ގާސިމްގެ ބަންދުގެ މުއްދަތު ހައިކޯޓުން ދަމަހައްޓައިފި، ހުކުމް ސުޕްރީމް ކޯޓުގައި އިސްތިއުނާފްކުރާނެ

ޖުމްހޫރީ ޕާޓީގެ ލީޑަރު ގާސިމް އިބްރާހިމް ހައްޔަރުކޮށް، އެމަނިކުފާނުގެ ބަންދަށް ކްރިމިނަލް ކޯޓުން ޖެހި މުއްދަތު ހައިކޯޓުން ދަމަހައްޓައިފި އެވެ.

ކޯޓުން ނިކުމެވަޑައިގެން ގާސިމްގެ ގާނޫނީ ވަކީލު ހިސާން ހުސެއިން ވިދާޅުވީ ދަށު ކޯޓުން ބަންދަށް ޖެހި މުއްދަތަށް ހައިކޯޓުން ތާއީދުކޮށްފައިވާ ކަމަށެވެެ. އަދި ހައިކޯޓްގެ އެ ނިންމުން ސުޕްރީމް ކޯޓުގައި އިސްތިއުނާފް ކުރައްވާނެ ކަމަށް ހިސާން ވިދާޅުވި އެވެ.

ރާއްޖެ އެމްވީއަށް މައުލޫމާތު ދެއްވަމުން ހިސާން ވިދާޅުވީ ހައިކޯޓުން އެގޮތައް ނިންމުމުގައި ތިން ކަމެއް ފާހަގަ ކުރައްވާފައިވާ ކަމަށެވެ. އެގޮތުން ކުށުގެ ތުހުމަތުގައިވާ މީހަކާ ދެކޮޅަށް ބޭނުންވާނީ ކުށް ސާބިތު ކުރެވޭ މިންވަރުގެ ހެކި ނޫން ކަމަށާއި އެ ހާލަތުގައި، ކުށެެއް ކުރިކަމުގެ ތުހުމަތެއް އުފެދޭ މިންވަރުގެ ހެކި ހުރުމުން ފުދޭނެ ކަމަށެވެ. އަދި ގާސިމަށް ކޮށްފައިވާ ތުހުމަތުގައި، ތުހުމަތެއް އުފެދޭ މިންވަރަށް ފުލުހުން ހެކި ހުށަހަޅާފައިވާ ކަމަށާއި ގާސިމް ބަންދު ކުރަން ނެރުނު އަމުރު ރަނގަޅު ކަމަށް އެ ނިންމުމުގައި ވާކަމަށެވެ.

މެމްބަރުންގެ އިމްތިޔާޒްގެ ގާނޫނުގެ ދަށުން، ގާސިމް ހައްޔަރު ކުރުމުގެ އަމުރަށް އެދުނީ ޕްރޮސެކިއުޓާ ޖެނެރަލް (ޕީޖީ) ކަމަށް ވިޔަސް އޭނާގެ ބަންދުގެ މުއްދަތު އިތުރުކުރަން ކޯޓަށް ހުށަހެޅީ ފުލުހުން ކަމަށް ވާތީ އެއީ އިމްތިޔާޒްގެ ގާނޫނާ ޚިލާފް ކަމެއް ކަމަށް ގާސިމްގެ ވަކީލުން ވަނީ ފާހަގަ ކުރައްވާފައެވެ. ނަމަވެސް ހުކުމުގައި ވަނީ އިމްތިޔާޒްގެ ގާނޫނުގެ ދަށުން ޕީޖީގެ ދައުރު އޮންނަނީ މެމްބަރަކު ހައްޔަރު ކުރުމުގެ އަމުރަކަށް އެދޭއިރު ކަމަށާއި މެމްބަރެއްގެ ބަންދުގެ މުއްދަތު އިތުރު ކުރަން ހުށަހަޅާއިރު އެ ގާނޫނުގައި ބުނާ އެ އުސޫލު ނުހިނގާނެ ކަމަށެވެ.

ޤާސިމްގެ ވަކީލުން ވިދާޅުވީ ގާސިމްގެ ބަންދާ މެދު ގޮތެއް ނިންމި ގާޒީއަކީ ގާސިމް ހައްޔަރު ކުރުމުގެ އަމުރު ނެރުނު ގާޒީ ކަމަށް ވާތީ އެކަން އެގޮތަށް ނުކުރެވޭނެ ކަމަށާއި އެއީ އެ ގާޒީގެ މަސްލަހަތު ހިމެނޭ ކަމެއް ކަމަށެވެ. ނަމަވެސް ހައިކޯޓުގެ ހުކުމުގައި ވަނީ ހައްޔަރު ކުރުމުގެ އަމުރު ނެރޭ ގާޒީ އަށް އެ މައްސަލައިގެ ބަންދާ މެދު ގޮތެއް ނިންމަން ނުއިންނެވޭނެ ސަބަބެއް އޮތް ކަން ގާސިމްގެ ވަކީލުންނަށް ނުދެއްކޭ ކަމަށާއި އެއީ ގާޒީގެ މަސްލަހަތު ހިމެނޭނެ ކަމެއް ނޫން ކަމަށެވެ.

