެ
ެއެމްއޭސީއެލް ވެކްސިނޭޝަން ޕްރޮގްރާމްގެ ތެރެއިން
މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ވެލާނާ އިންޓަނޭޝަނަލް އެއަރޕޯޓް (ވީއައިއޭ)ގައި ކޮވިޑް-19 ވެކްސިނޭޝަން ޕްރޮގްރާމް ފަށައިފިއެވެ.
މާރޗް މަހުގެ އެއް ވަނަ ދުވަހު ވީއައިއޭގައި ވެކްސިނޭޝަން ޕްރޮގްރާމް ފަށާފައިވާއިރު، ފުރަތަމަ ދުވަހު 140 މީހުންނަށް ވެކްސިން ޖަހާފައިވާ ކަމަށް އެމްއޭސީއެލް އިން ބުނެއެވެ.
އެމްއޭސީއެލްއިން މައުލޫމާތުދޭ ގޮތުގައި އެއަރޕޯޓް ރެކްރިއޭޝަން ސެންޓަރުގައި ވެކްސިންޖެހުމުގެ ކަންތައްތައް ކުރިއަށް ދާނީ އާދިއްތަ ދުވަހުން ބުރާސްފަތި ދުވަހަށް، ހެނދުނު 09:00ން ހަވީރު 04:00ށް އަދި ހޮނިހިރު ދުވަހު ހެނދުނު 10:00ން ހަވީރު 03:00ށް ށެވެ. އަދި ވެކްސިން ޖަހަން ބޭނުންވާ ފަރާތްތަކަށް ކިއުބީ އެޕް މެދުވެރިކޮށް ރެޖިސްޓަރ ކުރެވޭނެކަމަށް އެކުންފުނިން ބުނެއެވެ.
އެއަރޕޯޓް ފާސް އޮންނަ ކޮންމެ ފަރާތަކަށްވެސް ވެކްސިން ޖެހޭނެކަން ހާމަކޮށްފައިވާއިރު، އެއަރޕޯޓް ފާސް އޮތް ހުރިހާ ފަރާތްތަކުން ވެކްސިންޖެހުމަކީ އެމްއޭސީއެލްއިން ވަރަށް ބޮޑަށް އިލްތިމާސްކުރާ ކަމެއް ކަމަށް ރާއްޖެއެމްވީއާ ވާހަކަދައްކަވަމުން އެމްއޭސީއެލްގެ ޖެނެރަލް މެނޭޖަރ ކޯޕަރޭޓް ކޮމިއުނިކޭޝަންސް ހަސަން އަރީފް ވިދާޅުވިއެވެ. އަދި އެއަރޕޯޓްގައި ވައިޑްކޮށް މިފަދަ ޕްރޮގްރާމެއް ހިންގުމުގެ މަޤްސަދަކީ ވީއައިއޭގެ އޮޕަރޭޝަންތައް އެންމެ ފުރިހަމަ ގޮތުގައި ކުރިއަށް ގެންގޮސް، މުވައްޒަފުންނާއި ދަތުރުވެރިންނަށް ރައްކާތެރި މާހައުލެއް ކަށަވަރު ކޮށްދިނުން ކަމަށް ހަސަން އަރީފް ވިދާޅުވިއެވެ.
ހަސަން ވިދާޅުވީ އެމްއޭސީއެލްއިން އިސްނަގައިގެން ފެށި މި ޕްރޮގްރާމްގެ އަމާޒަކީ ދުނިޔޭގެ އެއަރޕޯޓްތަކުގެ ތެރެއިން އެއަރޕޯޓްގައި މަސައްކަތްކުރާ ހުރިހާ މުވައްޒަފުންނަށް ވެކްސިންދިން ފުރަތަމަ އެއަރޕޯޓަށް ވީއައިއޭވުން ކަމަށެވެ.
ކޮވިޑް-19 އާ ގުޅިގެން ރާއްޖޭގެ މައި އެއަރޕޯޓަކީ ރައްކާތެރި ތަނެއްގެ ގޮތުގައި ހެދުމަށް އެމްއޭސީއެލް އިން ވަނީ ގިނަ ފިޔަވަޅުތަކެއް އަޅައިފައެވެ. ބަލިމަޑުކަމާއެކު އެއަރޕޯޓްގެ އޮޕަރޭޝަންތަކަށް ބުރޫނާރާނެ ގޮތަށް އޮޕަރޭޓްކުރަމުން ދިޔަނަމަވެސް، އެއަރޕޯޓްގެ މުވައްޒަފުންނާއި ދަތުރުވެރިންގެ ރައްކާތެރިކަމަށް އެމްއޭސީއެލްއިން ޚާއްސަ ސަމާލުކަމެއްދެއެވެ. މީގެ ނަތީޖާއެއްގެ ގޮތުން އެމްއޭސީއެލްއަށް ވަނީ ހަ މަސް ދުވަހުގެ ތެރޭގައި ބައިނަލްއަޤުވާމީ ދެ އެވޯޑެއް ލިބިފައެވެ. އެއީ އެއަރޕޯޓް ކައުންސިލް އިންޓަނޭޝަނަލް (އޭސީއައި)ގެ ވޮއިސް އޮފް ކަސްޓަމަރ އެވޯޑް އާއި އެއަރޕޯޓް އެކްރެޑޭޝަން ހެލްތު ސެޓްފިކެޓެވެ. އޭޝިއާ ޕެސިފިކުން މި ސެޓްފިކެޓްގެ ދެވަނަ ރާއްޖެއަށް ލިބިފައިވާއިރު، އެއް ވަނަ ލިބިފައިވަނީ ދެކުނު ކޮރިއާގެ އިންޗިއޯން އިންޓަނޭޝަނަލް އެއަރޕޯޓަށެވެ. އަދި މުޅި ދުނިޔެއިން މިއެވޯޑްގައި ވީއައިއޭ ހިމެނިފައިވަނީ 12 ވަަނައިގައެވެ.
