ޗެމްޕިއަންސް ލީގުގެ ދެ ފައިނަލަކުން ރެއާލް މެޑްރިޑް އަތުން ބަލިވެފައި ވިޔަސް އަންގާރަ ދުވަހުގެ ރޭ (މިރޭ) ރެއާލްއާ ދެކޮޅަށް ނުކުންނަނީ މުޅިން ތަފާތު މެޗަކަށް ކަމަށާއި އެހެންވެ ބަދަލު ހިފުމަށްވުރެ ބޮޑަށް އެތްލިޓިކޯ މެޑްރިޑްގެ އަމާޒަކީ މޮޅެއް ކަމަށް އެ ކުލަބުގެ ކޯޗު ޑިއޭގޯ ސިމިއޯނީ ބުނެފިއެވެ.

މެޗުގެ ކުރިން ނޫސްވެރިންނާއި ވާހަކަ ދައްކަވަމުން ސިމިއޯނީ ބުނީ ރެއާލް އާ ދެކޮޅަށް އެތްލެޓިކޯ ގޮވައިގެން ނުކުންނަން އޭނާ ޖެހިލުންނުވާ ކަމަށެވެ.

ރެއާލް އިން ކޮންމެ ބަޔަކު 11 ގައި ހިމެނިޔަސް އެ ޓީމެއް ވަރަށް ވަރުގަދަ ވާނެ ކަމަށާއި އެހެންވެ އެތްލެޓިކޯ އިން މަސައްކަތްކުރާނީ މެޗުގެ ކުރީ ކޮޅު ލަނޑު ޖަހައި ނަތީޖާ ހޯދަން ކަމަށް ސިމިއޯނީ ބުންޏެވެ.

އަންގާރަ ދުވަހުގެ ރޭގެ މެޗަށް ނުކުންނައިރު އެތްލެޓިކޯއަށް އަނިޔާގެ މައްސަލަ ވަރަށް ބޮޑެވެ. އެގޮތުން ސިމޯ ވިސާލްކޯ، ހުއާން ފްރަން، ހޯސޭ ގިމެނޭޒް އަދި ޔަނިކް ކަރަސްކޯ އަށް ކުޅެވުމާމެދު ޝައްކެވެ.

ސިމިއޯނީ ބުނި ގޮތުގައި ކޮންމެ ޓީމެއް ނެރުނު ނަމަވެސް ޓާގެޓަކީ މޮޅުވުމެވެ.

އެތްލެޓިކޯގެ ކުޅުންތެރިންނަށް ތައުރީފް ކުރުމުގައި ވަރުބައްޔެއް ނުވާނެ ކަމަށާއި އެކުލަބުގައި ތިބީ ވަރަށް ހިތްވަރުގަދަ ކުޅުންތެރިން ކަމަށް ސިމިއޯނީ ބުންޏެވެ.

"އެތުލެޓިކޯ އަށް އަނިޔާގެ މައްސަލަ ދިމާވެފައިވީ ނަމަވެސް ކޮންމެ ޓީމެއް ނެރެގެން ވެސް އަހަރެމެން ޓާގެޓްކުރާނީ މޮޅަކަށް" ސިމިއޯނީ ބުންޏެވެ.

ރެއާލްގެ ދަނޑުގައި ކުޅޭ މެޗުގައި އަވޭ ގޯލެއް ޖެހުމަށް އެތުލެޓިކޯއިން މަސައްކަތް ކުރަން ޖެހޭނެ ކަމަށް ސިމިއޯނީ ބުނެފައިވެއެވެ. އަދި އެކަމުގެ ސަބަބުން އެތްލެޓިކޯގެ ދަނޑުގައި ކުޅޭ މެޗު ފަސޭހަ ވާނެ ކަމަށެވެ