އިސް ފަނޑިޔާރު އަބްދުﷲ ދީދީ ރިޔާސަތު ބެލެހެއްޓެވި އެ މައްސަލަ ބެލި ބެންޗުގައި ދެން ތިއްބެވީ ފަނޑިޔާރު އަބްދުﷲ ހަމީދު އަދި ފަނޑިޔާރު އަލީ ސަމީރު އެވެ.

ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރުކަން ވެސް ކުރައްވާ ގާސިމް ހައްޔަރުކޮށްފައި ވަނީ މިދިޔަ އޭޕްރީލް 20 ވަނަ ދުވަހު އެވެ. ރައްޔިތުންގެ މަޖިލީހުގެ މެމްބަރުންނަށް ރިޝްވަތު ދޭން އުޅުނުކަމުގެ ތުހުމަތުގައި ގާސިމް، އެފަހަރު ހައްޔަރު ކޮށްފައި ވަނިކޮށް، އޭނާ ދޫކޮށްލަން އަމުރުކުރީ ހައި ކޯޓުންނެވެ. އޭރު އޭނާ ދޫކޮށްލަން އަމުރުކުރީ އިމްތިޔާޒްގެ ގާނޫނުގައި ބުނާ އުސޫލުގެ މަތިން، ހައްޔަރު ކުރުމުގެ އަމުރު ޕީޖީ މެދުވެރިކޮށް ހޯދާފައިނުވާތީ އެވެ. އެކަމަކު ފަހުން ގާސިމް ހައްޔަރުކުރީ ސީދާ ޕީޖީގެ ހުށަހެޅުމަކަށް ކޯޓުން ނެރުނު އަމުރެއްގެ ދަށުންނެވެ.

ރިޝްވަތު ދޭން އުޅުނު ކަމުގެ ތުހުމަތުގައި ގާސިމަށް ދައުވާ އުފުލައި، ޝަރީއަތް ދަނީ ހިންގަމުންނެވެ. އެ މައްސަލާގައި ތިން ދައުވާއެއް ގާސިމަށް ކުރެ އެވެ.

ރާއްޖެ އިސްލާހު ކުރަން ޖެހޭ ކަމަށާއި އެމަސައްކަތްއ ގުޅިފައިވާ ލީޑަރުން މަސައްކަތް ފެށުމާއެކު ރާއްޖޭގެ ސިޔާސީ މަޝްރަހް ހަލަބޮލިވެގެން ދިޔައެވެ. އަދި އިދިކޮޅު ސިޔާސީ ފަރާތްތަކަށް ތަފާތު ތުހުމަތުތައް ކުރެވި ފުލުސް އޮފީހަށް ދަނީ ހާޒިރު ކުރަމުންނެވެ. އެގޮތުން ޤާސިމްއަށް ކުރާ އެއް ތުހުމަތަކީ ރައްޔިތުންގެ މަޖިލީހުގެ މެންބަރުންނަށް ރިޝްވަތު ދޭން އުޅުމެވެ. މިތުހުމަތު ފެންމަތިވެފައިވަނީ ރައްޔިތުންގެ މަޖިލީހުގެ ރައީސްގެ އިތުބާރުނެތްކަމަށް ފާސްކުރާވަރަށް ރައްޔިތުންގެ މަޖިލީހުގެ މެންބަރުންގެ އަދަދު ހަމަވެފައިވާކަމަށް އިދިކޮޅު ފަރާތްތަކުން ބުނަން ފަށާފައިވާ ދަނޑިވަޅެއްގައެވެ.

ޤާސިމްގެ އިސްތިއުނާފްގެ މައްސަލަ ހައިކޯޓުގައި ކުރިއަށް ގެނދިޔައިރު ޤާސިމަށް ތާއީދުކުރާ ގިނަ އަދަދެއްގެ ބަޔަކު ވަނީ ހައިކޯޓު ދޮށަށް އެއްވެފައެވެ. ޤާސިމް ދޫކޮށްލުމަށް ގޮވާލާ ޓީޝާޓްތަކެއް ލައިގެން އުޅުނު އެމީހުން އެކަމަށް ގޮވާލާ ބޮޑު ބެނާއެއްވެސް ގެންގުޅުނެވެ. އަދި ދިޔައީ ޤާސިމް ދޫކޮށްލަން ގޮވާލާ އަޑު އުފުލަމުންނެވެ. ނަމަވެސް ފުލުހުން ދޭތެރެ ދޭތެރެއިން ދިޔައީ އެމީހުން ފަހަށް ޖައްސާ އެސަރަހައްދު ހުސްކުރަމުންނެވެ.