ދުނިޔޭގެ އެންމެ ފުރަތަމަ 1 ޑޯޒް ޖަހާ ޖޯންސަން އެންޑް ޖޯންސަން ވެކްސިން އިމަޖެންސީ ހާލަތުގައި ބޭނުންކުރުމުގެ ހުއްދަ އެމެރިކާއިން ދީފިއެވެ.

އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަންގެ ޚާއްސަ ޓީމަކުން ޖޯންސަން އެންޑް ޖޯންސަން އިން ކޮވިޑަށް އުފައްދާފައިވާ ވެކްސިން އެމަރޖެންސީކޮށް ބޭނުންކުރުމުގެ ހުއްދަ ދިނުމުގެ މަޝްވަރާތައް މިދިޔަ ހުކުރު ދުވަހު ފަށާފައިވާއިރު، އެ ޓީމުން މިވަނީ މި ވެކްސިން އިމަޖެންސީ ހާލަތުގައި ބޭނުންކުރުމުގެ ހުއްދަ ދީފައެވެ. އެހެން ވެކްސިންތަކާ ޚިލާފަށް ޖޯންސަން އެންޑް ޖޯންސަން އިން ކޮވިޑަށް އުފެއްދި ވެކްސިންގައި ޖަހާނީ އެންމެ ޑޯޒެކެވެ. އަދި މިއީ ކޮވިޑަށް އުފެއްދި ވެކްސިންތަކުގެ ތެރެއިން އެއް ޑޯޒް ޖަހާގޮތަށް މިހާތަނަށް އައިއިރު އުފެއްދި ހަމައެކަނި ވެކްސިންކަން ވެސް ފާހަގަކޮށްލެވެއެވެ.

މިޓީމުން ވެކްސިން ޖެހުމުގެ ހުއްދަދޭން ނިންމާ އެކަން އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަންއަށް އެންގުމުން، އެކަން މިހާރު މިވަނީ އެފްޑީއޭއިން ހާމަކޮށް އިމަޖެންސީގައި ބޭނުންކުރުމުގެ ހުއްދަ ދީފައެވެ. މިޓީމުން ވަނީ މި ވެކްސިން ޖަހައިގެން އުމުރުން 18 އަހަރުން މަތީގެ މީހުންނަށް ވައިރަހުން ރައްކާތެރިވާ މިންވަރު ބަލާފައެވެ. އެގޮތުން މިހާތަނަށް ކުރިޔަށް ގެންގޮސްފައިވާ ދިރާސާތަކަށް ބަލާއިރު 44،000 މީހުން ގަޔަށް ވެކްސިން ޖަހައިގެން ކުރިޔަށް ގެންދިޔަ ޓްރެއަލްގެ ނަތީޖާއިން ދައްކާފައިވަނީ ވައިރަސް ޖެހިގެން ހާލަތު އެންމެ ގޯސް މިންވަރަށް ދިޔުމުގައި ޖޯންސަން އެންޑް ޖޯންސަންގެ ވެކްސިނުން 66 އިންސައްތަ ރައްކާތެރިކަން ލިބޭ ކަމަށެވެ.

އެއް ޑޯޒް ދޭ މިވެކްސިން ކާމިޔާބުވާ މިންވަރު އެކި ހިސާބުތަކުގައި ތަފާތެވެ. އެމެރިކާގައި ވެކްސިން ޖެހުމަށްފަހު 14 ދުވަސް ފަހުން ބެލިއިރު ވެކްސިނުން ރައްކާތެރިކަން ލިބޭ މިންވަރު ހުރީ 74 އިންސައްތައިގައެވެ. އަދި އޭގެ ދެ ހަފްތާފަހުން ބެލިއިރު ރައްކާތެރިކަން ލިބޭ މިންވަރު ހުރީ 72 އިންސައްތައިގައެވެ. މިވެކްސިނުން ވައިރަހުން ކުރާ އަސަރު މެދުމިނާ ހިސާބަށް ދިޔުމާއި ހާލަތު ގޯސްވުން ހުއްޓުވައިދެނީ 64 އިންސައްތައަށެވެ. މިއީ ދެކުނު އެފްރިކާ ގައި ވެކްސިން ޖެހުމަށްފަހު 28 ދުވަސް ފަހުން ބެލިއިރު ހާމަވި ނަތީޖާއެކެވެ.

ޖޯންސަން އެންޑް ޖޯންސަންގެ ވެކްސިން ޖެހިތާ 28 ދުވަސް ފަހުން ބެލިއިރު ވައިރަސް ޖެހިގެން އެއްވެސް މީހަކު ހޮސްޕިޓަލްގައި އެޑްމިޓްކުރަން ނުޖެހުނުއިރު ވެކްސިން ޖެހި އެއްވެސް މީހަކު މަރުވެފައެއް ވެސް ނުވެއެވެ. ޖޯންސަން އެންޑް ޖޯންސަން ވެކްސިން ރެފްރިޖެރޭޓަރުގައި އާދައިގެ ފިނިހޫނު މިނުގައި ބެހެއްޓޭނެއެވެ. އަދި އެމްއާރުއެންއޭ ބޭނުންކޮށްގެން އުފައްދާފައިވާ މޮޑާނާ އާއި ފައިޒަރ ވެކްސިން ރައްކާކޮށް އެކިތަންތަނަށް އުފުލުގައި ބަހައްޓަންޖެހޭ ފިނިމިނުގައި ޖޯންސަން އެންޑް ޖޯންސަން ވެކްސިން ބަހައްޓާކަށް ނުޖެހެެއެވެ. އެހެންކަމުން މިވެކްސިން އެއްތަނުން އަނެއްތަނަށް އުފުލުމަށް ވެސް ފަސޭހަވާނެއެވެ.

އަންނަ ހަފްތާތެެރޭގައި ޖޯންސަން އެންޑް ޖޯންސަންގެ ތިނަކާއި ހަތަރު މިލިއަނާ ދެމެދުގެ ވެކްސިން ޑޯޒް ފޯރުކޮށްދޭން ފަށާނެކަމަށް ވަނީ ބެލެވިފައެވެ.