ހުރާ ކައުންސިލުން ފައިސާ ލިބުނު ގޮތާއި ހޭދަކުރެވުނު ގޮތުގެ ބަޔާނުގައި ސައްޙަ ނޫން އަދަދެއް ހިމަނާފައިވާކަން އޮޑިޓް ރިޕޯޓުން ހާމަވެއްޖެ

ހުރާ ކައުންސިލުން ފައިސާ ލިބުނު ގޮތާއި ހޭދަކުރެވުނު ގޮތުގެ ބަޔާނުގައި ސައްޙަ ނޫން އަދަދެއް ހިމަނާފައިވާކަން 2016 ވަނަ އަހަރުގެ މާލީ ބަޔާންތަކުގެ އޮޑިޓް ރިޕޯޓުން ހާމަވެއްޖެއެވެ.

މި ރިޕޯޓުގައި ބުނީ މާލެއަތޮޅު ހުރާ ކައުންސިލް އިދާރާގެ 31 ޑިސެންބަރު 2016 އަށް ނިމުނު މާލީ އަހަރުގެ "ފައިސާ ލިބުނުގޮތާއި ހޭދަކުރެވުނު ގޮތުގެބަޔާން" ގައި، "އަހަރު ނިމުނު އިރު ހުރި ފައިސާ އާއި ފައިސާގެ ގޮތުގައި ބެލެވޭ ތަކެތި" މި އައިޓަމަށް ހަވާލާދޭ ނޯޓް ނަންބަރު 24ގައި ކައުންސިލްގެ އިދާރާގެ ނަމުގައި ސްޓޭޓް ބޭންކް އޮފް އިންޑިއާގައި އޮންނަ ރުފިޔާ އެކައުންޓްގައި 31 ޑިސެންބަރު 2016ގެ ނިޔަލަށް ހުރިކަމަށް ބޭންކް ސްޓޭޓްމަންޓުން ދައްކާ 216,082 (ދެ ލައްކަ ސޯޅަ ހާސް އަށްޑިހަ ދެއެއް) ރުފިޔާ އާއި، ޔޫ.އެސް ޑޮލަރު އެކައުންޓްގައި 31 ޑިސެންބަރު 2016ގެ ނިޔަލަށް ހުރި ކަމަށް ބޭންކް ސްޓޭޓްމަންޓުން ދައްކާ 15,851 (ފަނަރަ ހާސް އަށް ސަތޭކަ ފަންސާސްއެކެއް) ޔޫ.އެސް ޑޮލަރު ހިމަނާފައި ނުވާކަން ފާހަގަކުރެވޭ ކަމަށެވެ.

Advertisement

މީގެއިތުރުން، ކައުންސިލްގެ އިދާރާގެ ނަމުގައި ބޭންކް އޮފް މޯލްޑިވްސްގައި އޮންނަ ރުފިޔާ އެކައުންޓްގައި 31 ޑިސެންބަރު 2016ގެ ނިޔަލަށް ހުރިކަމަށް ބޭންކް ސްޓޭޓްމަންޓުން ދައްކާ 1,173,776 (އެއްމިލިއަން އެއް ލައްކަ ހަތްދިހަ ތިން ހާސް ހަތް ސަތޭކަ ހަތްދިހަ ހައެއް) ރުފިޔާއާއި ނޯޓް ނަންބަރު 24 ގައި ބަޔާންކޮށްފައިވާ އަދަދު ދިމާނުވާކަމާއި، މި އަދަދު ރިކޮންސައިލް ކުރުމުގެ ގޮތުން ބޭންކް ރިކޮންސިލިއޭޝަން ސްޓޭޓްމަންޓް ތައްޔާރު ކޮށްފައިނުވާކަން ވެސް ފާހަގަކުރެވިފައިވާ ކަމަށް ރިޕޯޓުގައި ބުނެއެވެ.

