ކޮވެކްސް ފެސިލިޓީގެ ދަށުން ވެކްސިން ލިބުނު ދެ ވަނަ ގައުމަކަށް އައިވަރީ ކޯސްޓް

ހަމަހަމަކަމާއެކު ކޮވިޑް ވެކްސިން ހުރިހާ އެންމެންނަށް ފޯރުކޮށްދިނުމަށް އުފައްދާފައިވާ ކޮވެކްސް ފެސިލީޓިގެ ދަށުން ވެކްސިން ލިބުނު ދެ ވަނަ ގައުމަކަށް އައިވަރީ ކޯސްޓް ވެއްޖެއެވެ.

ހުކުރު ދުވަހު އައިވަރީ ކޯސްޓަށް ވަނީ ކޮވިޑް ވެކްސިންގެ ޝިޕްމަންޓް ލިބިފައެވެ. އެގައުމަށް ލިބިފައިވަނީ ވެކްސިންގެ 504،000 ޑޯޒްއެވެ. އަންނަ ހަފްތާގައި އައިވަރީ ކޯސްޓްގައި ވެކްސިން ޖެހުމުގެ ޕްރޮގްރާމް ފަށާނެއެވެ.

ކޮވެކްސް ފެސިލިޓީގެ ދަށުން މިއަހަރު ނިމެންވާއިރު އެންމެ މަދުން އާމްދަނީ ލިބޭ ގައުމުތަކުގެ ތެރެއިން 92 ގައުމަކަށް 1.3 ބިލިއަން ވެކްސިން ޑޯޒް ފޯރުކޮށްދޭނެއެވެ.

މިފެސިލިޓީގެ ދަށުން އެންމެ ފުރަތަމަ ވެކްސިން ލިބިފައިވަނީ ގާނާއަށެވެ.

މިފެސިލިޓީގެ ދަށުން ކޮންމެ ގައުމެއްގެ އާބާދީގެ 20 އިންސައްތައަށް ހިލޭ ވެކްސިން ލިބިގެންދާނެއެވެ. އެހެންނަމަވެސް އެފްރިކާގެ ގައުމުތަކުން މިހާރު ފެންނަމުންދާ ދެކުނު އެފްރިކާގެ ވޭރިއަންޓާގުޅިގެން ކޭސްތައް ފެންނަ މިންވަރު ހަލުވި މިނެއްގައި އިތުރުވަމުންދާއިރު މިއަދަދަށް ވެކްސިން ޖަހައިގެން އެފްރިކާގެ ގައުމުތަކަށް ހަރޑް އިމިޔުނިޓީ ލިބުމަކީ ނާދިރު ކަމެކެވެ. އެހެންކަމުން އެފްރިކާގެ ގައުމުތަކުން އަންނަނީ ވެކްސިން އުފައްދަމުން އަންނަ އެހެން ކުންފުނިތަކާ ވާހަކަދައްކައިގެން ވެކްސިންގެ އިތުރު ޑޯޒްތައް ހޯދުމުގެ މަސައްކަތް ކުރަމުންނެވެ.

އެފްރިކާ ސަރަހައްދުގައި ވައިރަސް ޖެހިގެން މަރުވަމުންދާ މީހުންގެ އަދަދު ލައްކައަކަށްވުރެ މައްޗަށް އަރާފައިވަނީ މިދިޔަ ހަފްތާއެވެ. އެފްރިކާގެ ގިނަ ގައުމުތަކަށް ވަނީ އައު ވޭރިއަންޓާއެކު ކޮވިޑްގެ ދެ ވަނަ ރާޅެއް އައިސްފައެވެ.

25 މިލިއަން މީހުންގެ އާބާދީއެއް އޮންނަ އައިވަރީ ކޯސްޓްގައި ވައިރަސް ޖެހުނު މީހުންގެ އަދަދު 35،650ށް އަރާއިރު މަރުވި މީހުންގެ އަދަދު އުޅެނީ 188 ގައެވެ.

އަނެއްކޮޅުން ވެކްސިން ލިބުނުނަމަވެސް އެގައުމުގައި ވެކްސިން އެންމެ ފުރަތަމަ ލިބެންޖެހޭ މީހުންނަށް ލިބޭނެތޯ ގިނަ ބަޔަކު އަންނަނީ ސުވާލުކުރަމުންނެވެ.