ހަމައެއާއެކު، ކައުންސިލް އިދާރާއިން ތިޖޫރީގައި ބަހައްޓާ ފައިސާގެ "ތިޖޫރީ ބާކީ ފޮތް" އޮޑިޓަށް ހުށަހަޅާފައި ނުވުމުގެ ސަބަބުން، އަހަރު ނިމުނުއިރު އަތުގައި ހުރި ފައިސާގެ ގޮތުގައި ހިމަނާފައިވާ 6,575 (ހަ ހާސް ފަސް ސަތޭކަ ހަތްދިހަ ފަހެއް) ރުފިޔާގެ ޞައްޙަކަންކަށަވަރު ކުރެވެން ނެތްކަން ފާހަގަކުރުމާއެކު މީގެ ސަބަބުން، "ފައިސާ ލިބުނުގޮތާއި ހޭދަކުރެވުނު ގޮތުގެ ބަޔާން"ގެ "އަހަރު ނިމުނު އިރުހުރި ފައިސާ އާއި ފައިސާގެ ގޮތުގައި ބެލެވޭ ތަކެތި" އަށް ހަވާލާދޭ ނޯޓް ނަންބަރު 24 ގައި ހިމަނާފައިވާ 1,410,944 (އެއް މިލިއަންހަތަރު ލައްކަ ދިހަ ހާސް ނުވަ ސަތޭކަ ސާޅީސް ހަތަރެއް) ރުފިޔާއަކީ ޞައްޙަ އަދަދެއް ނޫންކަމަށް އޮޑިޓް ރިޕޯޓުގައިވެއެވެ.

މީގެ އިތުރުން "އަހަރު ނިމުނު އިރު ހުރި ފައިސާ އާއި ފައިސާގެ ގޮތުގައި ބެލެވޭ ތަކެތި"ގެ ގޮތުގައި 923,694(ނުވަ ލައްކަ ތޭވީސް ހާސް ހަ ސަތޭކަ ނުވަދިހަ ހަތަރެއް) ރުފިޔާ ހިމަނާފައި ވީނަމަވެސް، މި އަދަދަށް ހަވާލާދީފައިވާ ނޯޓު ނަންބަރު 24 ގައި އަހަރު ނިމުނުއިރު ހުރި ޖުމްލަ އަދަދުގެ ގޮތުގައި ހިމަނާފައިވަނީ 1,410,944 (އެއް މިލިއަން ހަތަރު ލައްކަ ދިހަ ހާސް ނުވަސަތޭކަ ސާޅީސް ހަތަރެއް) ރުފިޔާ ކަމަށް އޮޑިޓް ރިޕޯޓުގައި ބަޔާން ކޮށްފައިވެއެވެ.

(ހ) ދައުލަތުގެ މާލިއްޔަތުގެ ގަވާއިދުގެ 2.04 ވަނަ މާއްދާގެ (ހ) ގައި ބަޔާންކޮށްފައިވާ ގޮތަށް، އާމްދަނީ އާއި ޚަރަދުގެ ހިސާބުތައް ބެލެހެއްޓޭނެ އިންތިޒާމެއް ކައުންސިލު އިދާރާގައި ހަމަޖައްސާފައިވާކަން ކައުންސިލްގެ ރައީސް ކަށަވަރުކޮށް އެކަންކަން ގަވާއިދާ އެއްގޮތަށް ކުރިއަށް ހިނގަމުންދޭތޯ ބަލައި ޗެކުކުރުމަށް ލަފާދިނުން

(ށ) މާލީ އަހަރުގެ ނިޔަލަށް ކައުންސިލްގެ އިދާރާގެ ކޮންޓްރޯލް އޮންނަ ހުރިހާ ފައިސާއަކާއި ފައިސާގެ ގޮތުގައި ބެލެވޭ ތަކެތީގެ ޞައްޙަ މައުލޫމާތު މާލީ ބަޔާނުގައި ހިމެނުމަށާއި، ފައިސާއާ ގުޅޭ ހުރިހާ ހިސާބުތަކެއް ޞައްޙަކަމާއެކު ތައްޔާރުކޮށް ފުރިހަމަކުރުމަށް ލަފާދިނުން

(ނ) މާލީ ބަޔާނުގައި ހިމަނާފައިވާ އަދަދުތަކާއި، އެ އަދަދުތަކަށް ހަވާލާދޭ ނޯޓު ނަންބަރުގައި ހިމަނާފައިވާ އަދަދުތައް އެއްގޮތްތޯ ބަލައި، ދެ އަދަދުގައި ފަރަގު އުޅޭނަމަ، ފަރަގު އަންނަ ސަބަބު ހޯދާ، މާލީ ބަޔާނުގައިވާ އަދަދުތަކަށް ހަވާލާދޭ ނޯޓުގައިވާ އަދަދު ދިމާކުރުމަށް ލަފާދިނުން